HYÝALYM

Dünýä hödür edip sahy badasyn,
Ham-hyýallaň şerbetini süzdürer.
Geler Aýa eliň degrip gaýdasyň,
Ene ýerden aýagyňy üzdürer.

Gül ömrüňi geçirersiň ylgaşlap,
Hyýal içre öz eliňde erk bolman.
Ýüzersiň sen süýt kölüni gulaçlap,
Gowy ýeri, çykýaň ondan gark bolman.

Käte-käte jomart kalbym talanyp,
Boş çykýaryn arzuw-hyýallarymdan.
Käte-käte çyn dostlardan aldanyp,
Çürkenýän il-günden aýanlarymdan.

Weşeň-weşeň baýlyk berme, hyýalym,
Meni ýagşylara duşursaň bolýar.
Al-asmanda gezsem, kyn geçer halym,
Basymrajyk ýere düşürseň bolýar.

"Gowy gün"

Maňa iki ömür berme-de, ykbal,
Şu ömrümde namart etmeseň bolýar.
Bolmaýyn bimessep, binamys, betpäl,
Ýamanlyga jomart etmeseň bolýar.

Dünýe gözel, ýagşy arzuw-pällerde,
Aýdym bolýar päk ýüregiň yhlasy.
Gowy günde, göwnüň joşan hallarda,
Begenjimden geliberýär aglasym.

Sona ÝAZOWA