BIZ BIR MAHLUK

Çaklama däl, fakt!

2004-nji ýylyň dekabrynda Ýuwaş okeanda, Indoneziýanyň töwereklerinde erasty sarsgyn boldy. Onuň netijesinde dörän Sunami suw joşguny 230 000 sany adamyň ölümine sebäp boldy. Ýöne bu tebigy betbagtçylykda gury ýerde we suwda ýaşaýan jandarlar, haýwanlar howpdan sowlup bilipdirler. Gözi bilen görenleriň aýtmagyna görä, Sunami tolkuny gelmezden bir sagat öň maýmynlar, piller, towşanlar, it-pişikler... dowla düşüp, howpsuz ýere gaçyp gidipdirler. Şol heläkçilikde haýwanlardan diňe bir ýabany doňuz heläk bolupdyr. 

Şeýle ýagdaýda haýwanlara, jandarlara Gaýypdan nähilidir bir hili signalyň berilýändigine şübhäm ýok. Şeýle signal, ähtimal, adama-da berlendir. Meger biz ony duýýan däldiris. Belki-de, şolar ýaly howpuň boljagyny haýwanlara seredip duýmalydyrys. Altynjy duýgyny ýüze çykarmak ukyby her kime berlen däl, berlen bolaýanda-da, kim bilýär, edil şol iki arada bir ýerden Şeýtan çykyp, al saljakmy, belli däl. 

Biz bir mahluk. Özümizem gaty ejiz. Ýaradylanlaryň içinde bizden ejizi barmyka? Ýokdur! Şoň üçin Alla sygynýas, Ondan pena isleýäs, "Özüň gora, goraýanlaryň içinde edeweri!" diýip ýalbarýas. Toba edýäs. 

Onsoň käte-käte "öňümizi bilmeýänimizem bir gowy zat" diýip şükür edýäs. Şol bir wagtda-da kimdir biri geljegiňi aýdyp bereýinmi diýse, biperwaý garap bilemzok. Ýogsa, boljagy-geljegi Eýämizden başga biljegiň ýokdugyna köpimiziň aklymyz çatýar.

Baýak töweregiň aýal-ebtatlarynyň iki-üç sanysy üýşüp:
- Akgoňurda bir palçy aýal döräpdir. Hakyt  eliň aýasyna seredip, öňüňi aýdyp otyrmyş. Howa maýlasa, bizem gidip, täleýmize garadyp göräýmeli - diýip, ters gürrüň etdiler.

Onsoň şu gün şol aýallaryň birine:
- Şol diýýän palçyňyz adamyň geljegini bilýän bolsa, öňünden aýdyp, Mary GRES-iň golaýynda bolan awariýaň öňüni almaly ekeni-dä - diýdim. Gaharyma diýdim. Näme diýendir öýdýäňiz?

- Awariýa bolup, ölmejek bolsalar, öňräginden gidip, täleýine garatmaly ekenler-dä. Men-ä, ine basym gitjek şoňa - diýdi. 

Allatagalaň bir sypaty - sabyr. Ol howluganok. Edil şonuň ýaly-da, Onuň Adyl diýibem bir ady bar. Ol biadyllyk edenok /etmez/.