Hat (Soňuna çenli okap bilseň gir!)

Öýüň içi ümsümlikdi. Diňe on iki ýaşly Hatyja çyra ýanyp duran stoluň başynda sarsman otyrdy. Onuň owadan gözleriniň kenarynda uzyn kirpiklerine düzülen duru-hünjüler çyranyň ýalkymyna buldurjyraşyp asylyşyp durdy. Olar birdenem stoluň üstündäki ak kagyzyň üstüne degip, pytyrap gidýärdiler. Onuň owadan kirpikleri gözleriniň owadan okarasyna batyp, täze hünjüleri alýardy-da, täzeden olary monjuga öwrüp, soň seçelendiriup goýberýäri. Gyzjagaz stoluň üstündäki hatdan gözlerini aýranokdy:

"Eje jan, sen meni näme üçin taşlap gitdiň? Bu dünýäde sensiz ýaşasym gelenok, käbäm. Meniňem ölesim gelýär. Seniň ýanyňa gidesim gelýär.

Sen ýogalanyňdan soň, kakamyň öýe getiren aýaly şu içerä her sapar girip çykanda, men müň gezek ölüp direlýän, eje jan!

Ol seniň köýnegiňi geýip, toýa dakynýan ýaglygyňy başyna atanda ýüregime otlar düşýär. Kakmyň otagynda, seniň ýeriňde ýatanda bolsa janyma jaý tapamok. Oňa :

"Ejemiň zatlaryny elleme" - diýsem, kakam käýeýär. Ol kakamy hem azdyrdy. Onuň bişiren naharyny däl, eliniň degen zatlarynam ýigrenýärin. Kakam bolsa onuň bişiren naharyny arkaýyn iýip otyr. Öýümiziň ähli ýerinde seniň mähriban eliň yzlarynyň baky galaryny isleýärin, ejejan...."

Goňşy otagdan ynjalykly, üsgülewik ses çykdy.

- Bibi, Bibi, aý, Bibi...

Hatyjanyň ejeligi şobada "häh" diýip oýandy-da, düňk-düňk edýän aýak sesi bilen otaga girip gitdi.

- Taňňyry getirsene-e!

Mergen aga indi telim aýbäri agyr ýatyrdy. Iç-daş girip çykmak –ha däl, düşegem aşagyndady.

Bibi ylgap diýen ýaly taňňyr getirdi. Mergen aganyň näme edýäni eşidilip durdy. Ol buşugýardy.

- Çaýjagaz içermiň, ýa bir zatjagaz iýermiň?

- Ajykdym, öz-ä.

Bibi aşhananyň çyrasyny ýakyp, gap- gaçlary elleşdirdi. Çäýnegiň şyglaýan sesi, gowurylýan etiň tagamly ysy otaglara kürsäp urdy. Hatyja ýerinden turdy. Gapy açyldy.

- Gyzym, ýataňokmy? - diýip, ejeligi mylaýym habar gatdy.

- Gel, kakaň bilenjik çaýjagaz içäý...

Hatyja sagada seretdi. Sagat gije üçüň ýarydy.

Ol kakasynyň näme üçin öýlenenine indi düşünp galdy. Ol mähribanyny neneň gowy görse-de, ejeliginiň edýän beýle-beýle hyzmztlaryna ýarajak däldi.Ol düşnüksiz duýgulara gaplandy-da. Stoluň üstünde ýatan haty alyp, ýyrtyp taşlady.


Öwezdurdy Nepesow

19-njy awgust 1999 y.