Meşhur türkmen satirigi Poşalak aradan çykdy

Poşalak ady bilen halk içinde giňden tanalýan Türkmenistanyň halk
artisti Gurbannazar Atakgaýew uzaga çeken agyr keselden soň 6-njy iýulda
Aşgabatda 77 ýaşynda aradan çykdy. Merhumyň jaýy jennetden bolsun.

Atakgaýew 1934-nji ýylda öňki Bäherden etrabynyň Durun obasynda dünýä
inýär. Döredijilik bilen ýaşlygyndan gyzyklanyp başlaýar. Atakgaýew
geçen asyryň 50-nji ýyllarynda Daşkendiň Sungat institutynyň aktýorçylyk
bölümini tamamlaýar. Ol geçen asyryň 60-njy ýyllarynda türkmen
telewideniýesinde režissýor bolup işläp başlaýar we tä 1993-nji ýyla
çenli şol ýerde işleýär.

Atakgaýew Poşalak ady bilen il içinde meşhurlyk gazanan artist.
1970-90-njy ýyllar aralygynda Gurbannazar Atakgaýew Türkmenistanyň halk
artisti Juma Ýazmyradow bilen bilelikde Poşalak bilen Topalak lakamy
bilen Magtymguly Myşyýewiň köp sanly satiriki sahnalarynda çykyş etdiler
hem halk köpçüliginiň söýgüsine mynasyp boldular. Bu iki artist diňe
bir resmi çykyşlarda däl, toýlarda-da halka hezil beripdiler.

Atakgaýew 70-80-nji ýyllarda Türkmen telewideniýesiniň taýýarlaýan
satiriki sahnalarynda, ylaýta-da “Ýartygulak” satiriki teležurnalynda
belli artistler Akmyrat Bäşimow, Tagan Saryýew, Oraz Hojaýew, Ene
Allanowa we başga-da köp artistler bilen bile çykyş etdi. Ol sungat
äleminiň diňe satira we ýumor žanrynda däl, beýleki žanrlarynda-da ýatda
galyjy, täsirli obrazlaryň ençemesini dörertdi. Onuň “Gaýgysyz
Atabaýew” filminde döreden bolşewiklere garşy oppozisiýada durýan
Ryskulow obrazy köp tomaşaçynyň ýadyndadyr.

Ol telespektakllarda-da köp gahrymanlaryň keşbini janlandyrypdy. Onuň
“Ata we ogul”, “Gara bägüller” film-spektakllarynda döreden obrazlary
juda şowly çykanlygy hem ynandyryjylygy bilen tapawutlanypdy. Bulardanam
başga Atakgaýew filmleri türkmen diline geçirmäge, dublýaža-da köp
gatnaşdy. Ol belli syýasatçylary türkmen dilinde seslendirdi.

Garaşsyzlyk ýyllary Atakgaýew berk gadaganlyga düşürildi. Resmi
çykyşlary ýatyryldy. Şorta sözeleriniň aşa ýitiligi üçin ony telewizion
gepleşiklerdenem gyraklatdylar. Emma, muňa garamazdan, Atakgaýew ýiti
hem çeper sözi bilen halk arasynda, toýlarda çykyşyny dowam etdirdi. Ol
halky, halk ony söýýärdi.

Atakgaýew öz puluna Durun obasynda metjit gurdurdy. Gurbannazar
diýselerem, Poşalak aga diýip ýüzlenselerem, hä berýän Atakgaýew 7-nji
iýulda dogduk obasy Durunda jaýlandy. Ýene bir bellenmeli ýagdaý:
G.Atakgaýewiň dünýäsini täzeländigi barasynda Türkmenistanyň
köpçülikleýin habar serişdelerinde hiç hili maglumat berilmedi.

Meşhur artist, hoşgylaw Gurbannazar Atakgaýew ony tanaýan, oýunlaryna
tomaşa eden adamlaryň ýüreklerinde baky ýaşar. 13-nji iýulda merhumyň
ýedisi bellenýär. Merhumyň jaýy jennetden bolsun!