SÖÝGI GAPYSY

Bu gapy girmedigi armanda goýýan gapy. Bu gapynyň söýeleri nurdan, işigi mähirden, gabsalary gül ýapragyndan ýasalan. Ondan zyýada megerem bu dünýede gapy ýokdur. Açykmy ýapykdygy bilinmez. Bu gapydan girenleriň yzyna çykasy gelmez. Mundan giren älemgoşarlaryň reňkiniň emele gelýän ýerini görjek ýalydyr. Göwnüne, guşlaryň ganatynyň ýelginine, ýer astyndaky däneleri gobsundyran ýyly ýagyşa öwrüläýjek mysalydyr. Döwüşe çyksa ýaraglary ýyldyrym, haýbaty gögüň gümmürdisi bolar. Ol gümürdi şeýle bir batlydyr hem şeýle bir näzik – kömelekleri elinden çekip ýerden çykarar, ýumurtgalaryň ýarylyp, jüýjeriniň ýagty jahany görmegine sebäp bolar. Pyntyklaryň pyntyklara, gülleriň güllere höwes edip açylýan bahary! Belki-de bu baharam yşkyň gapysyndan girip bahar bolandyr!
Menem bardym bu gapyny kakmaga. Ine-de gülýaprak gabsalar açyldy! Gabsalaryň ýeline tas arkan ýykylypdym. Söýeleriň nury gözümi gamaşdyrdy. Men diňe ütgeşik ýagtylygy görýärdim. Dünýe şeýle bir ýagtydy – ýagtylykdan başga hiç zat görünmeýärdi. Gözümi kölegeledeýin diýsem ne depämde, ne garşymda Gün bar. Diňe ýagtylyk, diňe nur! Suwa çümen kimin çümdüm nura! Agzymdan, burnumdan içime nur dolýardy. Meni indi saklajak güýç ýokdy. Saklamak nirede – ähli güýçler jemlenip meni öňe itekleýärdiler. Şeýle bir itekleýärdiler – ýöreýärkäm uçýardym. Ejizje kebelekleriň şeýle ýeňil uçup bilişleriniň syryna düşündim. Bilbilleriň nädip şeýle täsin saýrap bilýändikleri maňa aýan boldy. Neneň bulutlar Asmana göterilmesin, neneň Gün dogmasyn, neneň Ýer aýlanmasyn! Olar gudrata duçar bolanlar ahyryn!
Häzir ýüregimi Gök kimin gümürdedýän gursagyma ilkinji tirpildini salan gudratdy. Oldy meni söýgi gapysynyň işiginden ätleden. Belki-de mundan aňyrsy bahar paslynyň şalygy däl-de, uçut gaýadyr? Içime dolýan nur deňziň şor suwuna öwrülibem biler. Muňa aklym ýetýärdi, emma ýüegim düşünmeýärdi. Goý, biderek howatyrlanmalaryňy. Uçan guşdan per gaçmaz. Gunça ýarylmakdan gorksa gül açylmaz...
Gülem sensiň, gunça-da sensiň, guşam... Solup biljegem, ganaty döwülip biljegem. Ýok, bu, söýgi gapysyndan ätlänleriň gül ýüzi solup, ganatlary gyrylar diýdigim däl. Muny diýäýemde-de maňa kim ynanjak? Çünki beýle gapydan... Dogry, beýle gapydan ätlemegiň özi nämä degmeýär! Üstesine-de ganaty döwülen sen bolaýmalymy? Biraz seresap ätleseň, ýok her kesem seresap ätlejekdir, arman bu gapydan ätläňde ilkinji unudylýan zat seresaplylyk. Eger sen seresaplygy unudyp bilmedik bolsaň diýmek entek bu gapydan ätlän dälsiň. Onda bir aýagyň daşynda, bir aýagyň içinde bolup bolmaýar. Güle höwes eden eline tiken batjagynyň aldasyny edermi? Çünki gözüň güldedir, tikende däldir. Gaýta tersine, eşretiň muzduny töläp, awunasyň geler. Gülüň tikenem gözüňe ezizdir. Muny ýazan şahyr ýaly, her kimem „Ýar zülpüne degmek üçin darak kimin dilim-dilim dilinmäge taýýardyr.“
Arman, bu gapydan girenlerem armandadyr. Ondan aňyrda biwepalygyň gayasam bar. Aýralyk derdiniň gapysam garalyp dur. Ol gapylaryň açylyp açylmazlygy ýeke özüňe-de bagly däl. Emma islendik gapy açylsa günäkär özüň ýalysyň. Başyňdaky täji sypyryp özüň aýak astyna alan ýalysyň. Galan ömrüňe diňe sensiň ýazykly. Zyňylan daş saňa deger. Kimiň atynyň aýagy kürüme giden bolsa, şol sensiň. Her kimiň boýnunda halkasy, hiç kim gark bolmaz. Diňe sensiň ýapyşany saman bolup çykan. Diňe sen, sen, sen... Özüňe kypadaşlaryň arasynda-da ýene ýeke sen. Ganty döwük, ýüregi ezilen, gül meňzi soluk...
Bu gapy şeýle gapy, söýgi gapysy.