Ähde wepalylyk, ýagny, beren sözüňde durmak.

Iň kyn meseleleriň biri hem beren sözüňde durmakmyka diýýän ynsanlar üçin. Çünki beren sözüňi wagtynda ýerine ýetirmeseň, onda bu pany älemde sanalgyň dolup, baky äleme tarap göçüp gitmegiň ähtimal we bu ýagdaý, belki-de, söz beren şahsyňyz üçin bende hakyna sebäp bolup biler. Hak halallygy etdirilmedik ýadaýda, netijesiniň nähili agyr boljagyny özüňiz göz öňüne getirip görüň! Hem-de kimdir birine söz berip bermäniňizi, beren bolsaňyz ony/olary ýerine ýetirip ýetirmäniňizi ýadyňyza saljak bolup görüň hany!

Pikirlenýän-de, şu wagta deňiç men tanyşlaryma, ene-atama, dost-ýarlaryma, ýakyn garyndaşlaryma, hatda, nätanyşlaryma-da söz berip, şony ýerine ýetirmezlik etdimmikäm?! Eger şeýle bolaýsa, onda dat günüme meniň. Şol sebäpli-de iň azyndan şu ýerdäki agzadyr myhmanlardan haýsyňyza söz beren bolsam, onda sizden haýyş edýärin, maňa beren sözümi ýatladyň! Häzire çenli Anna pizza we manty sözüm bar bolmaly. Bir agamyza 2 sany sapak kitaby we bir tanşyma 2 sany saz närsejigi hem bar. Başga-da zat ýadyma düşenok. Beren sözümde durmak isleýärin, ýogsam Gurhanda bir süräniň aýatlary barada Pygamberimiziň buşlugy bar. Gysgajyk şol wakany gürrüň beräýeýin:

“Ýene bir gün Pygamberimiz Öz sahabalaryna baky älem, Yslam dini barada hökümler we ş.m. zatlar barada gürrüň berenden soňra olara:
- Size bir zady buşlaýyn. Biribar maňa bir süre wahýetdi, şondaky ilkinji on aýatyň wasplary kimde bar bolsa, onda şol möminler hökmany ýagdaýda gutulanlardan, ýagny, jennet ählinden bolar!
- Olar haýsy aýatlar, eý, Allahyň Resuly?!
- Olar Möminler süresiniň ilkinji on aýatlarydyr!”

Hawa, şol on aýatyň sekizinji aýatynda şeýle diýilýär:”Olar özlerine edilen amanata (haky bilen) eýe çykarlar we beren sözlerine-de sadyk bolarlar!”

Mende şol on aýatyň wasplaryndan näçesi bar, özümem bilemok, belki-de, ýok diýiljek ýagdaýda azdyr, ýöne iň azyndan şolaryň käbirlerini ujypsyzja bolsa-da ýerine ýetirmek isleýärin!

Hemmämiz üçin beren we berjek sözlerimize sadyk bolup, iň oňat ýagdaýda olary ýerine ýetirtmegini Beýik Biribardan dilemek bilen!