MENIÑ ÇEKINÝÄN ÜÇ ZADYM

MENIÑ ÇEKINÝÄN ÜÇ ZADYM
 
Üç zatdan çekinýän sözlesem rastym
Ondan bar erkekler çekinse gerek.
Şu ýerde otur-da, diñlegin, dostum
Bolmanka bar eden işim biderek.
 
Köpleriñ sözüne seretseñ, eger
Olañ bary duranja bir gahryman.
Aýal taýpasyna ýüz bermezlige
Dillerinde tütäp duran ähdi bar.
 
Ýöne şol gün geler, bolar öý-goşly
Ýer-göge sygmaýan gahryman ýigit.
Göýä taryp edip ýazýandyr goşgy
Hem gelnine ter gül berýändir ýygyp.
 
Sözi-sözdür, gözi-gözdür aýalyñ,
Şeýle bolýar bu tetelliñ täleýi.
Şudur: ilki meñ üstünde durýanym
Rugsat berseñ ikinjä geçäýeli.
 
Ikinji sözümi diñläýin diýseñ
Bagtly bolmak üçin dünýe-mal ýagşy.
Bagt beýle arzanlaýdymy, eýsem?
Söýginiñ on müñe satylşy ýaly.
 
Bilýän, añsat däl bulary diñlemek,
Diñe diñlemek däl, aýdaýmagam kyn.
Dünýe gerek, baýlyk gerek, pul gerek...
Bu dünýede bagtly ýaşamak üçin.
 
A men, bu ideýa çykýaryn garşy
Hem çekinýän bir haýyrsyz baýlykdan.
Saçlarymy ýuwsa baharyñ ýagşy
Paýymy alaryn tylla balykdan.
 
Gulak goýsam wyźdanymyñ sesine:
Birin magtap goşgy ýazmak gowy däl.
Arşa çykmak laýyk däldir her kime,
Meniñ üçin beýle goşgy- goşgy däl.
 
-Diñe mynasyplar arşa göterler!
-Bu diýýäniñ dogry bolmagam mümkin,
Ýöne köpler oña kömek ederler
Arşdan basymrajyk düşmesi üçin.
 
Men çekinýän şu zeýilli şçhratdan
Hem, goý, birin magtap ýazmaýyn şygyr.
Ähli ýazanjamy bilsem-de ýatdan,
Olary okamak düşmesin agyr.
 
Bu-da meñ iñ soñky çekinýän zadym,
Şulañ howplulygnam boýnuma alýan.
Maşgalañ, baýlygyñ, ýeñil şöhratyñ
Ýükün götermäge medet ber, Allam!
1997