Zaman 2008 Turkmen edebiyaty barada

Turkmenistanda hem edibiyat ayaga galyp bashlana menzeyar. Men Zamanda bir makala okadym ol barada...ine shonun gysga teksti ashakda. Kim name diyyar bu barada?

2008: Edebiýatymyzyň esasy wakalary

...2008-nji ýyla hem edil şu ýylky ýaly, uly umytlar, ýagşy arzuwlar bilen başlanymyz ýadymda. Şol umytlaryň, arzuwlaryň bir bölegi bolsa, edebiýatymyz bilen baglydy. Tüweleme, geçen 2008-nji ýyl öňki ýyllara garanyňda edebiýatymyz üçin «hasylly ýyl» boldy diýip äginmän aýdyp bolar.

... Geçen ýyl döwürleýin metbugatymyzyň türkmen edebiýatynyň ösmegine uly goşant goşan söz ussatlarymyzyň ençemesini ýatlap, hatyralap, ýagşy iş edendigini nygtasym gelýär. Şu meselede «Zaman-Türkmenistan» gazetiniň hem çetde durmandygyny aýtmaly.

Bir mysal, köpleriň söýüp okaýan şahyry Atajan Annaberdiýewiň edebi mirasyndan «Inçe sungatyň syrlary» atly makalanyň çap edilmegi, şeýle-de şahyr Atajan Annaberdiýew barada alym Aman Şyhnepesowyň şahyryň döredijiliginden söz açýan «Aňşyrylman galan dünýä» atly makalasynyň hut şu gazet arkaly köpçülige ýetirilmegi okyjylarymyzda uly seslenme döretdi.

Gazetimizde Aman Kekilow (“Söýgüsi bilen söýdüren”), Saýlaw Myradow (“Özi-de şolardandy”) ... ýaly söz ussatlaryna bagyşlanan makalalar hem şeýle makalalaryň hilinden.

Şeýle hem dünýä edebiýatyndan terjimeler babatda aýratyn durup geçmek gerek...

Geçen 2008-nji ýylda öňki ýyllara garanyňda dünýä edebiýatynyň altyn hazynasyndan türkmen diline köp terjime edildi we okyjylara ýetirildi. Görnükli terjimeçi Kakabaý Gurbanmyradowyň rus şahyry Robert Roždestwenskiden eden terjimeleri, amerikaly ýazyjy Edgar Ponuň “Tylla tomzak” atly hekaýasy (terjime eden A. Hemidow), Latyn amerikaly ýazyjy, Nobel baýragynyň eýesi G. Markes bilen söhbetdeşlik, nemes ýazyjysy German Gessäniň “Şahyr” hekaýasy (terjime eden H. Hudaýgulyýew) 2008-de okyjylara ýetirilen şowly terjimeleriň käbirleridir.

Bu babatda „Garagum“ žurnaly aýratyn işjeňlik görkezdi. Öz ýazyjy-şahyrlarymyz barada aýdylanda, çeper edebiýatyň muşdaklary geçen ýyl Nobatguly Rejebow, Ahmet Gurbannepesow, Gurbandurdy Orazow, Orazgylyç Çaryýew, Çary Ýegenmyradow ... ýaly ykrar edilen zehinleriň täze eserleri bilen tanyşdylar. Olar «Watan» hem «Nesil» gazetlerinde çykyş etdiler.

Ine, şu adyny agzan zehinlerimizi 2008-nji ýylda häzirki zaman türkmen poeziýasynyň iň gowy goşgularyny okyjylara ýetiren awtorlaryň hatarynda hasap edýärin. Olaryň şygyrlary çeperçiligi babatda şirin, mazmun taýdan derwaýys. Şol goşgulary okanyňda „ine, biziň şu güne mynasyp poeziýamyzyň nusgalary“ diýip aýdyp bolýar.

...Çeper edebiýatyň muşdaklarynyň köpden bäri garaşyp ýören sözüni aýdan ol eser Kömek Kulyýewiň «Garlawajyň gaýy» powesti («Garagum» žurnaly, 9-njy sany). Poweste ýylyň çeper eseri diýip baha bermek bolar...

2008-nji ýylda edebiýat bilen bagly ýatlamaga mynasyp ýene bir waka: Türkmenistanyň halk ýazyjysy Atamyrat Atabaýew 60 ýaşady. Biziň gazetimizde-de, beýleki gazetlerde-de, Atamyrat aga bilen söhbetdeşlikleriň guralmagyny, onuň täze hem iň saýlama goşgularynyň okyjylara ýetirilmegini özüm-ä ýakymly ýagdaý hasap edýärin.

2008-de milli edebiýatymyz bilen bagly täze bir pikiriň öňe sürlendigi-de ýadymda. Ol pikiri alym Aman Şyhnepesow “Nesil” gazetiniň 2008-nji ýylyň 4-nji noýabrynda ýaşlaryň döredijiligi bilen bagly “Ýaşlardan tama has uly” at bilen çap edilen makalasynda agzaýar. Makalada türkmen poeziýasynyň hasam belent sepgitlere çykmagy üçin şygyrýetde goşgy düzülişiniň täze galyplaryna (belki, galypsyzlyga - ak goşga) geçmäge, täze usul-tärleri gözlemäge bireýýäm wagt bolandygy nygtalyp bellenýär...

MERET HANMAMMEDOW

http://www.zamantm.com/tm/yazarAd.do?kn=29

22.01.2009