Kerim aga -soydum bir gyzy

I

Oglanlyk döwrümdi. Söýdüm bir gyzy.

Ýok, ýok, beý diýerden irräkdi heniz.

Öz ýanymdan söýýän ýaly bolsam-da,

Söýgüm basdaşlykdan bärräkdi heniz.

Okuwdan soň baha sanaşygynda

Artyk, kem bolaýsa bir bäşligimiz,

Söýgüniň deregin basdaşlyk tutup,

Bolmazdy yşk diýen mätäçligimiz.

Şeýdip geçip gitdi oglanlyk döwrüm.

II

Jahyllyk döwrümdi. Söýdüm bir gyzy.

Ol hem maňa söýýän ýaly bakardy.

Emma zalym uruş ara düşdi-de,

Herimizi bir gapydan çykardy.

“Söýýän!” sözün sözlemäge ýetişmän,

Çykdym ýaş başymdan nan gözlegine.

(Eneň, jigileriň aç burlup ýörkä,

Nädip seredersiň gyz gözlerine!)

Şeýdip geçip gitdi jahyllyk döwrüm.

III

Ýigitlik döwrümdi. Söýdüm bir gyzy.

(Agyr günler bolsa bolupdy tamam.

Ýeňiş nury bilen ýagtylan gözler

Bizi öýmüze-de beripdi salam).

Emma ol söýgümem başa barmady.

Ýene asgyn çykdym oýnan oýnumdan:

Ýeri, söýýäniňi aýdyp bilmeseň,

Kim samsyk aslyşar seniň boýnuňdan!

Şeýdip geçip gitdi ýigitlik döwrüm.

IV

Dälilik döwrümdi. Söýdüm bir gyzy.

Diýse-de babalar: “Sagynýança sag,

Däli iki gezek öýär ogluny!”

Ne-hä däliligim eçildi sylag,

Ne-de sagatlygym ... Sylaga derek

Ullakan bir synag holtumyn açdy.

Diýdiler: “Kyrk halat, kyrk müňem manat!”

Jübimi çöwürdim: kyk köpük gaçdy.

Şeýdip akyl berdi dälilik döwrüm.

V

Kämillik döwrümdi. Söýdüm bir gyzy.

Günde bir görmesem karar tapmadym.

Iki görsem, üç görmegi arzuwlap,

Üç görsem, dördünjä arzuw topladym.

Söýdüm, söýdi... Emma weli sizi-de

Unudyp bilmerin başky söýgüler.

Mahal-mahal sizi ýatladygymça,

Siziň joraňyza söýgüm beýgeler.

Şeýdip geçip barýar kämillik döwrüm.

Kerim Gurbannepesow

sizem ashykmysynyz?

hawa, ashyk men(42%, 6 adam)

yok, entek ashyk bolmadym(14%, 2 adam)

soyga ynanamok(0%, 0 adam)

ynanyan yone entek soymedim(42%, 6 adam)