Başymdan geçen waka

Bile okaýan oglanlarymyň biri başga bölümde okaýan bir gyzy gowy görüpdir. Kän gezdi görgüli, duýdurybilmän. Ahyry hem hat ýazypdyr. Özi gowşurmaga çekinip duransoň, haty gowşurmagy men boýun aldym. Arakesmede okuw otaglaryna bardym. Joralary bilen oturan eken. Salamlaşdym-da:
- Bagyşlaň, şuny size iberdiler. Şu synagda düşüp biljek zatlar. Taýýarlansaňyz... – diýdim-de, sünnälenip daşlanan gol boýy haty oňa uzatdym. Bilemok, meni aşa ýuwaş görensoňlarmy ýa hakykatdanam meniň edenim çekinilmeli işdimi, garaz geň gördi kursdaşlarym bu hereketimi. Aýdyşlaryna görä, hat-beýleki gowşurjak bolsalar, olaryň el-aýaklary bilen bilelikde ýürekleri-de titir-titir titreýärmiş. Olary howsala salýan beýle ýagdaýlaryň meniň üçin adaty görünmesi näme üçinkä?! Ýa men henize çenli el-aýagyňy ýitirdýänçyn söýgä uçrap görmedimmikäm? Ýa-da yşgym beýle ýagdaýlardan has kämil söýgümikä?!.