Watan näme üçin söýülýär?

Bäbek sallançagyny, çagalar bökejekläp oýnan ýerlerini, ýaşlar şat geçiren günlerini… perzent enesini, ene perzendini, ata maşgalasyny nähili duýgular bilen söýýän bolsa, ynsan hem göbek ganynyń daman ýeri — Watanyny şol duýgular bilen söýýändir.
Bu duýgular manysyz, tebigy islegden dörän duýgular däldir.
Ynsan Watanyny söýýär, çünki onuň üçin ýeke-täk bolan ömür, Watan howasyny öýkenlerine sormagy bilen başlanýar.
Ynsan Watanyny söýýär, çünki ynsana berilen sowgatlardan ruhuń aýnasy bolan gözler ilki bilen Watan nuruny görýär.
Ynsan Watanyny söýýär, çünki ol ähli äden ädimlerini Watan topragyna daýanyp ätse, ýat illerde galyp “ölünçä aglamaly” bolmasa özüni bagtly saýýar.
Ynsan Watanyny söýýär, çünki onuň bedeni maddy taýdan Watanyň bir bölegidir.
Ynsan Watanyny söýýär, çünki onuň ömrüniň gamly wakalaryny Watan bir gara daş edip öz gerdenine alýandyr.
Ynsan Watanyny söýýär, çünki onuň ömrüniň erkinligi, rahatlygy, rysgal-döwleti Watan goýnunda berlendir.
Ynsan Watanyny söýýär, çünki barlygynyň sebäbi bolan atalarynyň mukddes mazarlary we ömrüniň netijesi bolan perzentleriniň dünýä inen ýeri Watanydyr.
Ynsan Watanyny söýýär, çünki bir Watanyń perzentleriniň arasynda kalp birligi, ýaşamak we jandan dostluk saýasynda ruhy ýakynlyk, düşünje birligi emele gelýär.
Ynsan Watanyny söýýär, çünki Watanynda onuň sesiniň hukugy bardyr, hökmürowanlygyň belli bir bölegine ol hem doly eýedir.
Ynsan Watanyny söýýär, çünki Watan ýeňiş gazananyň gylyjy ýa-da bir kätibiň galamy bilen çyzylan resmi serhetlerden ybarat däldir. Ol millet, erkinlik, doganlyk, ykdysadyýet, erk-ygtyýarlylyk, ata-babalara sylag, maşgala söýgüsi, ömür ýatlamalary ýaly birnäçe çuň duýgularýň birleşmesinden dörän mukaddes düşünjedir.
Ine şonuň üçin hem, adamzat taryhynyň haýsy sahypasyny agdarsak, islendik döwürde, islendik milletde çykan ylmy düşünjeler we ýokary ahlaklar hiç haçan Watany başga bir eşrete çalyşmagy ündemändir. Ine, şonuň üçin hem niçeme ärler Watan ugrunda janlaryny pida edipdirler.
Bu sebäpden islendik milletde, islendik medeniýetde, islendik dinde, islendik terbiyede Watan söýgüsi iň gymmatly häsiýetlerdendir, iň mukaddes wezipelerdendir.

NAMYK KEMAL (1840-1888)