Lebbeýk Allahumma lebbeýk

“Lebbeýk Allahumma lebbeýk Lebbeýkä la şarika leke lebbeýk Innal hamda we nygmata leke wel mulk la şarika laka lebbeýk. ”

Şugün bir sebäp bilen bu sözleriň manysy barada gyzyklanyp başladym, internetden gözledim we köp wagtdan bäri düşinip bilmedik meselelerime bu sözleriň çözgüt ekenini düşindim. Azajyk terjime we ylham bilen, esasan nebsime ýüzlenip ýazylan bu setirleri dertdeşlerim bilen paýlaşmak isledim.
(Gysga manysy: Lebbeý Allahym, emirleriňe boýun egip geldim. Seniň çäksiz gudrat we mülkiňde şerigiň ýok, hamd ýalňyz saňadyr).

Allaha gul bolmany düşinmek üçin aklyň ýeke özi ýeterli däl. Yşk gerek, yşk. Käbäni tawaf etmäni, hajda şaýtana daş atmany, namazy, orazany, gurbanlygy akyl bilen düşinmek kyn. Akyl bilen diňe hikmetine düşinersiň, ýöne gullugyň manysyna düşinmek üçin yşk gerek.

Söýmeýän ýürek bilen, “Halilullah” (Allahyň söýgüli guly) bolan Ybraýymy düşinmek kyn. Alawyň içine girip ýanmadyk Ybraýyma akyl bilen düşinmek kyn. Ýüregi Allaha yman bilen , yşk bilen ýanýan Ybraýymy alawyň ýakmajagyna, yşksyz ýüregiň düşinmegi kyn.

Dünýä söýgüsine “söýgi” diýp, boşluk bilen dolan ýürek bilen, ömrüni naharhana, ýatakhana, hajathana. işhana arasynda geçirip, durmuşyn mundan başga uly bir manysy bardygyny duýyp bilmeýän ýürek bilen Allahyň söýgüli gullarynyň durmuşlaryna, olaryň dünýäni pes görmeklerine düşinmek kyn.

Men-menlik girdapyna batan gury ýürek bilen, duýgylarynyň elinde oýunjak bolup, bedenine gul bolan, özüni çenden aşa söýýän ýürek bilen, “hiç zada gurban boljak däl” diýp nebsiniň, baýlygyň, şohratyň, rahatyň gurbany bolan ýürek bilen, gurban eden Ybraýymy, gurban bolan Ysmaýyly düşinmek kyn.

Bu hakykata düşinmeýänler üçin namaz ýöne “ýatyp turmak”, oraza bolsa “aç gezmek”dir. Käbäni tawaf etmek bir “akylsyz”lykdyr. Yşksyz ýürekler üçin gurban ýöne bir “haýwan”, gurban baýramy bolsa “et baýramy”dyr.

Allaha iman edip yşk bilen, gönülden gelen ses bilen Lebbeýk diýenleri, Allah başgalaryna gurban etmedi, etdirmedi. Allaha Lebbeýk diýmeýänler, yşkyny ýitirenler bolsa, Allahdan başga her zada “lebbeýk” diýdiler, başga zatlara gurban boldylar. Şahyryň aýdyşy ýaly “Başymyza näme gelenem bolsa, yşky ýitirenimiz üçin geldi. “