Heleý göreşi barada...

Aslynda nähili bolmalydygyny we näme maksat bilen edilýändigini, ideal ýagdaýlarda nähiliräk ýerine ýetirilýändigini menem şu gün Dildar gelnejäň bize ýetiren Berdi Kerbabaň poemasyndan bilip galdym. 

Indi eger dogry düşünen bolsam şeýleräk bolmaly - Şol güne çenli gyz bolup gezen we saçyny öňüne atyp gezen gyz indi gelin bolandygy üçin saçyny yza atmaly bolýar. Tahýasyny-gupbasyny çykaryp gelinleriň geýýän başgabyny (börük) geýmeli bolýar. Şu prosese baş salmak diýilýän bolmaly. Bu ýagdaýy isleýän we talap edýän heleýler (ýaşlary orta ýaşaşan gelnejeler we daýzalar) bir tarapda, bu ýagdaýy islemeýän we joralaryny gorajak bolýan gyz-gelinler (juwan zenanlar) bir tarapda, iki taraply bir göreş bolýan bolmaly. Netijede daýzalar ýeňiji bolýan bolmaly. Şu ýalňyşmasam ideal -heleý göreşi- bolmaly. 

Bizde nähili boldy - Ilki bilen işikde bir ýasama ring emele getirdiler. Öýde başga ýorgan-düşek galdymyka diýdirjek derejede kän ýorgan-düşek serdiler. Soňra kilosy we erjelligi boýunça biri birine deňeçerräk gelinlerimiz we gyzlarymyz jüp jüp boldular we orta goýulan baýraklar ugrunda göreşdiler. Baýraklar üç-bäş manat aralygyndady, bilemok ýaglyk-paglyk berlenem bolsa, üns bermändirin. Agalarymyň ýetişip barýan gyzlarynyň ikisi öz arasynda ýedi rounda çenli göreşdiler, sebäbi oglanlardan biri bularyň köpräk göreşerini islän bolmaly-da, bäş dollar baýrak goýdy. Bu dollar bolsa ýedi roundlap işledi.

Uly agalarymdan biriniň çykan gyzy, men deň duş, üç çaganyň enesi, tüweleme daýaw gelindigini ençeme gezek subut etdi. Ony ýykyp bilen bolmady. Kakamyň jigilerinden horajyk bedenli pylan ejemiz birnäçe gezek arkadan duýdurman topulsa-da gelin her gezek ony aňsatlyk bilen aşagyna aldy. Netijede baş salýançy we jemi birnäçe ýüz müň manatlyk baýragyň eýesi, bu üç gelniň ejesi gelin boldy. 

Gelne telpek geýdirip daşyndan öýmemi, ýüpmi bir zat bilen maňa çekdirdilerem, ýalňyşmasam gupbasyny ýykmak maksady bilen bolmaly. Birinji we ikinji gezek ýuwaşlyk bilen çekdim dözmezçilik edip, ýüp elime geläýdi. Üçünji gezek gatyrak çekdim, Gülnar yza dogry tas ýykylýardy. Boldy onsoň ýene kowdular meni.

Bolany, gören eşidenim şular.
Saglygyňyz...