Gabanjaňlyk

Gabanjaňlyk

Sen rahat ýatyrsyň,
Gapdalyňda men
Otyryn boş goýup ýassygyň ýaryn.
şu çaka çen seniň bilen geçilen
Günleri bir-birden ýada salýaryn.

Düşünip bilemok, nämedi eýsem,
Düýp sebäbi saňa sataşan derdiň?!
Işden sähel gijä galyp geläýsem,
Saçlarymy ysgap-ysgap görerdiň.

Bilýärdim seň oda düşüp ýöreniň.
ýaşyrsaňam, bilýärdim men baryny.
Taparyn öýdýärdiň eşiklerimiň
Epininden ýat saçlaryň taryny.

Köýnegimden ysyn alyp öz eliň,
Köşeşerdiň ysgap gören badyňa.
Wah, duş gelmek isläňokdyň özüňem,
Yhlas bilen gözläp ýören zadyňa.

Bilmedik bolardym, aňsam-da muny,
Senden ýüz öwürip, terse bakmadym.
Gabansaňam söýgiň bilen sen meni,
Garaşýan zadyňdan gorap sakladyň.

A. Annaberdiýew