40 Hadys

HADYS 1.
AÝYPLARY ÖRTMEK BARADA
Ebu Hureýra (radyýAllahu anhu) rowaýat edýär: Resulullah (sallaLlahu aleýhi we sellem.) şeýle buýurýar: „Haýsy hem bolsa Allahyň bir guly şu Dünýäde başga bir musulmanyň aýbyny örtüp-ýaşyrsa, Kyýamat gününde Allah (jelle jelalluhu) hem onuň aýbyny ýaşyrar“ (Müslim rowaýat edýär)
HADYS 2.
MUSULMANLARYŇ SÖZSÜZ DÜŞÜNMEGI AHLAGY
Ebu Hureýra (radyýAllahu anhu) rowaýat edýär: Resulullah (sallaLlahu aleýhi we sellem) şeýle buýurýar: „Sizden biriňiz jemagata ymam bolaňyzda namazy ýeňil (gysga) okatsyn. Çünki içlerinde ejiz, hassa we garry bolanlar bardyr. Eger ýeke özüň okaýan bolsaň, näçe uzatsaň (namazy) uzadyber“. (Buhari we Müslim)
HADYS 3.
ÖZÜŇ ÜÇIN SÖÝÝÄNIŇI MUSULMAN ÜÇIN HEM SÖÝMEKLIK BARADA
Enes (radyýAllahu anhu) rowaýat edýär: Resulullah (sallaLlahu aleýhi we sellem) şeýle buýurýar: „Sizden biriňiz özi üçin söýýän zadyny musulman dogany üçin hem söýmese, imany kämil bolmaz“ (Buhary we Müslim).
HADYS 4.
ALLAHYŇ DOSTLARY.
Ebu Hureýra (radyýAllahu anhu) rowaýat edýär: Resulullah (sallaLlahu aleýhi we sellem) buýurýar: „Saçy dargan (daralmadyk), keçelenen, tozanly we gapylardan kowlan nije adamlar bardyr. Allahyň lutfyny umyt edip, bir zat barada „Şeýle bolar“ diýip ant içse, Allah (jelle jelaluhu) onuň andyny ýerine ýetirer, dilegini kabul eder“. (Müslim rowaýat edýär).
HADYS 5.
ÖZÜŇI UNUTMAK.
Usame bin Zeýd (radyýAllahu anhu) rowaýat edýär: Resulullah (sallaLlahu aleýhi we sellem) buýurýar: „Kyýamat güni bir adam getirilip Dowzaha taşlanar, içegeleri garnyndan daşyna çykarylar (atylar) we şol halatda degirmeni aýlaýan gatyr ýaly aýlanyp durar. Dowzahylar onuň daşynda toplanyp şeýle diýip sorarlar: „Eý pylany, bu neneň ýagdaý? Sen bize ýagşylygy buýrup, ýamanlykdan bolsa alyp galýardyň ahyryn? “ Ol hem şeýle jogap berer: „Hawa ýagşylyga buýrardym, ýöne özüm etmezdim, ýamanlykdan gaýtarardym ýöne özüm şony ederdim“ .
(Buhary we Müslim)
HADYS 6.
MUSULMAN DOGANLYGY.
Ebu Hureýra (radyýAllahu anhu) rowaýat edýär: Resulullah (sallaLlahu aleýhi we sellem) aýtdylar: „Musulman musulmanyň doganydyr. Oňa hyýanat etmez, ony ýalanlamaz, ony utandyrmaz. Her bir musulmana başga musulmanyň namysy, maly we gany haramdyr. Takwalyk ine şulardyr. Bir adama şer (günä) hökmünde musulman doganyny hor (pes) görmegi ýeterlikdir“. (Tirmizi Hasan hadys).

HADYS 7.
MUFLIS KIMDIR.
Ebu Hureýra (radyýAllahu anhu) rowaýat edýär: Resulullah (sallaLlahu aleýhi we sellem) bir gün: Bilýäňizmi muflis kimdir? -diýip sorady. Sahabalar - Biziň pikirimizçe muflis - puly we maly bolmaýan adamdyr - diýdiler. Şonda Resulullah (sallaLlahu aleýhi we sellem) şeýle diýýär: „Meniň ymmatymyň muflisi şeýle adamlardyr-Kyýamat gününde namaz, roza we zekat bilen gelerler. Emma birine sögüpdir, birine töhmet atypdyr, biriniň hakyny (malyny) iýipdir, biriniň ganyny döküpdir ýa-da ynjydypdyr. Şonuň üçin, üstünde bolan haklar alynyp gutarylýança onuň ýagşylygyndan (sogabyndan) şol adamlaryň her birine beriler. Onuň sogaplary gutaraýsa, onda şol hakyna zulum eden adamlarynyň günäleri şol adama ýüklener we şol adam Dowzaha taşlanar“. (Müslim rowaýaty)
 
HADYS 8.
AŇSAT DIN
Ebu Hureýra (radyýAllahu anhu) rowaýat edýär: Resulullah (sallaLlahu aleýhi we sellem) şeýle buýurdy: „Bu din diýseň aňsatdyr. Bir adam amallarym kem bolmasyn diýip din meselesinde özüne zor salsa, din ondan üstün geler (ony ýeňer). Şonuň üçin ortaça gidiň! . Size buşluk bolsun! Az hem bolsa dowamatly amallar bilen sogap gazanarsyňyz! Ertir, agşam we gijäniň salkyn wagtyndan peýdalanyň! . “ (Buhari rowaýat edýär.)
HADYS 9.
KURAN OKAMAKLYGYŇ SOGABY
Resulullah (sallaLlahu aleýhi we sellem) buýurdy: „Kim Kurany gowy okaýan bolsa we şony okasa ol ahyretde ýagşylar bilen we ýazýanlar (ýazyjy perişdeler) bilen bilelikde boljakdyr. Kim Kurany säginip we kynçylyk bilen okaýan bolsa oňa iki esse sogap berler“. (Buhari we Müslim)
 
HADYS 10.
IŇ HAÝYRLYŇYZ WE IŇ ÝAMANYŇYZ
Asma binti Ýazid (radyýAllahu anha) rowaýat edýär: Resulullah (sallaLlahu aleýhi we sellem) bir gün sorady: Araňyzda iň haýyrly bolanyňyzy habar bereýinmi? Adamlar elbetde ýa Resulullah (sallaLlahu aleýhi we sellem) aýdyber-diýdiler. Şonda Resulullah (sallaLlahu aleýhi we sellem) aýtdy: „Ol şeýle adamlardyr, olaryň görnüşi size Beýik Allahy ýatladar“. Soň bolsa Resulullah (sallaLlahu aleýhi we sellem) sorady: „Araňyzda iň ýaman adamlary aýdaýynmy? Olar şeýle adamlardyr olar gep-gybatlary ýaýradarlar, bir-birlerini söýýän adamlaryň arasynda agzalalyk tohumlaryny ekerler we bigünälere azar bererler“. (Ahmet bin Hanbel)

HADYS 11.
PÄKIZE KALP
Resulullah (sallaLlahu aleýhi we sellem)-den soradylar: „Adamlaryň içinde iň haýyrlysy kimdir? “. Resulullah (sallaLlahu aleýhi we sellem) şeýle jogap beripdir: „Kimde dogruçyl dil bilen päkize kalp bar bolsa, iň haýyrlysydyr“. Sahabalar sorapdyrlar: „Dogruçyl dil diýýäniňe düşündik welin, päkize kalp diýýäniňe düşünmedikle? “. Resulullah (sallaLlahu aleýhi we sellem) şeýle jogap beripdir: „Şol adamyň kalbynda arassalyk we ýagşylyk (agraslyk) bardyr. Şol kalp bütin günälerden azatdyr we şonda ýigrenç, adalatsyzlyk we görüplik ýokdyr“. (Ibn Mäje)

HADYS 12.
RIÝA
Resulullah (sallaLlahu aleýhi we sellem) buýurýar: „Meniň iň gorkýan zadym ymmatymyň kiçi şirk etmegidir. Onda sahabalar sorapdyrlar! Ýa Resulullah (sallaLlahu aleýhi we sellem) kiçi şirk diýýäniň näme? Şonda Resulullah (sallaLlahu aleýhi we sellem) şeýle jogap beripdir: Ol riýadyr, ýagny amallaryň başgalara göz üçin, görkezmek üçin edilmegidir“. (Ahmet bin Hanbel)
HADIS 13.
ÝEDI TOPAR ADAM
Resulullah (sallaLlahu aleýhi we sellem) aýdýar: „Ýedi topar adamy Allah Tagala Kyýamat gününde Öz Arşynyň kölegesinde gorar (saýalar). Sebäbi şol gün şondan başga kölege boljak däldir.. 1)Adyl (adalatly) hökümdar. 2)Beýik we Kadyr Allahyň razylygyny gazanmak üçin öz ýaşlygyny ybadata bagyşlan ýaş ýigit (gyz). 3)Kalby mesjidler (ýagny jemagat bilen) bilen bagly bolan adam. 4)Bir-birini diňe Allahyň razylygy üçin söýýän we diňe şonuň üçin birleşýän we aýrylyşýan iki adamy. 5)Abraýly we owadan aýal maşgala tarapyndan zyna etmeklige çagyrylan wagtynda „Men Allahdan gorkýaryn“ diýip ýüz öwüren adam. 6)Sag eli bilen beren sadakasyny çep eli bilmejek şekilde gizlin berýän adam. 7)Ýekelikde Allahy ýatlanda gözleri ýaş bilen dolan adam. (Buhary we Müslim).
HADYS 14.
PYGAMBER SÖÝGÜSI
Ebu Hureýra (radyýAllahu anhu) rowaýat edýär: Pygamber (sallaLlahu aleýhi we sellem) buýurdy: „Janym (gudrat) elinde bolan Allahdan (jelle jelaluhu) kasam içýärin, siziň hiç biriňiz Meni öz atasyndan we çagalaryndan beter söýmese, iman etdigi bolmaz“. (Buhari) we ýene-de Pygamber (sallaLlahu aleýhi we sellem) aýdýar: „Öz arzuw-isleglerini Meniň getirenlerim (ýagny Sünnetim) bilen laýyk getirmeýän adam, doly iman getirdigi bolmaz“ (Buhary).
HADYS 15.
MUSULMAN AHLAGY
Enesiň (radyýAllahu anhu) rowaýat etmegine görä Pygamber (sallaLlahu aleýhi we sellem) aýtdylar: „Musulman özüne isleýän zadyny beýleki musulman doganyna islemeýän bolsa, ol kämil iman etdigi bolmaz“. (Buhary).
HADYS 16.
GÖRIPLIK
Abdullah ibn Mesuddan (radyýAllahu anhu) rowaýat edilmegine görä Resulullah (sallaLlahu aleýhi we sellem) şeýle aýdýar: „Hiç kime göriplik etmäň. Göriplik diňe şu iki ýagdaýda dürsdir (ýagny günä däldir). 1)Allahyň (jelle jelaluhu) baýlyk beren bendesi we şol baýlygyny diňe haýyrda sowýan adama. 2)Allahyň (jelle jelaluhu) hikmet beren we şol hikmeti bilen amal edýän, başgalarada öwredýän adamsyna.“ (Buhari)
HADYS 17.
YSLAMDA KYNÇYLYK DÖRETMEZLIK BARADA.
Enes (radyýAllahu anhu) rowaýat etmegine görä Pygamberimiz (sallaLlahu aleýhi we sellem) buýurdylar: „Buşlaň! Ýigrendirmäň (ýagny Yslama ýigrenç döretmäň), Ýeňilleşdiriň! Kynlaşdyrmaň (kynçylyk döretmäň). “ (Buhary).
HADYS 18.
GÖZEL AHLAK BARADA
Resulullah (sallaLlahu aleýhi we sellem) aýtdylar: „Siziň iň gowy imanlyňyz, iň gözel ahlagy bolan mu'mindir. Araňyzda iň gowylaryňyz aýallaryňyza iň gowy gatnaşanyňyzdyr“. (Tirmizi).
HADYS 19.
TEKEPBIRLIK
Abdulla ibn Mesud (radyýAllahu anhu)-dan rowaýat edilmegine görä Pygamberimiz (sallaLlahu aleýhi we sellem) aýtdylar: „Kimiň kalbynda bir tozan ýalyja tekepbirlik bolsa, ol Jennete girmez“ diýdiler. Şony eşiden adam şeýle diýdi: „Ýa Resulullah (sallaLlahu aleýhi we sellem) öz eşigiň ýada köwüşiň owadan bolmaklygy tekepbirlige girýärmi?“. Onda Resulullah (sallaLlahu aleýhi we sellem) aýtdylar: „Hakykatdanam Allah (jelle jelaluhu) gözeldir, gözelligi hem söýýändir, emma tekepbirlik bolsa hakykaty kabul etmezlik we adamlara göwniýetmezçilik etmekdir“. (Muslim rowaýat edýär).
HADYS 20.
EDEP BARADA
Ebu Hureýradan (radyýAllahu anhu) rowaýat edilmegine görä Pygamberimiz (sallaLlahu aleýhi we sellem) buýurdylar: „Pallamak şeýtandandyr. Eger biriňiz pallasyňyz gelse, pallamagyňyzy saklajak boluň, saklap boldugyndan. Sebäbi sizden biriňiz pallap „Ah“ diýende şeýtan şonuň üstinden güler“. (Buhary).

HADYS 21.
AGŞAMLYK NAHAR
Enes bin Mälik (radyýAllahu anhu)-dan rowaýat edilmegine görä Resulullah (sallaLlahu aleýhi we sellem) aýtdylar: „Eger agşamlyk naharyňyz namaz wagty taýýar bolsa, onda agşamlygyňyzy namazdan owal iýiň we nahar iýeniňizde howlukmaň“. (Buhary rowaýat edýär).
HADYS 22.
SEJDEDE DOGA ETMEK BARADA
Resulullah (sallaLlahu aleýhi we sellem) bir hadysynda şeýle buýurýar: „Guluň (bendäniň) Robbuna iň golaý bolan wagty, onuň sejdä baran wagtydyr. Şonuň üçin sejde halatynda Oňa (Allah j.j.) köpräk dileg ediň“. (Muslim).
HADYS 23.
ADAMLAR BILEN GATNAŞYK
Bir gün sahabalar Resulullah (sallaLlahu aleýhi we sellem)-den soradylar: „Ýa Resulullah (sallaLlahu aleýhi we sellem) bir aýal bar, ol gijelerine namaz okaýar, gündizlerine bolsa agyz bekleýär we ýagşy amallar edýär, sadaka berýär. Ýöne ol goňşylaryna ýaman sözler aýdýar“. Resulullah (sallaLlahu aleýhi we sellem) bolsa: „Onda haýyr (ýagşylyk) ýokdyr we ol Oda (Dowzaha) düşjeklerdendir“ diýipdir. Onda sahabalar şeýle diýdiler: „ Ýa Resulullah (sallaLlahu aleýhi we sellem) başga bir aýal maşgala bardyr, ol diňe farz namazlaryny okaýar we garyplara guradylan (düýe süýdinden ýasalan) gurt paýlaýar. Ýöne ol hiç kimiň göwnine degenok“. Pygamberimiz (sallaLlahu aleýhi we sellem) buýurdylar: „Ol Jennete girjeklerdendir“. (Buhary).
HADYS 24.
EZÝET ÇEKMEK
Resulullah (sallaLlahu aleýhi we sellem) buýurdylar: „Her bir ezýet çekýän musulmanyň Allah (jelle jelaluhu) hökmany suratda agaçdan ýapraklaryň dökilişi ýaly günälerini döker“. (Buhary rowaýat edýär).
HADYS 25.
PYGAMBER (sallaLlahu aleýhi we sellem) AHLAGY
Aýşa (radyýAllahu anhu) enemizden rowaýat edilmegine görä Pygamberimiz (sallaLlahu aleýhi we sellem) buýurdylar: „Söweş halatyndan başga (Allah j. j ýolundaky söweş) Ol öz gul-gyrnak we aýallaryndan hiç kimi eli bilen urmaýardy. Olar oňa nähili ýamanlyk etseler hem, Ol hiç wagt olardan ar aljak bolmaýardy. Diňe Allah (jelle jelaluhu) çäkleri bozulan wagtynda Ol Allah (jelle jelaluhu) üçin ar alýardy“. (Müslim)
HADYS 26.
MUSULMAN AHLAGY
Resulullah (sallaLlahu aleýhi we sellem) aýtdylar: „Mu'min adama adamlary masgara etmek, olary lagnatlamak, ahlaksyz (gelşiksiz) hereket etmek gelişmez (ýaraşmaz).“
HADYS 27.
MUSULMAN-MUHAJIR
Amr ibn As (radyýAllahu anhu) rowaýat etmegine görä Resulullah (sallaLlahu aleýhi we sellem) buýurdylar: „Musulman şeýle adamdyr, ol başga musulmana öz dili we eli bilen ezýet (ýamanlyk) bermez. Muhajir bolsa, Allahyň (jelle jelaluhu) gadagan eden zatlaryny etmäni terk eden adamdyr“. (Buhary).
HADYS 28.
SABYR HAKDA
Enes ibn Mälik (radyýAllahu anhu) rowaýatyna görä Pygamberimiz (sallaLlahu aleýhi we sellem) aýtdylar: „Hakykatdan hem sabry iň köp adam başyna kynçylyk gelen wagtynda sabyr eden adamdyr“. (Buhary rowaýat edýär).
HADYS 29.
NESILLER
Abdullah ibn Mesudyň (radyýAllahu anhu) rowaýat etmegine görä, Resulullah (sallaLlahu aleýhi we sellem) buýurdylar: „Adamlaryň iň gowylary meniň döwürdeşlerimdir (ýagny sahabalarym), soňra olardan soňra geljeklerdir (ýagny tabiynler), soňra bolsa olardan soňky geljeklerdir (ýagny etbau tabiynler). Olardan soňra şeýle adamlar dörär! Olaryň şaýatlygy kasam-andlaryndan öňde geler, kasam-andlary bolsa şaýatlyklaryndan öňde geler“. (Buhary).
HADYS 30.
TAKDYRA RAZY BOLMAK BARADA
Ebu Hureýra (radyýAllahu anhu) rowaýat etmegine görä Pygamberimiz (sallaLlahu aleýhi we sellem) buýurdylar: „Saňa peýdaly boljak zada ymtyl, Allahdan (jelle jelaluhu) ýardam dileg et we elleriňi goýberme. Eger başyňa bir bela-beter (ýagny musybet) gelende „Men şeýden bolsadym“ diýme, sen şeýle „Allahyň (jelle jelaluhu) ýazgydydyr we Ol islänini etdi“ diý. Sebäbi şeýtsedim-beýtsedim sözleri şeýtanyň işlerine ýol açýar“ (Müslim rowaýat edýär).
HADYS 31.
DILEG ETMEK BARADA
Resulullah (sallaLlahu aleýhi we sellem) buýurýar: „Allaha ýüzlenmek, başyňa gelen betbagtçylyga garşy kömek edişi ýaly, Oňa entäk gelip degmedik kynçylyklary (belalary) hem gaýtarar. Şonuň üçin Allahyň (jelle jelaluhu) gullary, siz Allaha (jelle jelaluhu) dilegler bilen ýüzleniň“. (Tirmizi, El-Häkim, Ahmad).

HADYS 32.
KYÝAMAT GÜNI
Resulullah (sallaLlahu aleýhi we sellem) bir hadysynda şeýle aýdýar: „Kyýamat güni adamyň aýaklary ýerinden butnadylmaz tä şu soraglara jogap berinçä. Ýagny ömriňi nämä sarp etdiňiz? Amallary barada, näme işler etdiňiz? Baýlygy barada (mal-mülki) nädip gazandyňyz we nämä sowdyňyz? Bedeni barada nänä ulandyňyz?“. (Tirmizi rowaýat edýär).
HADYS 33.
MUSULMANYŇ AR-NAMYSY
Ebu Hureýra (radyýAllahu anhu) aýtmagyna görä Resulullah (sallaLlahu aleýhi we sellem) şeýle buýurýar: „Musulman doganyna, onuň ar-namysyna ýada başga zadyna degip bir adalatsyzlyk eden derrew (şu güniň özinde şol adalatsyzlygyndan) el çeksin! Dinar we dirhemler ýitmezden owal, sebäbi kyýamat güninde (direlme güninde) onuň ýagşy amallaryndan alnyp, adalatsyzlygynyň agyrlygyna görä şol göwnine degilen musulmana berler. Egerde onuň sogap işleri gutarsa (bolmasa), onda göwnine degilen musulmanyň günälerinden alynyp şoňa ýükleniler“. (Buhary rowaýat edýär).
HADYS 34.
AHLAKDA-HIKMET
Abdylla ibn Mesud (radyýAllahu anhu) rowaýat etmegine görä Pygamberimiz (sallaLlahu aleýhi we sellem) buýurdylar: „Eger siz üç kişi bolup duran bolsaňyz, goý araňyzda ikiňiz üçinjiň ýanynda pyşyrdaşmasyn, tä başga adamlara goşulýançaňyz. Sebäbi şeýle etseňiz ol (üçinji ýoldaşyňyz) göwün eder“. (Buhary-Müslim)
HADYS 35.
SADAKAÝI JARIÝE
Enes ibn Mälik (radyýAllahu anhu) aýtmagyna görä Resulullah (sallaLlahu aleýhi we sellem) aýtdylar: „Musulmanlaryň biri agaç ekse ýada başga bir zat ekse we şol eken zadyndan guş, adam ýada haýwan iýse, şol eken adama sadaka hökmünde ýazylar“. (Buhary rowaýat edýär).
HADYS 36.
BÄŞ NYGMATYŇ GADRY
Pygamberimiz (sallaLlahu aleýhi we sellem) bir hadysynda şeýle buýurýar: „Bäş zat gelmänkä, şu bäş zadyň gadryny biliň: 1) Garyplyk gelmezden owwal baýlygyň gadryny. 2) Size kesel gelmezden owwal saglygyň gadryny. 3) Biderek wagtyňyzy geçirmän (başagaýlyk gelmänkä) boş wagtyň gadryny. 4) Garrylyk gelmezden owwal ýaşlygyň gadryny. 5) Ölüm gelmezden owwal bolsa, ömrüňiziň gadryny biliň“.
HADYS 37.
DOGANLYK HAKYKATY
Abdullah ibn Abbas (radyýAllahu anhu) rowaýat etmegine görä Resulullah (sallaLlahu aleýhi we sellem) şeýle buýurýar: „Öz doganyna kömek etmek üçin (onuň kynçylyk-kemçilik gününde) bir musulman ýola çyksa, bu 10 ýyl metjitden çykman ybadat etmek ýalydyr. Kim metjitde Allahyň (jelle jelaluhu) razylygy üçin ýekeje gününi geçirse, Allah (jelle jelaluhu) şol adamy Alawdan (Dowzahdan) üç çukur daşlaşdyrar. Şol çukurlaryň her biriniň ini bolsa Gündogar bilen Günbatar aralygy ýalydyr“. (Taberani rowaýat edýär).
HADYS 38.
DOGANYŇA ÝARDAM
Resulullah (sallaLlahu aleýhi we sellem) bir hadysynda şeýle buýurýar: „Haýsy hem bolsa bir ynsan musulmanyň mertebesini peseldip, namysyna degilýän ýerde şol musulmany goldamasa (kömeksiz goýsa), Allah (jelle jelaluhu) şol adamy oňa ýardam gerek ýerinde ýardamsyz goýar. Eger-de şol musulmana adamlardan haýsy hem bolsa kömek etse, Allah (jelle jelaluhu) şol kömek eden adama ýardama mätäç bolanda ýardam eder“.

HADYS 39.
JENNET GAPYLARY
Resulullah (sallaLlahu aleýhi we sellem) bir hadysynda şeýle buýurýar: „Men Jennetde lezzetlenýän bir adam gördüm. Ol bir agajyň kölegesinde dynç alýardy. Şol agajy ol dünýäde çapyp aýyrdy, sebäbi ol agaç musulmanlara päsgel (zyýan) berýärdi“. (Müslim rowaýat edýär.)
HADYS 40.
YLYMDA ÜÇ TOPAR
Ebu Musa el-Eş'ary (radyýAllahu anhu) rowaýat etmegine görä Resulullah (sallaLlahu aleýhi we sellem) şeýle aýdýar: „Allahyň (jelle jelaluhu) meniň bilen size iberen ylym we terbiýesi, ýere ýagan güýçli (bol) ýagyş-ýagmyra meňzeýär. Bu ýerleriň bir bölegi bereketli bolup çykdy. Ol öz içine suwy siňdirdi we şol toprakda köp mukdarda ot we ösümlik ösüp ýetişdi. Şol topragyň ýene bir bölegi bardyr, ol gaty bolup şol suwy öz üstünde saklady we Allah (jelle jelaluhu) olary adamlaryň peýdasyna öwürdi. Adamlar şol suwy içmek üçin ulandylar, mal-garasyny suwa ýakdylar we ekinlerini suwardylar. Ýagyş ýene-de şeýle ýere yagdy, ol toprak çöllük bolup öz üstünde suwy saklamady we şol toprakda hiç zat ösmedi. Şol topraklar şeýle adamlara meňzeýär: 1) Allahyň (jelle jelaluhu) dinine düşündiler we özüne peýda edindiler. 2) Özleri ylym edindiler we başgalara geçirdiler. 3) Özi hem şol zady almady we Allahyň (jelle jelaluhu) ýörelgesini kabul etmedi... Şol ýörelge bilen meni Allah (jelle jelaluhu) size (adamlara) iberdi“.