MÄHIR

Gadym zamanlarda Hytaýda Li Li atly bir gyz ýaşanmyş. Ulygyz ýaşyna ýeten Li Li göwün söýen ýigidi bilen durmuş gurupdyr durmuş gurupdyr. Li Liniň durmuşa çykan ýigidi garry ejesi bilen ýaşaýar eken. Gyz durmuş guranyndan soňra, käbir ýowuz synaglar bilen ýüzbe-ýüz durmaly bolupdyr. Ol hatda gaýynenesi bilen hem oňly düşünişip ýaşap bilmändir. Şonuň üçin hem gaýyndyr gelniň arasynda wagtal-wagtal dawa ýüze çykypdyr. Bu ýagdaý Li Liniň ýanýoldaşyny hem alada goýupdyr. 

Gaýynenesi bilen oňşuksyzlykdan halys bez bolan gelin bir mahal kakasy bilen ýakyn gatnaşykda bolan gök önüm satýan ýaşuly satyjydan maslahat sorapdyr. Satyjy oňa gök önümlerden bir melhem ýasap beripdir we şeýle diýipdir:
 - Ine, saňa zäherli melhem. Şu melhemi üç aýyň dowamynda az-azdan gaýyneneň iýýan naharyna goş. Üç aýdan soň gaýyneneň zäherlenip, aradan çykar. Nahara zäheri az-azdan goşanlygyň üçin, bu işi seniň edeniňi hem hiç kim aňmaz. Ýöne sen şu üç aýda gaýyneneň bilen juda mähirli bolmalysyň. Oňa iň gowy tagamlary bişirip bermelisiň. Ýogsam aýybyň açylar.

Gelin öýüne gelip, ähli zady satyjynyň diýşi ýaly edýär. Zäherli melhemi her gün az-azdan gaýynenesiniň iýýän naharyna goşýar. Hiç kim şübhelenmesin diýibem gaýynenesi bilen örän mähirli gepleşýär. Ol näme diýse, diýenine ýok diýmeýär. Entek gelninden beýle mähir görmedik gaýynenesi hem wagtyň geçmegi bilen oňa has ýakyn durup başlaýar. Şoň olaryň gatnaşygy eneli-gyzyň gatnaşygy ýaly has-da süýjeýär. Indi öýde her kim bagtyýarmyş. Ýonýoldaşy bolsa birden gowy tarapa özgeren gelnini has-da söýýärmiş.

Ýöne bir ýagdaý gün geçdigiçe gelni azara goýup başlapdyr. Çünki üç aý tamamlanyp barýarmyş. Gelin şeýle mähriban gaýynenesiniň ölenini islemändir. Ýöne alajyň näme? Zaher bireýýäm etjegini edendir...

Li Li ýene-de goja satyjynyň ýanyna barýar we oňa arzyny beýan edýär. Satyjy bolsa Li Liniň gözýaşa ezilen gözlerine seredip, gülüp başlaýar we şeýle diýýär:
 - Mähriban Li Li, saňa beren melhemim zäher däl-de, ýönekeý bir witaminlerdi. Olar seniň gaýyneneňe, gaýta kuwwat berendir. Hakyky zäher bolsa seniň beýniňde bardy. Sen gaýyneneňe mähirli garadyň, ol hem saňa şeýle nazar bilen garap başlady. Netijede siz indi eneli-gyz bolduňyz.

Merjen GARAJANOWA, HTTU-nyň talyby

Gadymy hytaý nakylynda şeýle diýilýär: "Gül beren elde gülüň ysy galar". Söýülýän kişi söýgüsini adamlara bagyşlan kişidir. Geliň birek-birege mähirli bolalyň!