Nik Wuýniç - eli ýok, aýagy ýok, problema ýok

Salawaleykum eziz ertir.comyn agzalary gowumy yagdaylanyz bu tema on acylan bolsa bagyshlarsynyz onunden aytyan:-D:-D:-D

Käbirleriňiz eşidenem bolmagyňyz mümkin. Bu adam ady belli orator, motiwirleýji çykyşlary bilen birnäçe ýurtlarda çykyş edýär.

Onuň şygary: "Hiç haçan basylma! Hiç haçan utulanyňy boýun alma!"

Bu adam ruhdan düşmezligiň ýokary güýjüni görkezdi. Ol el-aýaksyzlygyna garaman, ýaşamak üçin özünde güýç tapdy. Bu ýigit 1982 ýylyň 4 dekabrynda Awstraliýanyň Brisben şäherinde dogulýar. Onuň kakasy pastor (protestant serkowynyň hyzmatçysy), ejesi şepagat uýasy bolan, genetiki taýdan ähli zat normada, göwrelilik döwri hem ýagşy geçen. Ene-ata öz perzendine sabyrsyzlyk bilen garaşýardylar. Nigiň kakasy dogryş wagtynda bardy (köp milletlerde çaga dogulanda, aýalynyň ýanynda kakasy hem durýar). Haçan-da ol çaganyň eliniň ýokdugyny görende, gaty geň galdy. Aýalyny gorkuzmazlyk üçin ol daş çykdy. Dogryş tamamlanandan soň, doktor onuň ýanyna gelip çaganyň el-aýagynyň ýokdugyny, çagany ejesine görkezmändiklerini aýdýar. Ilki badalar ejesi çaga bilen öwrenşip bilmeýär, 4 aýdan soň ýuwaş-ýuwaşdan öwrenşip başlaýar.

Nik hemişe adaty çaga ýaly boljak bolýardy, başgalardan kömek soramaýardy. Onuň çep aýagynyň ýerine eliň aýasyna meňzeş bir zat bar. Ol şonuň kömegi bilen hereket edýär. Ol şonuň kömegi bilen ýöremegi öwrenýär. Muňa hiç kim ynanmaýar. Soňra ol suwa bökmegi, ruçkada ýazmagy, kompýuterden peýdalanmagy hem öwrenýär.

Ýöne ol 8 ýaşyndaka synpdaşlarynyň ýaňsylamalaryna çydamaýar we öz janyna kast etmegiň kül-külüne düşýär. Ýöne ony ene-atasynyň söýgüsi alyp galýar. Şonda ol öz-özüne hiç haçan basylmajakdygy hakynda söz berýär.

Ol 19 ýaşyndaka, ýagny uniwersitetde okap ýören wagtynda oňa talyplaryň öňünde çykyş etmegi hödürleýärler. Umuman 7 minut wagt berilýär. Emma eýýäm 3 minutdan soňra talyplaryň köpüsi tolgunmakdan ýaňa gözlerini ýaşdan doldurýarlar. Çykyşyny tamamalandan soňra bolsa bir gyz talyp gelip Niki gujaklaýar we onuň janyny halas edendigini aýdýar. (Ýagny, depressiýa sebäpli öz janyna kast etmegiň pikirinde eken).

Şondan bäri ol ýylda 250 gezek çykyş edýär. Ol 44 döwletde çykyş edip gördi, 7 ýurduň prezidenti bilen duşyşdy, 5 sany ýurduň parlamentinde çykyş etdi. Ol Hindistanda çykyş edeninde ýygnanan märekäniň sany 110 müňe ýetdi!

2012-nji ýylyň 12 fewralynda Nik Kanae Miahare öýlenýär. 2013 ýylyň 14 fewralynda onuň ogly bolýar, adyna Kieşi Jeýms Wuýniç dakýarlar.

Ol özüniň her bir çykyşyny şeýle tamamlaýar: "Siz durmuşda käwagt şeýdip ýykylyp bilersiňiz" - diýýär we öňlügine özüni zyňýar. "Şeýle bir ýykylýarsyňyz welin, indi ýeriňizden galmaga hiç hili güýç kuwwat galanok. Şonda heý bir çykalga barmyka diýen sorag ýüze çykýar. Ýöne, berk belläň - şowsuzlyk bu günüň soňy däldir, hemme zadyň geçişi ýaly şowsuzlyk hem geçýändir!"

Öňüňde maksat goýup, şol maksady ýetmek üçin yhlas etseň hökman ýetýärsiň.