Behiştdaki waka (hokman oka gyzykly tymsal)

Düýşümde behişte düşenmişim. Ine, bir Perişde peýda boldy. Ol by ýerdäki zatlar bilen meni tanyşdyrmaga başlady. Biz ýöräp barşymyza bir uly zala ýetdik. Ol ýeri Meleklerden ýaňa hyň berýärdi. Meniň Perşdäm aýak çekdi-de, şeýle diýdi:
- Ine, bu – Alyş Bölümi. Biz bu ýerde adamlaryň öz doga-dileglerinde Hudaýa ýalbaryp eden mynajat-dileglerini, haýyşlaryny kabul edip alýarys. Men töweregime göz aýladym. Bu ýerde iş gaýnap-joşýardy. Perişdeler dünýäniň çar künjünden adamlaryň ýollan dileglerini tertibe salýardylar. Olaryň arasynda küt-küt kagyzlar hem, azyrak sahypalylar hem, kiçijik kagyza edilen ýazgylar hem bardy. Soňra biz uzyn däliziň ugry bilen ikinji bölüme barýançak ýöredik. Şonda Perişde maňa şeýle diýdi:
- Bu ýeri bolsa Gowşuryş we Gaplaýyş Bölümi. Bu ýerde adamlara dileglerine görä, Hudaýyň Peşgeşi paýlanýar we olara ugradylýar. Bu ýerde-de işiň juda gyzgalaňly gidýänligi meniň ünsümi çekdi. Perişdeleriň gaty köp sanlysy bu ýerde zähmet çekýärdiler. Sebäbi adamlar köp zat haýyş edýärler, dilegleriniňem çägi ýok, şoňa görä-de, ýere ugratmak üçin taýýarlanylýan zat köpdi. Ahyry biz uzyn däliziň gutarýan ýerinde, kindiwanja otaga gecilýän gapynyň bosagasynda saklandyk. Meni iňňän geň galdyran ýagdaý bolsa ol ýerde diňe ýekeje Melegiň oturmagydy. Özi hem edere iş tapman, gamgyn halda oturmagydy.
- Bu bolsa – Minnetdarlyklar (Şükür!) Bölümi – diýip, ýanymdaky Perişde oňaýsyz halda çalaja pyşyrdap aýtdy.
- Bu ýerde iş ýok-la. Munuň sebäbi näme? – diýip soradym.
- Nätjek, ýagdaý şeýle-dä – diýip, Perişde uludan dem aldy.
–Adamlar dileg eden zatlaryny alyp, maksada ýetensoňlar, muňa şükür edip, minnetdarlyk bildirýän kişiler juda az.
- Minnetdarlygy we Hudaýyň Peşgeşini alanlygyň baradaky habary nädip ýollamaly? – diýip, men sowal berdim.
- Ondan aňsat iş ýok – diýip, Perişde jogap gaýtardy
– Diňe: “Hudaýa şükür – şükür alhamdülilla!” diýäýmeli.
- Adamlar Hudaýyň Peşgeşini alandyklary baradaky habary haýsy ýagdaýda ýollamy? – diýip, ýene soradym.
- Garbanara bir zadyň bar bolsa, beden örtgiň bolup, ýalaňaç bolmasaň, üstüňde tünegiň –ýatara ýeriň bar bolsa, onda sen bu dünýädäki adamlaryň 75%-den baýsyň.
- Eger bankda, gapjygyňda, aňryňda biraz puluň bar bolsa, onda sen eýýäm dünýäniň gurply adamlarynyň 8%-iniň içindesiň.
- Eger bu säher sag-aman oýanyp, özüňi hassa duýmaýan bolsaň, onda sen şeýle säheri gaýtadan görmek nesip etmejek ençeme adamdan has bagtlysyň.
- Eger sen hiç haçan uruş belasynyň içinde bolmadyk bolsaň, türmede bendiligi, gynamalary we açlyk jebrini görmedik bolsaň, onda seniň bu dünýädäki 700 million adamdan ozan kişiligiň hakykatdyr.
- Eger ataň-eneň aýatda diri bolup, agzybirlikde bile ýaşaşyp ýören bolsalar, onda sen örän seýrek adamsyň.
- Eger sen başyňy dik tutup, ýylgyryp, aýgytly gadam urup bilýän bolsaň, onda sen adaty kadadan ýokardasyň, şübhe, ýaýdanjaňlyk we lapykeçlik laýyna batan kişileriň ählisi üçin täsin şahsyýetsiň.
- Eger sen şu ýazgylary okap oturan bolsaň, onda sen beýle mümkinçilik döreýän 1% adamlardan birisiň.
- Bolýar! Ýeri, indi näme? Men nämeden başlamaly?
- Eger siz bu haty okaýan bolsaňyz, eýýäm şükür edip, minnetdar bolara esas bar ahbetin.
Sebäbi bu dünýäde 2 milliarddan gowrak adam asla hat okap bilenok. Edeniňe şükür, şükür alhamdülilla!

Internet sahypalaryndan.