Gysgajyk hekaýalar...

📃 Gysga hekaýalar...

📝 Jeýn RID

📖 Ykbal

Bizde diňe bir çykalaga bardy, sebäbi gazabyň we eşretiň arasynda çigin-çigin bolan ykbalymyz, ähli zady başgaça çözer ýaly etmändi. Onda näme, täleýi bijä ynanalyň: ýüzi düşse – är–aýal bolarys, ýeňsesi düşse – ömürlik aýrylyşarys. Teňňe oklandy. Ol zyňňyrdady, pyrlandy we togtady. Ýüzi. Biz gözlerimize ynanman, oňa aňkaryldyk.
Soňra ikimizem: “Belki, ýene-de bir gezejik?” diýdik.

📝 Ron BAST

📖 Ýokary bilim

- Uniwersitetde, biz diňe oturyp, jalbar sürtdik – diýip, Jennings hapa ellerini ýuwup durşuna aýtdy – Bular ýaly serişde tygşytlamalardan soň, olarda size bilim bermäge ýagdaý galmaz, diňe baha goýarlar, hemme zat öz nobatyna gider.
- Onda siz nähili okadyňyz?
- Biz-ä okamadygam. Ýogsa-da, meniň nähili işleýänimi görüp bilersiň.
Şepagat uýasy gapyny açdy.
- Lukman Jennings, size operasionnyda garaşýarlar.

📝 Tina MILBERI

📖 Aýgytly pursat

Zenan, öz zyndanynyň gapysynyň assyrynlyk bilen ýapylýandygyny eşitdi. Azatlyk müdümilige ugrady, indi onuň ykbaly kesekiniň eline geldi, indi oňa azatlygy görme ýokdy. Onuň kellesine, häzir uzaklara uçyp gitsediň diýen ýaly paýhassyz pikirler gelip başlady. Ýöne, indi muňa hiç-hili alajyň ýokdugyna ol düşünýärdi.
Zenan ýylgyryp öýlenjek ýigide seretdi-de, täzeden gaýtalady: “Hawa, men razy”.

📝 Barnabi KONRADAŞŞE

📖 Hassahanada

Zenan awtoulagyny gazap bilen sürüp barýardy. Eý hudaý, ýetişip bolaýsady. Ýöne lukmanyň ýüzüne seredip, ol hemme zada düşündi. Zenan möňňürdi.
- Ol özüni bir bilýärmi?
Lukman ýumşaklyk bilen:
- Missis Allerton, siz bagtly bolsaňyz gerek. Onuň iň soňky sözleri: “Men seni söýýärin, Meri” boldy – diýdi. Zenan lukmana seretdi-de, aňyrsyna bakdy.
Judit sowuk-sala gürledi:
- Sag boluň.

📝 Houp A. TORRES

📖 Bagda

Zenan bagyň içinden, onuň özüne tarap ylgap gelýänini gördi.
- Tina! Meniň güljagazym! Meniň ömrümiň manysy!
Ol ahyry bu sözleri gorkman aýtdy gerek.
- Wah, Tom!
- Tina, meniň güljagazym!
- Wah, Tom, men hem seni söýýärin!
Tom ylgap onuň ýanyna geldi—de, dyzyna durdy we çalasynlyk bilen ony gyra süýşürdi.
- Meniň güljagazym! Sen meniň eý görýän rozamy basypsyň!

📝 Robert TOMPKINS

📖 Hakykatyň gözleginde

Ahyryn, gugaryp oturan obajykda onuň gözlegleri tamamlandy. Çatmada, oduň başynda Hakykat otyrdy. Ol hiç haçan beýle garry we betnyşan kempiri görmändi.
- Siz – Hakykatmy?
Garry, küýkerip giden kempir başyny atdy.
- Aýdyň bakaly, indi men älem—jahana näme aýtmaly? Nähili habar ugratmaly?
Kempir oda bir gezek tüýkirdi-de:
- Olara meniň ýaşdygymy we owadandygymy aýdaýyň – diýdi.

Terjime eden Kakamyrat Geldiýew