Ylymyn taryhy hakynda gysgaca

Häzirkizaman şertlerinde adamzat jemgyýetiniň ilerläp ösmeginiň esasy serişdeleriniň biri bolan ylmyň döremeginiň we kemala gelmeginiň köp müň ýyllyk taryhy bar. Ylmyňelementleri,aýry-aýry ylmy bilimler baryp ençeme müň ýyl ozal gadymy Müsürde, gadymy Mesopotamiýada,gadymy Hindistanda, gadymy Hytaýda,
gadymy Merkezi Aziýada, şol sanda gadymy Türkmenistanda emele gelipdir.
Adamzat jemgyýetiniň ilkinji taryhy eýýamynda – ilkidurmyş obşina jemgyýetinde esasan dürli rowaýatlatyň we hyýaly garaýyşlaryň toplumy bolan mifologik aň agalyk edipdir.
Mifologik aň ilkidurmuş eýýamynda jemgyýetçilik aňynyň uniwersal formasy, hemme zady öz içine alýan görnüşi bolupdyr. Mifilogik aň dünýäniň, Günüň, Aýyň, ýyldyzlaryň , beýleki asman jisimleriniň, Yeriň, daglaryň, deňizleriň, adamyň, haýwanlaryň, ösümlikleriň gelip çykyşy baradaky rowaýatlary, hyýaly düşünjeleri, dini garaýyşlary öz içine alypdyr. Şonuň bilen birlikde, adamlar özleriniň durmuşdaky isleglerini kanagatlandyrmak üçin awçylyk, maldarçylyk, ekerançylyk, hünärmentçilik, binägärçilik, haryt alyş-çalşygy, söwda bilen meşgullanypdyrlar. Şonda dörän ýönekeý tejribeleýin bilimler dürli mifler, rowaýatlar, hyýaly garaýyşlar bilen utgaşdyrylypdyr.
Dürli ýurtlarda, dürli halklarda dörän rowaýatlarda, hekaýalarda, ertekilerde köphudaýlylyk dinleriniň bolandygy, hudaýlaryň hem edil adamlar ýaly, hökümdarçylyk ugrunda özara göreşendikleri beýan edilýär. Meselem, gadymy Gresiýada Zews iň ýokary hudaý, ähli hudaýlaryň hökümdary ýaly suratlandyrylýar. Her bir tebigy hadysanyň, ýagyn-ýagmyryň, ýeliň, her bir hünäriň, ösümlikleriň, haýwanlaryň öz hudaýy bar hasaplanypdyr. Dünýäniň heläk bolmagy, ahyrzaman baradaky, onuň ýene gaýtadan döremegi hakyndaky mifler hem bolupdyr.