FIFA geçen ýylyň iň gowylaryny saýlady

Düýn Şweýsariýanyň Zürih şäherinde ýerleşýän FIFA-nyň ştab-kwartirasynda geçen ýylyň iň gowylaryny sylaglamak dabarasy bolup geçdi.

Bütin dünýäniň sabyrsyzlyk bilen garaşan düýnki dabarasynda janköýerleri esasy gyzyklandyran zat "Altyn Pökgi" baýragynyň bu ýyl kime beriljekdigidi. Soňky 4-5 ýylda futbol oýnamakda öz kärdeşlerinden ep-esli saýlanýan Ronaldo hem-de Messiniň esasy dalaşgärler hökmünde görkezildigi bu abraýly baýragyň 3-nji dalaşgäri Xavi bolmagy başarypdy.


Netijede, bu 3-likden Messi "Altyn Pökgi" baýragyna iň mynasyby hasaplanyldy we FIFA tarapyndan 2011-nji ýylyň iň gowy futbolçysy diýlip saýlanyldy.

Ýylyň iň gowy tälimçisi diýen hormatly ada bolsa, Barcelanyň baş tälimçisi Hosep Guardiola mynasyp bolmagy başardy. Ol bu ada eýe bolmak üçin öz kärdeşleri Sir Alex Fergusony hem-de Jose Mourinhony yzda galdyrmaly boldy.

Ýylyň iň owadan golyny bolsa Barcelonaly Messi hem däl, Manchester Unitedli Rooney hem däl, Santosly gelejegiň ýyldyzy hasaplanýan Neymar salmagy başarypdyr.

Ýylyň iň gowy zenan futbolçysy diýen ada Ýaponiýaly Homare Sawa mynasyp görüldi. Ýylyň iň gowy zenan toparynyň tälimçisi diýen ada bolsa Ýaponiýanyň zenanlar Milli futbol ýygyndysyny dünýä çempiony etmegi başaran Norio Sasaki mynasyp boldy.

FIFA tarapyndan Milli ýygyndylara her ýyl gowşurylýan "FIFA Fair Play" baýragynyň bu ýylky eýesi Ýaponiýanyň Milli ýygyndysy bolmagy başardy.

Şeýle-de FIFA tarapyndan geçen ýylyň jemi boýunça "Ýylyň simwoliki ýygyndysy" saýlandy. 11 adamlyk bu sanawa Barcelonadan 5, Realdan 4, Manchester Unitedden 2 futbolçy girmegi başardy:

Casillas ("Real", Spain) - Alves ("Barcelona", Brasil), Vidić ("Manchester United", Serbia), Pique ("Barcelona", Spain), Ramos ("Real", Spain) - Iniesta ("Barcelona", Spain), Alonsa ("Real", Spain), Xavi ("Barcelona", Spain) - Ronaldo ("Real", Portugal), Rooney ("Manchester United", England), Messi ("Barcelona", Argentina)

Geçirilen bu dabara Jose Mourinho we Cristiano Ronaldo dagylar gatnaşmadylar, has dogrusy gatnaşmak islemediler. Bu bolsa bularda öz ýoldaşlaryna bolan sylanşygyň pesliginiň alamaty bolup durýar..