Adam alaýhyssalamyň topragynyň alynmagy

Allatagala özüniň ezel erk – islegi bilen Adamy ýaratmaklyga niýet etdi.
Allatagala: “Men Adamy ýaratjak” diýende, hemme zatlar: “Ony menden ýaradar” diýip tama etdiler. Asman: “Men hemme zatdan belentdirin, altyn: “ezizdirin”, derýa: “haýbatlydyryn”, dag “kuwwatlydyryn”, ýagny ähli zat özüniň artykmaçlygyny mahabatlandyrdy. Emma ýer: “Men hemme zatdan ejizdirin. Men bir aýak astyndaky hory – zar gara ýerdirin. Elbetde, Allatagala Adamy menden ýaratmaz” diýdi. Elgaraz, ýer kiçigöwünlilik etdi, galany bolsa tekepbirlik etdi. Hudaýtagaladan: “Men Adamy ýerden ýaradaryn” diýen bir owaz geldi. Kiçigöwünligi üçin Ol Adamy ýerden ýaratdy.
Ol topraga: “Eý, toprak! Men senden bir halk ýaratjak. Olaryň käbirleri meniň emrime boýun sunarlar, beýleki birleri bolsa dogry ýoldan azaşyp, günä işleri ederler. Men boýun sunanlary jennete, günäkär bolanlary bolsa dowzaha salaryn” diýdi. Toprak: “Eý, Taňry! Sen: “Olaryň käbirini jennetiň nazy – nygmaty bilen sylap hormatlaryn” diýýärsiň. Olar hoşal we şadyman bolarlar. Sen: “Olaryň käbirini oda salaryn” diýýärsiň. Men bu ýagdaýdan gaty gorkýaryn” diýip ahy – zar çekdi.
Allatagaladan Jebraýyl alaýhyssalama: “Ýer ýüzünden bir gysym toprak alyp gel” diýen perman boldy. Hezreti Jebraýyl alaýhyssalam toprak almak üçin ýere geldi. Ýer zar – nala edip: “Eý, älemleriň hökümdarynyň ilçisi! Allatagala sizi maňa ilçi edip iberipdir. Men beýik mertebeli Taňrydan: “Siz menden bir zat aljak bolýarsyňyz. Siziň ondan ýaradan zadyňyz ertir oda köýer” diýip aman dileýärin. Siz meniň halyma rehim ediň. Menden toprak almaň” diýdi. Hezreti Jebraýyl alaýhyssalamyň Ýere rehimi gelip toprak alman, yzyna döndi. Allatagaladan: “Eý, Jebraýyl! Sen näme üçin toprak getirmediň?” diýen owaz geldi. Hezreti Jebraýyl: “Eý, Taňrym! Men seniň rehmetiňe umyt baglap, toprak alman geldim. Meniň Ýere rehimim geldi” diýdi. Allatagala bu işi Hezreti Mikaýyla buýurdy. Ol hem Ýere rehimi gelip, Allatagalanyň rehim – şepagatyna bil baglap, toprak alman yzyna döndi. Allatagala bu işi Ysrapyl alaýhyssalama buýurdy. Ysrapyl alaýhyssalam hem Ýeriň ahy – nalalaryna rehimi gelip, toprak alman yzyna dolandy. Soňra, Allatagala bu işi Hezreti Ezraýyl alaýhyssalama buýurdy. Ezraýyl eglenmän, toprak almak üçin ýer ýüzüne geldi we: “Eý, Ýer! Sen Taňrynyň emrine boýun bolman, günäkär bolduň. Men Taňrynyň hökümi nähili bolsa hem, şony berjaý edýärin. Sen Allatagalanyň permanyny üç mertebe bitirmediň. Indi senden ýaradylan kişiler tiz pursatda günäkär bolarlar” diýdi. Ol dürli ýerden bir gysym toprak aldy. Ol alnan toprakda ak, gyzyl, sary, ýaşyl, gök, reňk, ýumşak, gaty, arassa, şor, datly, ajy – görnüşleri bardy. Şol sebäpli adam ogly we gyzy dürli häsiýetli boldy. Ýer şeýle bir ýyglady, onuň agysyna ýeriň ýaýlalary, derýalary, daglary – düzleri ýyglaşdylar. Ýeri köşeşdirmek üçin: Allatagaladan: “Eý, Ýer! Sen köp nala etme! Biz senden bir zady aldyk. Onuň ýaman bir güni bolanda, ýagşy edip saňa getirip bereris. Biz bir gysym toprak aldyk, ony köp edip gaýtaryp bereris. Ony saňa bu haldan ýagşy edip bereris” diýen owaz geldi. Hezreti Ezraýyl topragy alyp, Allatagalanyň dergähine geldi. Allatagaladan oňa: “Eý, Ezraýyl! Ýer senden pena dilemedimi? Ol nala kylmadymy?” diýen bir owaz geldi. Hezreti Ezraýyl alaýhyssalam: “Eý, Taňrym! Ähli ýer ýüzi nala etdi, men oňa garamadym. Men diňe seniň permanyňy tutdum. Seniň ýalkawyň ýanynda ejiz bendäniň näme ygtybary bolar?” diýip jogap berdi. Allatagala: “Onda bu halklaryň ruhlaryny alyjy sen bolarsyň” diýdi. Hezreti Ezraýyl alaýhyssalam: “Eý, Taňrym! Bigünä pygamberler, weliler bardyr. Olaryň hemmesi meni duşman tutarlar. Hemme jandarlara ölümden ýaman zat bolmaz. Men hemmelere ýaman görünsem, ne alaç ederin?” diýdi. Allatagaladan: “Eý, Ezraýyl! Men olara köp dertleri bererin. Olaryň biriniň ölümi otda, biriniň ajaly suwda bolar. Men olaryň ölümine köp sebäpleri bererin. Olar ölümlerini şol sebäplerden görerler. Senden görmezler. Olar seniň özüňi hem görmezler” diýip, bir owaz geldi.