Jübä salnan kelleler (SUPER-TM-PROZA)

Jübä salnan kelleler
(Däliň düýşi)

Duýn bir düýş gördüm. Şeýle bir düýş welin, şondan bäri oýalygym düýş ýaly, tersine gören düýşümem hakykat bolup görünýär. Gep uzadyp, gyzykdyrjak bolýan ýaly bolup oturman, gowsy, düýşümi gürrüň bereýin.

Obamy, şähermi — adam barynyň kellesi jubsünde. Her kim kellesini şeýle bir gowy görýär. Kimiň kellesi goltuk, kimiňki gapdal, ýene biriniňki jalbarynyň jübsünde. Batyrlar kellesini etegine salyp ýagyň üstüne çozupdyr diýip eşderdik, ýöne kelläň jubä salynýanyny birinji gezek görýän. Täze çykan eşikleň jübüsem kän. Honha biri kellesini syrt jübsüne salypdyr. Beh, bu adam oturanda nädýäke, kellesiniň üstünde oturaýýarmyka diýip pikir edýän. Ýogsa jalbaryň syrtky jübsi dagy şeýle kiçem welin, şoňa-da sygdyraýypdyr. Jübüleriň gyrasyndan gözjagazlar ýyldyraşyp görünýär. Hiç kimiň azaryna-da däl. Bu hamala adaty zat ýaly. Kellelerem: „Bu ýeri ýyljak“ diýşip hezil edýärler. Şo wagt öz kellämiň nirededigini bilemok. Bu hakynda pikir edip ýetişmänkäm ýaplanyp ýatan birine gözüm düşdi. Onuň kellesi ýerindedi. Men bu gyra çekilen kişiniň ýanyna baryp: „Sen näme çetde ýatyrsyň? Kelläň näme jübüňde däl? Sen näme dälimi?“ diýip soradym. Olam: „Men nätjegimi bilemok. Kelläňi jübüňe salsaň aýaklaryň onuň ýerini tutýar. Onsoň aýaklaň ugruna görä eňibermeli. Bu ýaman hezil. Ýerinde bolanyndan bolmany gowy kelläňi jübüňe salsaň, ol goragda-da bolýar. Görýäň-ä gar gatyşykly ýagyş ýagýar. Kelläňi üşetseň miningit bolmagam ahmal. Ýa-da Parkinsonyň keseli degäýse nätjek?! Ýöne aýagyň ugruna görä eňip ýöruljek bolsa, bu kelläňi jübüňde şalkyldadyp ýörmegiň geregem ýok ýaly. Zyňyp goýberseň, kelläň aladasam birlikde zyňyljak, dynyljak. Şonda-da bu kelläni zyňmaga dözemok. Meniň owadan gözlerim, buýra saçlarym, onsoňam az-owlak pikirlerim bar. Kellämi zyňsam olaram bile zyňmaly boljak. Şeýdip nätjegimi bilmän ýaýdanyp ýatyryn".