SÖÝGI WE JEZA

Gapynyň jaňy jyňňyrdady. Öýde özümden başga adamyň ýoklugy sebäpli baryp gapyny açdym. Görsem – Eziz dur.
- Salam, Ajap, içerik girsem bolarmy?
Men dilime gelen jogaby berdim:
“Göni gelen keýgiň iki gözünden başga aýby ýok” diýipdirler. Gelen bolsaň, geç.
Ol içeri girdi-de, kürsde oturdy. Elini maňlaýyna diräp, oýlanyp oturyşy onuň agyr ýüküň astyndadygyny aňladýardy. Adata görä, çaý goýdum. Ol birsalym oturandan soň ýuwduna-ýuwduna:
- Ajap, indi ýaşym birçene bardy, ýarawlygymyňam ugry ýok, meni eden günälerim üçin bagyşla, makul görseň, ýaraşaly. Maňa sensiz ýaşamak kyn – diýip özelendi. Men:
- Ýok, ol bolmaz – diýip pert jogap berdim.
Ol şonda-da ýerinden gozganmady, maňa bir zatlar düşündirjek boldy.
- Hä-äk, men seni ynjydyp gaty ýalňyşypdyryn. Görýäňä töweregimde hiçkim galmady, öz günümi özüm görmeli. Sen bir ýagdaýyma düşünäýmeli-dä.
Birmahalky hondan bärsi bolup ýören adam bu wagt müzzerip otyrdy.
- Ol wagtlar sen meniň ýagdaýyma düşünmändiň ahyryn. Indem azaryň ýetmesin – diýip, Ezize aklyna giç aýlanandygyny ýaňzytdym. Ol biraz wagt oturdy-da, çykyp gitdi. Onuň bizi taşlap gidenine 10 ýyl töweregi bolupdy. Öňki wagt bolanlygynda, Eziz gapa tarap ýönelende meniň ýürejigim sogrulan ýaly bolardy. Utanmalydyr hem öýtmän, yzyndan ylgardym…
… Biz ýokary okuw mekdebinde bile okapdyk, soňra bir ýerde bile işe başlapdyk. Men öz ýanymdan ony gowy görýärdim. Garamyk ýaly gözleri, nurly ýüzi, saçlaryny gelşikli edip timarlaýşy, gelin-gyzlara hormat sylagy oňa bolan duýgularymy köredýärdi. Ol meniň ýüregimde orun alypdy. Şonda-da Ezizi ýanýoldaş hökmünde göz öňüme getirmäge hakym ýokdy. Ol öýlenen, çaga-çugaly adamdy. Herhal, ýüregime köşeşmegi buýurýardym, ol hakda pikir etmezlige çalyşýardym. Bir gün işden soň ol:
- Ajap, öýe barýan bolsaň, ýör, ýol ugruna düşüreýin – diýdi.
Menem “Suw meýilli gurbagadyryn-da”, göwünjeň maşyna mündümde, yzky kürsüde oturdym. Ol meni öýümiziň ýanyna düşürmedi-de, şäheriň daşyna tarap tutdurdy, maňa birzatlar aýtjakdygyny syzdyrdy.
- Ajap, hossarlarym meniň islegime bakman, garyndaş gyza öýerdiler. “Ýaşaryn, öwrenişerin” öýtdüm. Bolmady, ykbal bizi aýra saldy. Onuň bileni-biteni pul, başga zat hakda gürleşip bolanok. Elteniňi az görýär. Men talyplykdan bäri seniň aşygyň. Seň boý-syratyňa guwanyp doýybilemok. Galan ömrümi seniň bilen dowam edesim gelýär – diýdi-de elimi eline alyp, ýuwaşlyk bilen gysdy.
Men dymyp otyrdym. Näme jogap berjegimi bilemokdym. Men okuwymyň 2-nji ýylynda durmuşa çykypdym, emma 2 ýyl ýaşap-ýaşamankak, adamym ýol heläkçiliginde ýogalypdy. Ondan bir gyzym bardy. Ýaş başyma ýeke galanyma gynansam-da, takdyra ten bermelidigine, sabyr-kanagatly bolmalydygyna düşünýärdim. Ýöne ýürekde döreýän duýgy ýaşyňa, ýagdaýyňa per berman, alawlap tutaşyberýän eken. Eziziň ýüzüni günde bir görmesem, ýüregim gürs gürs agzymdan çykaýjak bolýardy.
Ahyry bir gün söýginiň güýji erk böwedini böwüsdi, yşga ezilen ýüregim öz islegini idände, erkim duýgulardan asgyn geldi. Şeýdibem, Eziz bilen bir jan, bir ten diýleni bolduk. Hossarlary bilen tanyşdyrdy, gatnaşdyrdy. Kakasydyr ejesi meni gowy görýärdiler.
Şol günlerden soň men söýýärdim, hem söýülýärdim, durkum bilen söýgä ýugrulypdym, dünýäde menden başga bagtly adam ýok ýalydy.
Eziz hususy şereketini açdy. Işleri ugrugyp, jübüsi has pullandy. Şondan soň ol birhili, üýtgäp sähel zada yrsarap başlady. Men şonda-da: “Işde aşa ýadandyr, meniň çagalara (Ezizden 2 oglum bolupdy) köpräk üns berýänimi gaty görýändir-dä” diýip piker edýärdim. Artykmaç sorag berip, ýüregine düşmejek bolýardym.
Bir gün işe gitmekçi bolup, duralgada awtobusa garaşyp durkam, şaýoldan öz maşynynda Eziz geçip gitdi, gapdalynda-da bir gyz maşgala bardy. Göýä üstümden gaýnag suw dökülen ýaly boldum, ýöne ähli gören zatlarymy görmediksiräp içimde sakladym. Emma ertesi gün goňşy aýallaryň biri:
- Düýn şäherde Ezizi gördüm, maşynyna bir ýaş gyzy mündürip aýlanyp ýör eken. Bile dükana-da girdiler. Ol gyz Eziz goňşa gaty golaý durýa welin, men-ä, edil aýaly ýaly boluberşini halamadym – diýen gepi alyp geldi.
- Aý, bile işleýän gyzlary bilen aýlanyp ýörendir-dä – diýip, men sowukganly jogap bersemem, ýüregime uly bir ünji aralaşyp gitdi.
Ýylyň aýagynda Eziz Arçman şypahanasyna dynç almaga gitdi. Bolan döwründe öý bilen bir gezegem habarlaşmady. Meniň sabyr-takadym gaçdy, onuň hereketlerine düşünesim gelýärdi. Aýal bilesigelijiligim böwürsanjy ýalydy. Ýöne nädip-nähili gep açjagymy bilmeýärdim.
Soňabaka Eziziň biwepalygy baradaky gep-gürrüň köpelip ugrady. Öz golaý garyndaşy maňa jaň edip, Eziziň Maýa atly gyz bilen dynç alandygyny, maşynyndan düşmän ýöreniňem şoldugyny aýtdy. Meniň biderek zatlara ýüregimi çişiresim gelenokdy. Emma gürrüňňler öňküleriň üstüni ýetirýärdi. Eziz öýe gelmezligi hem çykardy.
Men kän garaşdym. Ahyry hem çydap bilmän, işleýän ýerine baryp, nämeleriň bolup geçýändigini soradym.
Ol göwnübir ýaly, ýerinden turdy-da:
- Men seniň bolup ýörşüňe gynanýan. Şu boýuň-syratyň bilen şu ýere gelmäge utanaňokmy? Meniň aýalym diňe sen. Onsoňom, erkek kişi erkin bor, çygra saljak bolup azar edinmezler – diýip, içýakgynç ýylgyrdy. Men gözümiň ýaşyny sykyp gaýtdym.
Ondan bäri ençeme ýyllar geçdi. Ýöne nähili bolsada kemsidilen mertebämi goramaly ýene özümdim………..