Türkmenistanyň Prezidenti wezipesine dalaşgärler we olaryň terjimehallary

Türkmenistanyň Prezidenti wezipesine dalaşgär Gurbanguly Mälikgulyýewiç Berdimuhamedowyň terjimehaly:

1957-nji ýylyň 29-njy iýunynda Türkmenistanyň Aşgabat oblastynyň Gökdepe raýonynyň Babarap obasynda doguldy.

1979-njy ýylda Aşgabatdaky Türkmen döwlet lukmançylyk institutyny tamamlady.

1979-njy ýyldan 1997-nji ýyllary aralygynda Türkmenistanyň Saglygy goraýyş we derman senagaty ministrliginiň ulgamynda dürli wezipelerde zähmet çekdi. Türkmen döwlet lukmançylyk institutynyň mugallymy, terapewtiki stomatologiýa kafedrasynyň dosenti, stomatologiýa fakultetiniň dekany, Türkmenistanyň Saglygy goraýyş we derman senagaty ministrliginiň Stomatologiýa merkeziniň direktory wezipelerinde işledi. Doktorlyk dissertasiýasyny gorady. Lukmançylyk ylymlarynyň doktory, ykdysady ylymlarynyň doktory, professor, Türkmenistanyň Ylymlar akademiýasynyň akademigi diýen alymlyk derejeleri we atlary bar.

1997-nji ýylyň dekabrynda Türkmenistanyň Saglygy goraýyş we derman senagaty ministri wezipesine bellendi. Bu wezipe bilen birlikde, Türkmenistanyň Saglygy goraýşy ösdürmek gaznasynyň ýerine ýetiriji direktory we Türkmen döwlet lukmançylyk institutynyň rektorynyň wezipesini ýerine ýetiriji wezipelerinde işledi.

Şeýle hem, 2001-nji ýylyň aprelinde Türkmenistanyň Ministrler Kabinetiniň Başlygynyň Orunbasary wezipesine bellendi.

Türkmenistanyň Döwlet howpsuzlyk geňeşiniň çözgüdi bilen 2006-njy ýylyň 21-nji dekabryndan Türkmenistanyň Prezidentiniň we Türkmenistanyň Ýaragly Güýçleriniň Belent Serkerdebaşysynyň wezipelerini wagtlaýyn ýerine ýetirdi.

2007-nji ýylyň 11-nji fewralynda ählihalk saýlawlarynda alty dalaşgäriň arasyndan Türkmenistanyň Prezidenti wezipesine saýlandy.

2007-nji ýylyň 14-nji fewralynda Türkmenistanda iň ýokary häkimiýet edarasy bolan Halk Maslahatynyň XIX mejlisiniň barşynda Gurbanguly Mälikgulyýewiç Berdimuhamedow Türkmenistanyň Prezidenti wezipesine resmi girişdi.

2011-nji ýylyň 25-nji oktýabrynda Gurbanguly Berdimuhamedowa Türkmenistanyň Gahrymany diýen at dakyldy.

Türkmenistanyň we daşary ýurtlaryň köp sanly ýokary ordenleri we medallary bilen sylaglandy.

Dünýäniň birnäçe uniwersitetleriniň we akademiýalarynyň hormatly doktory we akademigi.

Boş wagtlary sport bilen we atçylyk sporty bilen meşgullanýar. Rus we nemes dillerini bilýär.

Maşgalaly, bir ogly we iki gyzy bar.

Türkmenistanyň Prezidenti wezipesine dalaşgär Rejep Bazarowyň terjimehaly:

Rejep Bazarow 1958-nji ýylda Daşoguz welaýatynyň Gubadag etrabynyň Amyderýa geňeşliginde doguldy.

1975-nji ýylda orta mekdebi tamamlap, S.A.Nyýazow adyndaky Türkmen oba hojalyk uniwersitetine okuwa girdi we 1980-nji ýylda weterinar lukmany hünäri boýunça tamamlady.

1980-nji ýylda Gubadag etrabynyň “Amyderýa” daýhan birleşiginde uly weterinar lukmany bolup zähmet ýoluna başlady we 1982-2000-nji ýyllar aralygynda Gubadag etrap weterinar laboratoriýasynda weterinar- serolog, “Amyderýa” daýhan birleşiginde baş weterinar, uly weterinar, soňra Gubadag etrabynyň weterinar gullugynyň başlygy wezipesinde işledi.

2000-2005-nji ýyllar aralygynda Gubadag etrap häkimliginiň oba hojalyk bölüminiň müdiri, Gubadag etrabynyň “Obahyzmat” oba hojalyk paýdarlar jemgiýetiniň başlygynyň orunbasary, başlygy bolup işledi.

2005-2008-nji ýyllar aralygynda Daşoguz welaýatynyň Gubadag etrabynyň kärdeşler arkalaşyklary birleşiginiň başlygy boldy. 2008-2011-nji ýyllarda Gurbansoltan eje adyndaky etrabyň häkiminiň oba hojalyk boýunça orunbasary, Gubadag etrabynyň häkimi wezipelerinde işledi.

2011-nji ýyldan Daşoguz welaýatynyň häkiminiň oba hojalyk boýunça orunbasary.

Maşgalaly, alty çagasy bar.

Türkmenistanyň Prezidenti wezipesine dalaşgär Kakageldi Bäşimowiç Abdyllaýewiň terjimehaly:

1966-njy ýylda Mary welaýatynyň Murgap etrabynyň Gowşutbent obasynda doguldy.

1983-nji ýylda orta mekdebi tamamlap, Türkmen politehniki institutyna okuwa girdi.

1984-1986-njy ýyllarda harby gullukda boldy.

Harby gullukdan soň Türkmen politehniki institutynda okuwyny dowam etdirdi we 1990-njy ýylda instituty dag inženeri hünäri boýunça tamamlady. Şol ýylda hem “Türkmengaz” döwlet konserniniň “Marygazçykaryş” müdirliginiň guýulary ýerasty we düýpli abatlaýyş bölüminde burawlaýjynyň kömekçisi bolup zähmet ýoluna başlady. Soňra şu müdirlikde ussa, inžener, inžener-tehnolog, zähmeti goramak we tehniki howpsuzlyk bölüminde alyp baryjy inžener, gaz we kondensat çykarmak we taýýarlamak boýunça önümçilik tehnologiýa bölüminde esasy inžener, 2002-nji ýyldan 2009-njy ýyl aralygynda bölümiň başlygy, şu müdirligiň baş tehnology bolup işledi.

2009-njy ýyldan başlap “Türkmengaz” döwlet konserniniň “Marygazçykaryş” müdirliginiň başlygy wezipesinde işläp gelýär.

1992-nji ýyldan bäri Türkmenistanyň Demokratik partiýasynyň agzasy.

Maşgalaly, dört çagasy bar.

Türkmenistanyň Prezidenti wezipesine dalaşgär Mollanyýazow Gurbanmämmediň terjimehaly:

1947-nji ýylda Balkan welaýatynyň Türkmenbaşy şäherinde doguldy.

1963-nji ýylda Nebitdagyň nebitçilik tehnikumyna okuwa girdi we 1967-nji ýylda tehnik-gurallayjy hünäri boýunça okuwyny tamamlady. 1966-njy ýylda “Türkmennebit” Döwlet konserniniň “Burnebitgaz” trestiniň buraw-agtaryş edarasynda burawlaýjynyň kömekçisi bolup zähmet ýoluna başlady.

1967-1969-njy ýyllarda harby gullukda boldy.

1969-1973-nji ýyllarda “Türkmennebit” Döwlet konserniniň Gaz edarasynda gaz işleri boýunça abatlaýjy, “Türkmennebit” Döwlet konserniniň “Burnebitgaz” trestiniň elektrik bilen burawlamak eksperimental edarasynda burawlaýjynyň kömekçisi, “Nebitgazylmytaslama” institutynda nebitpromysel geologiýasy institutynyň laboratoriýasynyň uly tehnigi, “Türkmennebit” Döwlet konserniniň nebit we gaz guýularyny berkitmek boýunça müdirliginiň maşinisti bolup işledi.

1973-1991-nji ýyllarda “Türkmennebit” Döwlet konserniniň “Nebitdagnebit” nebitgaz çykaryş müdirliginde dürli wezipelerde, şol sanda guýulary ýerasty we düýpli abatlaýan sehiniň burawlaýjysy, guýulary düýpli abatlaýan sehiniň burawlaýjysy, ussasy, çylşyrymly işler boýunça ussasy, guýulary düýpli abatlaýan ussa bolup işledi.

1990-njy ýylda Türkmen politehniki institutynyň Balkanabatdaky bölümine okuwa girdi we ony 1995-nji ýylda “Nebit we gaz ýataklaryny işläp taýýarlamak hem-de ulanmak” hünäri boýunça tamamlady.

1991-2000-nji ýyllar aralygynda “Türkmennebit” Döwlet konserniniň birliklerinde dürli wezipede, “Nebitdagnebit” nebitgaz çykaryş müdirliginde guýulary düýpli abatlaýyş sehiniň başlygy, soňra guýulary düýpli abatlaýan dolandyryş edarasynyň Barsagelmez sehiniň başlygy, 2000-2010-njy ýyllarda guýulary düýpli abatlaýan dolandyryş edarasynyň merkezi inžener-tehniki gullugynyň başlygy, baş inženeri, başlygyň wezipesini ýerine ýetiriji, “Nebitgazdüýpliabatlaýyş” trestiniň Barsagelmez guýulary düýpli abatlaýyş müdirliginiň başlygynyň wezipesini ýerine ýetiriji, başlygy wezipelerinde işledi.

2010-njy ýyldan bäri “Türkmennebit” Döwlet konserniniň “Nebitgazdüýpliabatlaýyş” trestiniň dolandyryjysy wezipesinde işleýär.

“Watana bolan söýgüsi üçin” medaly hem-de “Türkmenistanyň Garaşsyzlygynyň 20 ýyllygyna” ýubileý medaly bilen sylaglandy.

Maşgalaly, iki çagasy bar.

Türkmenistanyň Prezidenti wezipesine dalaşgär Esendurdy Gaýypowyň terjimehaly:

1959-njy ýylda Lebap welaýatynyň Galkynyş etrabynyň Azatlyk geňeşliginiň Ataoba obasynda doguldy.

1977-nji ýylda Galkynyş etrabynyň “Azatlyk” daýhan birleşiginde daýhan bolup zähmet ýoluna başlady.

1978-1980-nji ýyllarda harby gullukda boldy.

1980-1983-nji ýyllar aralygynda Galkynyş etrabynyň medeniýet bölüminde, 1983-1985-nji ýyllarda Türkmenistanyň Nebitgaz senagaty we mineral serişdeler ministrliginiň “Türkmengündogarnebitgurluşyk” müdirliginde işçi bolup işledi.

1985-nji ýylda Türkmen politehniki institutyna okuwa girdi we 1990-njy ýylda ony inžener-gurluşykçy hünäri boýunça tamamlady.

1987-1989-nji ýyllarda dürli kärhanalarda ― Türkmenistanyň Nebitgaz senagaty we mineral serişdeler ministrliginiň Aşgabatdaky nebit maşyngurluşyk zawodynda, Aşgabat şäheriniň gurluşyk-gurnama müdirliginde, “Türkmengündogarnebitgurluşyk” müdirliginde hünärmen bolup işledi. 1989-njy ýyldan başlap “Lebapobagurluşyk” we “Lebapgurluşyk” önümçilik birleşikleriniň birliklerinde dürli wezipelerde, şol sanda 1989-njy ýyldan 2003-nji ýyl aralygynda 78-nji mehanizmleşdirilen göçme kolonnada baş hünärmen, 2003-2006-njy ýyllarda Garaşsyzlyk etrabyndaky mehanizmleşdirilen göçme kolonnada mehanik, baş inžener, gurluşyk materiallary zawodynyň direktory, 78-nji mehanizmleşdirilen göçme kolonnanyň, soňra bolsa 79-njy mehanizmleşdirilen göçme kolonnanyň başlygy bolup işledi.

2006-2008-nji ýyllarda “Lebapobagurluşyk” önümçilik birleşiginiň başlygy, 2008-2009-njy ýyllarda bolsa Türkmenistanyň Gurluşyk ministrliginiň “Lebapgurluşyk” önümçilik birleşiginiň başlygynyň birinji orunbasary, 15-nji ýöriteleşdirilen gurluşyk müdirliginiň başlygy bolup işledi.

2009-njy ýyldan başlap Türkmenistanyň Gurluşyk ministrliginiň “Lebapgurluşyk” önümçilik birleşiginiň başlygy bolup işleýär.

Maşgalaly, iki çagasy bar.

Türkmenistanyň Prezidenti wezipesine dalaşgär Saparmyrat Batyrowyň terjimehaly:

1954-nji ýylda Ahal welaýatynyň Sarahs etrabynyň Ata obasynda doguldy.

1973-1975-nji ýyllarda harby gullukda boldy.

1980-nji ýylda Türkmen döwlet ykdysadyýet we dolandyryş institutyny ykdysadyýetçi hünäri boýunça tamamlady.

1980-nji ýylda Türkmenistanyň Gurluşyk ministrliginiň Iri panelli jaý gurluşyk trestinde zähmet ýoluna başlady, şol ýerde 1985-nji ýyla çenli uly buhgalter, topar ýolbaşçysy bolup işledi.

1985-nji ýyldan 1990-njy ýyl aralygynda “Türkmenobahojalykbejerişgurluşyk” trestiniň Aşgabatdaky abatlaýyş hojalyk gurluşyk müdirliginiň uly buhgalteri, soňra 46-njy mehanizmleşdirilen göçme kolonnasynyň, Türkmenistanyň Ýerli senagat ministrliginiň abatlaýyş-gurluşyk müdirliginiň baş buhgalteri, soňra bolsa şol ministrligiň baş buhgalteri bolup işledi.

1990-1992-nji ýyllarda “Türkmenhaly” döwlet birleşiginde baş buhgalter bolup işledi. 1992-nji ýyldan 1996-njy ýyl aralygynda “Türkmenmiwegökönümlerigurluşyk” trestiniň Aşgabatdaky üpjünçilik müdirliginiň başlygy, 1996-1999-njy ýyllarda bolsa Türkmenistanyň Dokma senagaty ministrliginiň “Türkmenrosmebel” türkmen-rus bilelikdäki kärhanasynyň baş direktory boldy.

1999-njy ýyldan 2010-njy ýyl aralygynda Türkmenistanyň Dokma senagaty ministrliginiň Abadan şäherindäki haly kombinatynyň baş inženeri, direktorynyň orunbasary, direktory bolup işledi.

2010-njy ýyldan bäri Türkmenistanyň Dokma senagaty ministrliginiň Gökdepe şäherindäki ýüplük egiriji fabriginiň direktory bolup işleýär.

“Türkmenistanyň Garaşsyzlygynyň 20 ýyllygyna” ýubileý medaly bilen sylaglandy.

Maşgalaly, bäş çagasy bar.

Türkmenistanyň Prezidenti wezipesine dalaşgär Ýarmuhammet Orazgulyýewiň terjimehaly:

Orazgulyýew Ýarmuhammet 1960-njy ýylyň 20-nji martynda Ahal welaýatynyň Gökdepe etrabynyň Ahal obasynda doguldy.

1977-nji ýylda Türkman politehniki institutyna okuwa girýär we 1982-nji ýylda inžener-elektrik hünärini boýunça okuwyny tamamlaýar.

1982-1984-nji ýyllarda „Türkmengazprom“ önümçilik birleşigine degişli „Gazojak“ önümçilik birleşiginiň „Kerpiçli“ gaz çykaryş dolanşygynda podstansiýanyň başlygy bolup zähmet ýoluna başlady.

1984-1985-nji ýyllarda „Gökdepeetrapselenergo“ edarasynda önümçilik-tehniki bölüminiň uly inženeri, 1985-1995-nji ýyllar aralygynda „Ahalsuwhojalyk“ trestiniň „Gurluşyk materiallary we detallary“ kombinatynda baş energetik, baş inžener wezipelerinde işledi.

1995-2006-njy ýyllar aralygynda „Ahalremontgurluşyk“ önümçilik birleşiginiň Gökdepedäki „Obasuwhyzmat“ edarasynda baş energetik, „Ahalenergo“ önümçilik birleşiginiň Gökdepe etrap elektrik ulgamynyň başlygy, „Ahalsuwhojalyk“ önümçilik dolandyryşynyň „Gökdepesuwhojalyk“ kärhanasynyň baş energetigi, „Türkmenenergo“ Döwlet elektroenergetika korporasiýasynyň „Döwletenergogözegçilik“ kärhanasynyň baş inženeri, 2006-2007-nji ýyllarda Türkmenistanyň Energetika we senagat ministriniň birinji orunbasary -„Türkmenenergo“ Döwlet elektroenergetika korporasiýasynyň başlygy, 2007-2009-njy ýyllarda Türkmenistanyň Energetika we senagat ministriniň orunbasary - „Türkmenenergo“ döwlet elektroenergetika korporasiýasynyň başlygynyň wezipesini wagtlaýyn ýerine ýetiriji wezipelerinde işledi.

2009-njy ýylyň ýanwar aýyndan häzirki wagta çenli Türkmenistanyň Energetika we senagat ministri wezipesinde işleýär.

“Watana bolan söýgüsi üçin” medaly we “Türkmenistanyň Garaşsyzlygynyň 20 ýyllygyna” ýubileý medaly bilen sylaglanyldy.

Maşgalaly, iki ogly we iki gyzy bar.

Türkmenistanyň Prezidenti wezipesine dalaşgär Annageldi Orazberdiýewiç Ýazmyradowyň terjimehaly:

Annageldi Orazberdiýewiç Ýazmyradow 1965-nji ýylda Ahal welaýatynyň Babadaýhan etrabynyň Zähmet obasynda doguldy.

1982-nji ýylda Tejen şäherindäki “Garagumkompleks” birleşiginiň Önümçilik tehniki üpjünçilik dolanyşygynda 1-nji derejeli işçi bolup zahmet ýoluna başlady.

1983-nji ýylda Türkmen oba hojalyk unwersitetine okuwa girdi we 1988-nji ýylda inžener-gidrotehnik hünäri boýunça okuwyny tamamlady.

1988-1993-nji ýyllarda Tejen etrap suwaryş ulgamlar müdirliginiň hünärmeni bolup zähmet ýoluny dowam etdi we bölüm başlygy boldy.

1993-2004-nji ýyllar aralygynda “Türkmenplodowoşstroý” trestiniň Tejen şäherindäki Mehanizmleşdirilen göçme kärhanasynda işledi. Soňra “Ahalobagurluşyk” önümçilik birleşiginiň 23-nji Mehanizmleşdirilen göçme kärhanasynyň başlygy boldy.

2004-2007-nji ýyllarda Türkmenistanyň Suw hojalyk ministrliginiň “Ahalsuwhojalyk” önümçilik birleşiginiň “Abatlaýyş işleri” önümçilik dolanşygynda, soňra Türkmenistanyň Suw hojalyk ministrliginiň Gurluşyk, abatlaýyş we önümçilik kärhanalarynyň birleşiginiň “Abadan gurluşyk önümleri” kärhanasynyň başlygy wezipesinde işledi.

2007-nji ýylda Türkmenistanyň Suw hojalyk ministriniň birinji orunbasary, 2008-nji ýylda bolsa Türkmenistanyň Suw hojalyk ministri wezipesine bellenildi.

1999-njy ýyldan bäri Türkmenistanyň Demokratik partiýasynyň agzasy.

“Watana bolan söýgisi” üçin medaly we “Türkmenistanyň Garaşsyzlygynyň 20 ýyllygyna” ýubileý medaly bilen sylaglanyldy.

Maşgalaly, bäş çagasy bar.

Çeşme: www.turkmenistan.gov.tm

Dalaşgärleň deň ýarsy TPI-iň uçurymlary ekenäý tüweleme. Siz haýsy diýýäňiz?

Gurbanguly Berdimuhamedow - TDLU(51%, 14 adam)

Rejep Bazarow - TOHU(3%, 1 adam)

Kakageldi Abdyllaýew - TPI(14%, 4 adam)

Gurbanmämmet Mollanyýazow - TPI(7%, 2 adam)

Esendurdy Gaýypow - TPI(0%, 0 adam)

Saparmyrat Batyrow - TDY we DI(0%, 0 adam)

Ýarmuhammet Orazgulyýew - TPI(11%, 3 adam)

Annageldi Ýazmyradow - TOHU(11%, 3 adam)