BEYIKLERDEN: Halyl Kulyýew -"Geplejek boldy"

    Geplejek boldy
Bir gün suw joş alyp, böwet aganda,
Bir gyz gelip, suwy saklajak boldy.
Eline pil alyp, gum çeke-çeke,
Böwedi täzeden beklejek boldy,
ýakynlaşjak bolsaň ýabyň çemine,
Suw joşguny çekip barýar demine,
Gyz aljyrap läbik suwuň öňüne,
Özüni oklajak-oklajak boldy.
Başlyk meni görüp:-Ýetsene-diýdi,
-Ýandak orup basyň üstüne diýdi,
Gyzdan pil sorasam -Git-se-ne - diýdi,
Bu işden elini çekmejek boldy.
Hars urup işledim, böwet bekledim,
Gyz:-Arma - diýdi-de, birden saklandy,
Diýdim:-Bar bol, asyl armaryn indi...
Gyz utanyp maňa bakmajak boldy.
Bulut pytrap, asman perdesin syrdy,
-Indi gidäý- diýip gözel ýylgyrdy,
Diýdim:-Gitmek bolmaz, başlyk iberdi.
Gyz gülüp geplejek-geplejek boldy.
                                                                              Halyl Kulyýew