Bialaçlyk

Al kaksyn! Nälet siñsin! Elimden, elimizden hiç zat gelenok! Onda biz näme işe ýaraýas?
...Bugün 8-nji mart. Halkara zenanlar güni. Dañ bilen oýanyp, ýüregime ýakyn zenanlary gutlanymdan soñ, hemişeki dynç günleri endigim boýunça içeriñ syrym-süpürimine, tämizligine, şkaflaryñ, tekjeleriñ päkligine wagtymy sarp etdim.
Özümiñ mazaly ýadanlygymy duýanymdan soñ ýassygyma gyşaryp saýtda zenanlar güni gutlagymy paýlaşmakçy boldum. Birdenem, penjireden öýümize tarap gyzjagazy bilen ýöräp gelýän ýaş zenana gözüm kaklyşdy. Hä diýmänem, gapymyz kakyldy. Gapyny açyp-açmakam ýaş zenan ýüzüme naýynjar garap geplemäge durdy.
- Ýoldaşym meni urdy. Indem eline pyçak alyp, öldürmek üçin kowalap ýör. Yzymdan ulag gelýänçä sizde gizlenäýeýin.
Ýaş zenanyñ bir demde aýdyp ýetişen sözlerini aýdylşy ýaly tiz kabul etmek maña başartmady. Az salym oýlanyp duranymdan soñam ejemiñ öýe nähilidir bir bahana tapyp, girip, soñundanam öý eýesine zeper ýetirýän allawçy-kezzaplar baradaky sözleri gulagymda ýañlandy. Bu babatda hut şu gün bazara gideninde tabşyryp gidipdi:
- Gaty seresap bolgun.
Ejemiñ aýdanlaryny duşumdan geçirip bilmezdim, ýöne ýaş zenanyñ ahwalyna-da biparh garap biljek däldim. Ikirjiñlenenligimi gören zenan hasam naýynjar görnüşe geçdi.
- Banýañyzda gizlensemem bolýar.
Ýüregimiñ bagyryşlary aklymyñ pyşyrdysyndan üstün çykdy.
- Ýörüñ!
Olary yzyma düşürip, aşhanamyza saldym. "Myhmanlarym" hatda, köwüşlerini-de çykarman çomallyp oturdylar. Zenanyñ ýüzüne ünsli seredenimde, gözleriniñ ýokarsyndaky gyzyl tegmillere, aşagyndaky çişlere gözüm düşdi-de inim tikenekledi. "Ýenjilipdir".
Zenan titreýän elleri bilen telefonyndan kimdir birine jañ edýärdi. Gözlerinden dynuwsyz ýaş akýardy. Indi hiç zadyñ teatr sahnasynda oýnalýan oýun däldigine düşünipdim.
- Ýörüñ öýe gireliñ.
Zenandyr gyzyny yzyma düşürip oturylýan jaýymyza saldym. Gapyny içinden gulpladym.
Şondan soñ ol özüni tanyşdyrdy. Gapdal köçämizde ýaşaýan Geldi aganyñ welaýatdan edinen aýaly eken. Ol aýagaldygyna titräp telefonynda jañ etmegini dowam edýärdi. Ahyram jañy alan kişä yzyndan ulag ýollamagyny haýyş etdi. Oñaýly jogap alanyndan soñam köşeşmedi. Ulydan demini alyp, sojap-sojap aglady. Men bu pursatlarda näme etdim? Näme elimden geldi. Diñe köşeşmegini aýdybildim.
- Köşeşiñ! Giñ boluñ! Häzir ulag geler. Gidersiñiz.
Soñam hamala "Şundan başga elimden gelýän zat ýok" diýýän ýaly, ajygyp-ajygmaýandyklaryny, ýeterlik pullarynyñ bardygyny-ýokdugyny soradym. Çaý, nahar goýdum.
Halkara zenanlar güni bir zenan öldürer hetdine ýetýänçä ýenjilýär, adamsy ony eli pyçakly kowalaýar. Meniñ elimden gelen ýeke zat bolsa olary köşeşdirmek. Neneñsi bialaçlyk!
Hany zenanlar bahar bägülleridi, mähribanlykdy. Onda bu näme?
Ine, biz zenanlar güni mynasybetli bir-birimizi müberekleýän pursatlarymyzda bir zenanyñ başyna şeýle betbagtlyk gelýär, gadyrly ildeşler!