Heňňam hekaýat.

Atam pahyr ýaşlygymdan gulagyma guýupdy:

- Öňüňden göwreli gelin çyksa, sowlup ýol bergin-de, ýüzüne seretmän: "Ylahym, gulan ýaly ogluň, gulaç saçly gyzyň bolsun!" diýip, dileg edip ötgün.

- O nämüçin sowulmaly. Nämüçin ýüzüne seretmeli däl?

- Agyraýak adam iki dünýäni - hem-ä özüni, hemem göwresindäkini göterip gelýändir. Sähel tisginse, gorksa, çagasyna zeper ýetmegi ahmaldyr. Şoň üçinem senden sowuljak bolup büdrese ýa gatyrak sesiňe tisginse, gowy däl, köşek, düşündiňmi! Onsoňam ol ejaply gelin, erkek kişiniň ýüzüne gönüläp, jikgerilip seretmegem aýyp saýýandyr.

- Onsoň nämüçin ýaňky zatlary aýdyp dileg etmeli?

- Wah, köşegim, kiçi bolýaň-da. Hergiz ýadyňda bolsun, "Alkyş etseň, ýarysy özüňe siňer, gargyş etseň barysy" diýlen söz. Ynha, hä diýmän ýetişersiň, öýlenersiň, şonda seň göwreli gelniňe-de şeýle doga-dileg ederler. Aýlanyp duran çalşykly dünýädir bu, düşündiňmi?!

Şol wagt çala düşünen bolsaň, ulaldygyňsaýyn has gowy düşünýän ekeniň.