Aýalyň we başga biri...

Aýalyň başga birini oňat görse halarmysyň?
Meselem, sen onuň ýanyna baryp gyşarjak bolsaň,
Oň ýanynda başga biri arkaýyn ýatan bolsa,
Aýalyň oň üstüne ýüpek-ýorgan ýapan bolsa,
Aýalyň saňa hiç haçan aýtmaýan hoş sözlerini,
Dilini dagam aýnadyp, başga birine aýdyp dursa,
Senem ýaňky başga birine gaty-gaýrym söz aýdaýsaň, aýalyň ýüzün çytyp, çyny bilen gaty görse,
Ýa-da onuň eşiklerini hapalap ýetişmänkä, aýalyň ýuwup dursa,
Ýa-da onuň özüni çyp-ýalaňaç edäge-de, aýalyň wanna salyp, mylaýym suwa düşürse,
Oň saçlaryn ýüpek ýaly bolynça, sabynlap ýuwup dursa,
Bazardan seň puluňa iň oňat almany, nary,
pomidory, hyýary
aýalyň oňa getirse,
Saňa dagy birijigem "iýäý" diýip uzatmasa,
Ýaňky seniň aýalyňa aýdan işini etdirip, buýran ýumşun bitirtse,
Sargan zadyn getirtse, şeýdip, gözüň alnynda seň söýgüli aýalyň üstünden höküm sürse,
Ýa-da olar iki bolup, saňa häkimlik etse,
Etjek alajyň barmy hernäçe namysjaň bolsaň, hernäçe gaharjaň bolsaň,
Mumly ýüplük ýaly borsuň, ýa hernäçe dogmuň bolsa,
Eger ýaňky hökümdar seň iň körpeje ogluň bolsa...