Gezelenç: Bangkok

Salawmaleýkimler.

Mundan, 1 aý öňräk kemaltm diýen agza, Tailanda gezelenç diýip blog açypdy. Aşagynda bolsa, dostlarym üçin açdym diýip ýazypdy. Garaz, şol dostlary bizdik we şonda maslahat beren ýerleriniň köpüsini gezdik, aýlandyk, Nazar bilen.

Bu gün, Bangkokdan suratlary paýlaşmakçy. Gezelenç diýip, köp wagtlyk galmadyk, 2 gün içinde esasy ýerleri aýlanyp çykdyk. Surata düşdik, gerek bolan zatlary satyn aldyk, garaz dynç almaga diýesim gelenok. Garaz, meniň Türkmenistandan ilkinji gezek daşyna çykyşym, şonuň üçin köp zatlar Türkmenistan bilen deňeşdirip aýdýandyryn. Meselem arzan, gymmat, gowy ýaly sözler. 🙂

Bangkok hakynda, geçenki blogda şäher porsy, yssy, dymyk we ş.m zatlary köp ýazylansoň, başda çekindim. Ýöne airportdan çykan badyma, hiçhili yssynyň, porsynyň ýokdygyna begendim. Howasy oňuşmazça däl, Türkmenistanyň tomusyndan gowy, giçlik salkynlaýar.

Silomcity otelde bolduk. Otel hem bahasyna görä gaty gowy. Geçenki blogda hem ýazylypdy, 2 adamlyk otag gijesine 30$ töweregi, 24 sagat mugt internet, şäheriň merkezinde.

Iýmit ýagdaýy, taksi ýagdaýy gaty arzan. Islän wagtyň, gije bolsun, gündiz bolsun islän zadyň tapdyrýar. Şäheriň birtopar ýerinde 7-Elevenler bar. KFC, Starbucks, McDonald's-dan hem ilkinji gezek naharlanyp gördim 🙂

Taksiler hem beýle gymmat däl, arzan diýseňem bolar. Taksiden başga, tuk-tuklar bar. Bahany öňünden gürleşmeli, näçe diýse ýarsyny aýtmaly, we ýene-de 5%-10% üstüne jedelleşip goşmaly, äkidýäler. Şäherde birinji gezek bolanym üçin, taksiniň ýerine tuk-tuka münmäge synanşdym. Sebäbi açyk howada, şäheri synlap, surata düşürip gelmegiň hem keýpi bar.

Başga birtopar supermarketleri bar. Islän zadyň tapdyrýar. Official Apple Store girmek nesip etdi. Bahalar orginal bahalar, hiçhili galdyrmak, üstüne goýmak diýilen zat ýok. Saýtlarynda görkezilen baha bilen deň. Eşik ýagdaýy hem şeýle. Belli markalaryň ählisi bar.

Garaz, işleri bir ýanly edip, Bangkokda ýaşamak planymda bar. Ýaşaýyş Türkmenistandakydan gaty arzan, şäheriň özi bizden gowy ösen, halky hem ýaman däl. Sorap-idäp görüşdirdik, kwartiralaryň aýlyk tölegleri 200-300$ töweregi. Bu baha bolmaga ýer, Türkmenistanda tapmak kyn has dogrusy. Ofis ýerler hem Türkmenistandan arzan. 500-600$ şäheriň merkezinden kiçiräk ofis ýerleri açmak mümkin.

Hökümet ýagdaýlary hakynda bolsa, has gysyp saklanylýandygy görünýär. Belki gysyp saklamak däldirde, hormatdyr ony bilmedim. Ýöne köp ýerlerde portreti asyk, otelde girelgede dur, özleri ir bilen gelip öňünde baş egip gidýäler. Ýene-de bir ýagdaý, 3D kino gitdik, film başlamagyndan ozal ýokarky başlygyň her ýerden kesilen-kesilen wideolary, arkadan bolsa gimnleri, herkim ýerinden turýar, soňundan otyryp film seredýäler. 🙂

Garaz, Bangkokda bolanyma ökünmedim. Gysgaça aýtsam, şäheri gaty haladym.