Geliň, goşgy okalyň 6

                GURT
 
Gurdum,
Ata-baba hudaýysyň bu ýurduň!
Sen gadymy hudaýysyň türkmeniň!
Köwsarlap ugrasa ýürekde derdim
Gelýän mynajata ýanyňa seniň.
Sen munda ýatyrsyň garyň ýassanyp,
Ýassanyp ýatyrsyň elhenç azalyň.
Ne üns berýäň gelýän-geçýän millete,
Ne hudaý deý salýarsyň sen nazaryň.
Hamyň göýä hamy ýaly şagalyň,
Men - hor, sen mendenem elli esse hor.
Hudaýyň kapasda gören mahalyň,
Aýt, hudaýym, neneň çydam etse bor?
Eý, erksiz hudaýy erkana iliň,
Seniň hudaýdygňam bilýän ýok hatda,
Indi türkmenlermiz multfilm görýär,
Towşanyň möjegi ýeňişi hakda.
Gaýry illeň daşa çokunýan wagty,
Oda, ýele, suwa çokunýan wagty,
Eger sen hudaýy bolmadyk bolsaň
Galmazdy bu türkmenleriň deragty.
Eger sen hudaýy bolmadyk bolsaň,
Geçip ganly garpyşykly eýýamdan
Şindi türkmeniňki bolmazdy asla
Bu daglar, sähralar, ala meýdanlar.
Seniň şekliň pasyrdapdy tugumda,
Hem mertligiň lasyrdapdy ruhumda.
Külli duşman dumly-duşa bosupdy,
Türkmen seniň bilen türkmen bolupdy.
Eý, sen Garagumuň erkin möjegi,
Mert çyda, bu-da bir heňňamyň oýny,
Indi türkmen gyryp, tohum-tijiňi,
Garagumda diňe köpeldýär goýny,
Zyndan ýatan jaýyň, bendilik paýyň,
Men - hor, sen mendenem elli esse hor,
Zyndandaka erkanalyk hudaýyň
Aýdyň, ata-babam, näme etse bor?
 
Goşgynyň awtory şahyr Nobatguly Rejebow.