"Bolmasa" - keýpine diňleýän aýdymym.

Nury Kasoý pahyryň "Bolmasa" diýip aýtýan bir gowy aýdymy bar (Aslynda Nurydan başga-da birtopar bagşylar aýdýar bu aýdymy). Bilýäňizmi şo aýdymy? Özümä halaýan. Ýaman manyly aýdym. Awtory şahyr Aga Teke. Köpüňiz-ä bilýänsiňiz, bilmeýänler üçin aşakda şo goşgyny hem-de Nury Meredowyň şahyr Aga Tekäň sözlerine ýerine ýetiren ýene-de bir-iki sany aýdymynyň sözlerini, ýagny, halkyň arasynda halanyp diňlenýän aýdymlardan ýazmakçy:

"Bolmasa"
Saglyk bolar bu durmuşyň gözbaşy,
Dünýäň dardyr sagat janyň bolmasa.
Adam doýmaz berseň müň dürli aşy,
Saçagyňda bugdaý nanyň bolmasa.

Akyl-paýhas gerek adamkärlige,
Sylag-hormat gerek agzybirlige,
Dostlaşyp ýüz ursaň hilegärlige,
Sylamazlar sözde çynyň bolmasa.

Ýüregiň ak bolup halka garasaň,
Alkyş ýagar toý, ýasyna ýarasaň,
Lukman bolup syrkaw halyn sorasaň,
Dert ýeňlemez derman sözüň bolmasa.

Mydam gulluk etseň ýagşy niýete,
Eýe eder at-abraýa, döwlede,
Agzybir maşgalaň dargar her ýere,
Akylly, aksakal ulyň bolmasa.

Aga diýr, aýby ýok garyp bolanyň,
Beter barly bolup garyp öleniň.
Doýurmaz diläniň, mugt alanyň,
Rysgal ojagynda paýyň bolmasa.

"Garratma meni"
Hemmäni garradan, eý, köne dünýä,
Jahany synlaýyn, garratma meni.
Göwnünde galmasyn hiç-hili kine,
Ýaş kimin ýaşaýyn, garratma meni.

Razy edip ene-ata, gaýyny,
Saýlap aldym gözelleriň aýyny.
Ogul-gyzyň, agtyk-çowluk toýuny,
Erkana göreýin, garratma meni.

Bölek-bölek bulutlaryň göçüşin,
Dag jereniň çeşmeden suw içişin,
Toýnak gurap gökden durnaň uçuşyn,
Erkana synlaýyn, garratma meni.

Dünýeden doýmadym, ynan sözüme,
Um suwundan guýmasan gara gözüme,
Watanmyň topragyn sürtüp ýüzüme,
Erkana synlaýyn, garratma meni.

Her kim razy ýüz ýaşasa azyndan,
Aýyrman ilinden, saçak, duzundan.
Aga aýdar, Gul babanyň sazyndan,
Köp lezzet alaýyn, garratma meni.

"Ýetende"
Ýagşysy köp bolar ýagşy zamanyň,
Beýik akyldarlar tagta ýetende.
Ärden beýik mertebesi zenanyň,
Namysyn gorasa bagta ýetende.

Agzybire adam batyrnyp bilmez,
Hilegär neşekeş gazanyp ýetirnip bilmez,
Bet asylly döwlet göternip bilmez,
Sama bolar, agzy aşa ýetende.

Diýlene ynanma ýetirmän gözüň,
Näkese ynansaň gyzdyrar ýüzüň,
Dostuň adam bolsa, hakykat sözüň
Güýji sildir uly ile ýetende.

Ýüzüni öwür mekir ara kişiler,
Ýamanlyga begener görüp kişiler,
Ilden aýra düşen garyp kişiler,
Gaýtam dünýä geler ile ýetende.

Bet niýet gybatkeş adam satanlar,
Agzybir ojaga awy gatanlar,
Hile bilen köp adamy çatanlar,
Toba gelmez başy göre ýetende.

Derýa topukdandyr mes adam üçin,
Mukaddes zat ýokdur pis üçin,
Aga teke, göwni pes adam üçin,
Hemmeler deň ildir käre ýetende.