Dil bela, diş gala…

Salam, gadyrly teswirdeşler!

Bu gün şeýleräk bir mowzukdan söz açasym geldi. Dilim belam, dişim galam. Megerem, türkmenlerde bolşy ýaly dünýäniň beýleki köp medeniýetlerinde-de köp sözlülik ýeňilkellelikden, dereksizlikden nyşan diýlip hasap edilýän bolsa gerek. Ýöne, ylmy taýdan geçirilen barlaglaryň käbiri aýallaryň köp sözlüligini ýagşy gylyk-hasiýetleriň hataryna hem goşýar. Ýagny, gürlegen aýal bilen gürrüňdeş bolan on sany erkek adamyň sekizisiniň keýpi azda-kände göterilýär.

Emma, näme diýsegem, haçan-da geçmişimize göz aýlasak, goýberen ýalňyşlyklarymyz, eden samsyklyklarymyz köplenç halatda agzymyzdan çykan söz bilen, has dogrusy, şol söz netijesinde dörän ýagdaý bilen bagly.

Magtymguly atamyzyň aýdan sözleri bar "Dür saç, dür saçmasaň lal aç". Şu sözleri elmydama ýadymda saklap, her gezek özüme "Magtymguly derejesinde dür saçyp biljekmi sen entek-entekler, diňe lal aç, lal aç, lal aç! Hiç kim bilmesin içiňde nähili topalaň turýanyny!" diýesim gelýär.

Ýa-da bolmasa, öýümiň töründe "Dil adamzada özüniň pikirlerini ýaşyrmak üçin berlendir" diýilen ýazgyny asyp, aşagyna bolsa şol sözleri aýdan adamlaryň atlaryny (Taleýran, Fuşe, Wolter, Ýung, Katon, Plutarh...) ýazyp goýaýasym gelýär.

Geliň az sözli bolalyň, agzymyzdan bir söz çykmazyndan öňünçä gowja pikirleneliň.

Ýetip gelýän Täze Ýylyňyz düşümli bolsun!