Kerim agadan öz asryny aşyp gelen setirler

Öz ýüregime jüňk bolup oturan bu setirleri siz bilen paýlaşaýyn diýdim. Öz döwrüne niýetläp ýazanam bolsa biziň döwrümize has degişli ýaly görenim üçin paýlaşaýyn diýdim.

Owadan gyza

“Owadan sen,
Owadan sen,
Owadan...”
Bu aýdym ýaňlanýar he säher,her şam.
Ýöne bu gürrüňim aýdym hakda däl,
Sen hakda,sen hakda,gara gaş uýam.

Şol aýdym aýdylsa — keşdäňi taşlap,
Kitabyňy ýygnap,saçlaryň çöşläp,
Seredip ýokary, äňedip aşak,
Kä yzyňa ýöräp, käte öňüňe,
Aýnaň içindäki keşbiňi ogşap,
Birine pyşyrdap berýärsiň salam,
Birinden pyşyrdap alýarsyň salam.
Soň bolsa “Eje jan,men owadanmy?”
Diýäýjek,
diýäýjek
diýäýjek bolýaň.

Asyl bir gezeg-ä diýdiň hem uýam!
Şond garry ene öz balasyndan
Ýa-ha hoşal,ýa-da nägile bolup,
Ogşapdy gözleriň pyýalasyndan

Sen bolsa ol posaň manysyn çözmän,
Ýene öz ýoluňa bolduň rowana.
Ne gözel ýigitler yzyňdan garap,
Biri däli boldy,biri diwana.

Bolmajagam bolsun, şeýle bir saçlar—
Ölçemäge ýetmez kelte gulaçlar.
Şeýle bir gabaklar,şeýle bir dişler
Baksaň-ertä galjak şu günki işler.

Şeýle bir göreçler,seýle bir gaşlar
Üç gün bakyp dursa,ölmezdi açlar.
Şeýle bir ýaňaklar—reňki çirksiz,
Şeýle bir barmaklar—boguny süňksiz.

Gürrüňem etjek däl kirpikler hakda,
Degse deşjek (taňrym, penaňda sakla!)
Ýöne men şonda-da

Owadanmyň, däl—
Entek belli bir zat aýdyp biljek däl.
Bir topar ot-suwdan geçeniňden soň,
Ýetmiş ýanyp,segsen öçeniňden soň,

Ajyny-süýjini içeniňden soň,
Bir ýigidi saýlap-seçeniňden soň,
Seçeniňden soň hem 
ol ýigit bilen
Nije menzil ýoly
Geçeniňden soň—

Men diňe şondan soň,
Şondan soň diňe,
Owadanmyň, dälmiň—
Aýdaryn saňa.

Çeşme. Öňem bir gezek teswirlerde ýazylypdyr, men-ä mowzuk bolup açylanyny dogry kabul etdim.