Dostluk, agzybirlik, birek-birege bolan sylanşyk esasynda geçen futbol: Talyplar.com - Ertir.com 6-12

Düýnki (13.11.2011ý) Aşgabatda geçirilen futbol duşuşygyndan soň, Ertir.com saýdy özüniň beýleki türkmen formlaryndan bir ädim öňdedigini ýene-de bir gezek subut etdi. Takmynan +12°C bulutly, salkyn howada oýnalan futbol iki toparyňam garşylykly salan gollary netijesinde gyzyklyja geçdi diýsem ýalňyşdygym bolmaz.

Futbol üçin 14:00-da başlamak şerti bilen günortan sagat 13:50-de "Köpetdag" stadionyň Teke bazar tarapyndaky kiçi futbol polýasyna üýşmeşek etdik. Özüm-ä bir kiçijek sebäp bilen 10-15 minut gijä galyp bardym (Ýüzüni aşak sallap gijä galany üçin ötünç soraýan smailik). Oýuna ýalňyşmasam 14:25-lere dagy başladyk öýdýän. Oýuna başlamankak Talyplar.comly oglanlaryň türgenleşik geçişlerini görüp, biz-ä ilki garşydaşlardan çekindik çynymyzy aýtsam. Gudrat, Zenit hem-de men gapdalda duran ýerimiziden "Bäh bulaň trenirowka edäýişlerinäý, bizi utjaklary çyn öýdýän.." diýişip, özara degişen bolduk.

Soň duşuşyga başlamak üçin meýdança üýüşdik. Meýdançaň bir tarapynda Talyplar.com, beýleki tarapynda bolsa Ertir.com. Sanymyzy sanadyk, Talyplar.com 8 adam, Ertir.com 6 adam (Aslynda 7 adam, 7-njimiz Zenit agza. Olam eli döwük bolanlygy sebäpli futbol oýnamak üçin däl-de, futbola janköýerlik etmek üçin geldi). Biziň sanymyzyň azlygy sebäpli Ertir.comda agza bolmadyk Merdan (ChemicalMan agzaň dosty) diýip bir oglany sostawymyza goşdyk, elbetde garşydaş toparyň rugsaty bilen. Ertir.comdan Ýuskanep agzaň hem gelmegine garaşyldy, emma gelmedi. Netijede duşuşyga Talyplar.com 8 adam bilen, Ertir.com bolsa 7 adam bilen başlady.

Toparlaryň düzümi aşakdaky ýaly:

Ertir.com 3-2-1: ChemicalMan (captain), MGazak, Gudrat, Wyždanyň sesi, Oppiş, Batyr, Merdan (ChemicalMan agzaň dosty).

Talyplar.com 3-2-2 (öýdýän): Mirasymyz (captain), Broker, Leonardoo, Bravo, 1Merdan, Şahriýar, NotýetPerfect, Ata.

Duşuşykda hasaby ýalňyşmasam Gudrat agza (Ertir.com) açaýdy öýdýän. Has.. öwwaý duruňhany, oýnuň hasabyny ýazmandyryna. Oýnuň hasabyny ýaz zat diýip dagy ýatladyňda-how, nähiläý siz. 🙂

Talyplar.com - Ertir.com 6-12

Duşuşykda hasaby ýalňyşmasam Gudrat agza (Ertir.com) açaýdy öýdýän. Hasap açylýança oýun doly artykmaçlygy bilen biziň elimizde boldy. Emma goragymyzda goýberen ýalňyşlygymyzdan soň hasaby deňlän (1-1) Talyplar.comlylar soňky ýyllardaky Barselonalylaryň futbol oýnaýşyny ýatlatdy. Biziň daşymyza kerep aýlan ýaly şeýle bir gysdylar, goragymyzy aljyratdylar. Gysga paslar bilen derwezämiziň öňünde hüjüm yzyna hüjüm etdiler. Talyplar.comlylaryň 1-1-dan soň üsti-üstine eden hüjümleri netije hem berdi. Netijede Talyplar.comlylar hasaby 2-1 etdiler we oýunda öňe geçdiler.

Şol goldan soň Talyplar.com azajyk gowşady. Bilemok näme üçin, garşydaşymyz şondan soň hamala futbol oýnasy gelmeýän ýaly oýun görkezdi. Bizem pursatdan peýdalandyk, oýunda öňe geçdik, hasaby 2-6 çenli ýetirmegi başardyk. Şondan soň Talyplar.comlylar ýene-de azda-kände özlerini dürsäp başladylar. Gol saldylar, hasaby 3-6, soň bolsa 4-6 etdiler. Şondan soň oýun iki taraplaýyn garşylykly hüjümler bilen geçdi. Oýunda iki tarapyň hem deň güýçde oýnamagyna garamazdan, bize garşydaşlaň derwezesine gol salmak gaty bir kyn bolmady. Hasaby 4-9 etdik. Oýnuň gidişi biziň peýdamyza bolmasa-da gollar doly artykmaçlygy bilen biziň peýdamyza boldy. 4-9-dan soň hasaby 5-9, 6-9, 6-10, 6-11, iň soňky minutlarda bolsa 6-12 etdik. Oýunam şu hasap bilen tamamlandy.

Oýunda biz Ertir.comçylar köplenç goragda ýalňyşlyklar goýberdik. Özüm-ä goragda oýnamany gowy görýänim üçin merkezi goragçy bolup oýnadym, goragyň sag gapdalynda Merdan, çep gapdalynda bolsa ChemicalMan oýnady. Esasanam goragyň çep tarapynda (ChemicalMan hem-de men) has köpräk ýalňyşlyklar goýberdik, hat-da bize giren 1-2 gol şol ýalňyşlyklar sebäpli girdi. Ýöne ol ýalňyşlyklarymyzy gaty bahym düzetdikläý.

Hüjümçiler barada aýtsam, olara söz ýok. Malades, Oppiş hem, Gudrat hem, Wyždanyň Sesi hem betinden oýnadylar. Salan gollarymyzyň hem aglabasy şulaň gowy oýunlary netijesinde girdi. Ýene bir belläsim gelýän zat bar, olam biziň derwezebanymyz barada. MGazak agza bize hem derwezeban boldy, hem tälimçi boldy. Oýun başlamanka aýtdy: "Oglanlar, oýnuň dowamynda sögsem, üstüňize gygyrsam gaty görmeşek ýokdyr..". Ilkä näme üçin beýle diýdikäräý diýip geňem gördüm, ýöne näme üçin diýenine soň oýnuň dowamynda düşündim. Ýalňyşlyk goýberäýseň dagy dat güniňe, MGazak agzadan hökman temmiňi alýaň. MGazak agzaň "Eýle etmäň.. Beýle etmäň.. Ony ediň.. Muny ediň.." ýaly gykylyklary oýnuň bütün dowamynda eşdilip durdy. Derwezeden owadan toplary çykardy, köp ýerde toparymyzy gollardan halas etdi. Şonuň üçin düýn toparymyzyň ýeňiş gazanmagyna uly kömek edenleriň biri derwezebanymyz diýsem känbir ýalňyş bolar öýdemok.

Garşydaş toparda bolsa, goragy Ata agzaň ýeke özi saklady diýen ýaly. Ata agza hüjüme geçse, garşydaşlaň goragynda bir kemçiligiň barlygy derrew bildirýär. Esasy hüjümçileri bolup oýnan oglan (1Merdan agza öýdýän) gowy oýnaýan eken. Oýnuň dowamynda biz goragçylary gaty köp yzynda ylgatdy. Umuman alaňda Talyplar.comlylar gowy futbol oýnadylar. Emma meň öz pikirimçe garşydaşlar ýekeje ýalňyşlyk goýberdiler. Olam Bravo agzany (Ertir.comdaky Lukman Hekim agza) hüjümde oýnatmaly däldiler, Bravo derwezeban bolmalydy. Muny oýunda Bravo gowy oýnamady diýip diýemok. Gowy oýnady, sözüm ýok. Ýöne derwezede has gowy oýnap bilýändigini mundan öňki oýunlarda aňryýany bilen subut edipdi.

Oýnuň dowamynda 2-3 sany şikesler hem boldy. Ilkä garşydaş topardaky Mirasymyz agza meň gözümi gögerdip, burnymy ganadyp ýere ýatyrdy. Näme boldyka diýipdirin. Gözüm ýerinden çykandyr öýütdim. Bu hereket üçin Mirasymyz agza iň bärkisi sary kartoçka-da bermediler-how. 🙂 Oýun edýän, futbolda onça-munça bolarlaý, dogrydämi Mirasymyz?! Düýnki gözüme degen urgydan soň, şu gün okuwda menden iň köp soralan sorag "Gözüňi kim gögertdi? Kimden uruldyň? Kim bilen uruşdyň? 😆".

Ýene bir şikes oýnuň soňlarynda Talyplar.comdaky Şahriýar agzanyň bizdäki Wyždanyň Sesi agzany gödeklik bilen ýykmagyndan soň boldy. Şundan soň bu ikisiniň arasynda azajyk razborkada boljak boldy öýdýän. Iki oýunçam şikes aldy. Ýöne Wyždanyň Sesi oýny dowam edip bildi, Şahriýar agza bolsa alan şikesi sebäpli oýny şol ýerde tamamlamaly boldy.

Owadan gollar salyndy. Çynymy aýtsam onça golyň arasynda iň owadan goluň haýsydygyny men-ä saýlap bilmedim. Özüňiz iň owadan goly men saldym, ýa-da plan agza saldy diýip seslenäýmeseňiz. Oýnuň iň gowy futbolçysy meselesinde hem edil şonuň ýaly, kimiň iň gowy futbolçy bolandygyna men-ä plan zat diýip biljek däl. Hemmesem (Menden galany) gowy oýnady. Oýnuň iň gowy futbolçysynyň kim bolanlygyny bize neýtral bolup aýdyp biljek agza - Zenit. Sebäbi Zenit bütin 1,5 sagadyň dowamynda bize janköýer boldy. Şonuň üçin, bu meselede "habary kimden al, habary Zenit agzadan al" diýenimiz kem bolmazmyka diýýän.

Düýnki oýunda iň esasy zat utmak däl, utulmagam däl, gol salmagam däl, gol saldyrmazlygam däl. Iň esasy zat dostluk, agzybirlik, birek-birege bolan sylanşyk. Ine şu zatlar sözüň doly manysynda düýnki oýunda utmakdan, utulmakdan, gol salmakdan, gol saldyrmazlykdan öňde geldi. Bolmalysam şoldy. Futboldyr, bir gezek utarsyň, bir gezek utularsyň. Bu gezek biz utsak, indiki gezek olar utar.

Sözümiň ahyrynda bolsa düýnki futbola gelen agzalaryň hemmesine sag bolsun aýdýan. Talyplar.comlylara-da görkezen öwgä mynasyp oýunlary üçin aýratyn sag bolsun aýdýan. Talyplar.comlylarda kimiň kimligini tanaba ýetişmedik. Nesip bolsa barýaka tanyşylarda. Ýene-de ýaşyl meýdançalarda duşuşyp duralyň diýen umyt bilen, şu uzyn teksitimiň soňuna nokat goýmakçy. Köpräk samrap ýadatdymam öýdýän.
Sag boluň.

Goşmaça: http://talyplar.com/15127-talcom6-12ertircom.html

Bellik Ses berlişik ýalňyş gitdi, doly çykmady. Ady ýazylmadyk agzalar gaty görmersiňiz diýip umyt edýän.

Man of the match?

Leonardoo (Talyplar.com)(12%, 5 adam)

MGazak (Ertir.com)(7%, 3 adam)

Ata (Talyplar.com)(12%, 5 adam)

Gudrat (Ertir.com)(12%, 5 adam)

Şahriýar (Talyplar.com)(0%, 0 adam)

Wyždanyň Sesi (Ertir.com)(7%, 3 adam)

NotýetPerfect (Talyplar.com)(2%, 1 adam)

Oppiş (Ertir.com)(17%, 7 adam)

Broker (Talyplar.com)(5%, 2 adam)

ChemicalMan (Ertir.com)(20%, 8 adam)