Palaw

Salam agzalar! 🙂

Palaw

Gerekli önümler: 600 gr. käşir, 6-7 bölek towuk, 3 sogan, 700 gr bürünç (tüwi), ýag, duz.

Palaw Türkmen ilimizde esasan etli bişirilýär, ýöne bu gezek size gürrüň berjek reseptymyz towukdan taýýarlanylan görnüşi. Towuk çalt bişýänligi sebäpli ilki bilen käşiri we sogany taýýarlamak has gowy bolar.

Kaşiri arassalamaly we inçejik dogramaly. Sogany hem arassalamaly we dogramaly, maýda dograsaň hem bolýar, isleseňiz ýarym aý şekilinde inçejik dograsaňyz hem ýeterlik bolýar.

Gazana ýag guýmaly we gyzdyrmaly. Ýag gyzandan soň arassalanyp, duzlanan towuk etini atmaly. Etiň doly bişmegi zerur däl. ýöne daşy bişmelidir. Towuk 10 minuda golaý bişirilenden soň dogralan sogany atmaly. Sogan atanyňyzdan soň gazanyň gapagyny ýapmasaň gowy. Sogan gowy yumşandan soň üstüne dogralan käşiri goşmaly. Käşiri gowy garyşdyrmaly we 6-7 minut gowurmaly. Soňra käşiri çalarak yapyp duran derejede suw guýmaly we biraz duzlap haýalyrak otda bişirmeli/ Şeýle edende palowyň süýjüsi nahara gowy çykýandyr.

Käşir taýýar boluberenden soň oduny güýçlendirmeli. Bürünji 3 gezek ýuwmaly, ýöne ýuwanyňyzda bürünji ogratman, emaý bilen ýuwup, suwyny hem emaý bilen dökmeli. Ýuwulan bürünji (tüwini) taýýar bolan etiň we käşiriň üstüne goşmaly we gaýnan suw guýmaly. Suwy guýanyňyzda kepgirden ýa-da çemçeden syryp guýmaly, ýagny çäýnegiň özünden göni guýmaly dal. Suw suýem barmagyň 2-nji bogunyna ýetýän derejede guýmaly diýilýär. Ýöne bu bürünjiň hiline hem baglydyr. Bürünji doly ýapyp, üstüne çykyp duran derejede bolmaly. Suwy siňdirýänçä garaşmaly we siňdirenden soň aşagynyň oduny ep-esli ýuwaşatmaly. Ody sähelçe ýanyp duran bolmalydyr. Oduny peseldeniňizden soň gazanyň gapagyny ýapmaly we 40-45 minut bugda goýmaly. Taýýar bolmagyna 10 minut galanda naharyn ýüzüni çalarak agdarmaly.

Biziň taýýarlan palowymyzyň käşiri we tüwüsi garylmadyk. Muny her kim öz islegi boýunça hem taýýarlap biler. Guýulanda ilki bürünji guýulýar, soň hem merkezinde eti goýulýar. 

Işdäňiz açyk bolsun! 

Hormatlamak bilen Ayjagaz we Bibijan (=BibiAy=AyBibi=) 🙂