Gülme goňşyňa...

      Şu gün iş ýerimizden uly treýler maşynlarynda ýük daşadyk (konteýnerler, wagonlar,... ). Men hem bir maşynyň ýanyna gözegçi höküminde gitmeli boldum. Mundan ýola düşdik ir bilen, ýollar hem ýaramaz çagyl ýollar ýa-da gumy çykan, ulag hem ýükli bolansoň 30-40 km/s aňryk sürüp bolmasa-da göwresi uly bolansoň tozan baryny turuzyp barýas. Sürüji Alty aga ikimiz biziň deňimizden tozadyp geçen ýeňil maşynlara sögünip, aýak-allygyna aýnany ýapýas.     
      Şeýdip tozap baryşymyza obalaryň biriniň içinden geçmeli bolduk. Obanyň içinden çykyberemizde ýoluň gyrasy bilen gelýän gelin-gyzlar görüp Alty aga:     
      - Haý, siziň ýüzüňize çalan bezegleriňize bir "pudra" hem goşaly. - diýip, gapdallaryndan gülüp, tozanlap geçip gitdik. Olaram tozana gömülip galdylar.
      Aý, 1,5 sagatlardan, günortan nahara-da 1 sagat gijä galyp barmaly ýerimize bardyk mundan. Ol ýerdäki adamlar eýýäm naharlaryny iýip, günortan dynç alyşa çykypdyrlar. Aňyrdan biwagt gelen "myhmanlara" närazy seredip aşpez çykdy bir ýerlerden. Howa gowy bolansoň nahary daşarda edinmeli eken. Arassa meýdan, çöl hem indi janlanyp ugran wagty, özümizem itiň ajy, elimizi çalak-çulak ýuwup aý, mundan ýaňy bir naharlarymyzy öňümize alyp "Bissimilla" edip başladyk welin Alty aga "Haý, haaaý!" diýip arka tarapyma seredip gygyrdy. Yzyma seretsem, 2 metr töweregi yzyrakdan gaýtdy bir kiçiräk tüweleý tozan turuzyp, okaramyzy ýarty-ýurty elimiz bilen ýapyp-ýapmakak üstümizden geçip gitdi-de 3-4 ädim geçmäkä-de ýitip gitdi.
      Bu göz açyp-ýumasy salymda bolan waka geň galyp bir zat diýjek bolup agzymy açmakam, Alty aga:      - Gördüňmi, Döwletjan, Ýokardaky hemme zady görüp oturandyr görseň. Hälkije gyzlary tozana garanymyzyň gaýtargysy bu. Hemme zadyň hasaby bar, ine deňme-deň edip goýdy. - diýip, bir ýylgyrdy-da naharyna gaçan çöpleri aýyrmaga durdy.
      Ine, dostlar, şu gün şeýleräk bir waka bolup geçdi.
      Aslynda Alty aga şol ýerde gyzlara goşmaça "pudra" çalaly diýmäninde-de ol gyzlar şonsuzam tozana garylmalydy, ýokarda belleýişim ýaly ulagy haýal sürsegem ýollar ýaramaz, ulagyň göwresi bolsa uly, nädende-de tozaýar, ýöne şol ýerde bir gülenimiz üçin almytymyzy hem aldyk şeýdip. Şu ýerden hem gülme goňşyňa, geler başyňa diýen nakyl tüýs ýerine düşdi.