Jorj Kleýson BÄŞINJI MELHEM Geljegiňiziň girdejisini ýola goýuň

Her adamyň ömri çagalygyndan garrylygyna çenli uzaýar. Biziň geçmeli ömür ýolumyz şeýle. Eger berlen ömri gysga bolup, sanalgysy dolup, ir gitmeli bolaýmasa, hiç kim mundan ýüz öwrübem bilenok. Şonuň üçinem adam geljeginiň aladasyny ýaşka edip goýmaly, gojalanda, hatda dünýeden ötäýse-de maşgalasy hor-zar bolmaz ýaly, girdeji çeşmelerini edinmeli. Bu sapak size haçan-da bir wagtlar sapak almaga, zat öwrenmäge ýagdaýyňyz ýok döwründe-de gapjygyňyzyň nädip doly boljagyny öwreder – diýip, Arkad okuwyň altylanjy güni okuwçylaryna gürrüň berip başlady.
— Baýlygyň bereket tapyşyna düşünip, pul ýygnan adam hemişe geljegi barada pikirlenmelidir. Ol hökman öňünden aladasyny edip, uzak ýyllar ýeterlik girdeji getirjek maýa goýum goýmaly ýa-da haýsydyr bir düzgünleri ugrukdyrmalydyr.
Gowy güzeranly geljege ýetmegiň dürli ýoly bar. Ygtybarly gizlinje ýer tapyp, jemlän puluňy bukubam bolar. Emma hernäçe buky ýerde gizleseňizem, ahyr bir gün ogrulara olja bolaýmagy-da ähtimal. Şonuň üçin men-ä bu ýoldan gitmegi maslahat beremok.
Köp jaý hem ýer satyn alyp bolar. Eger olary oýlanyşykly saýlasaňyz, bahalaryny-da ýitirmese, kireýinden oňat girdeji alarsyňyz ýa-da bir maksat bilen sataýsaňyzam gowuja pul ýasar.
Birazrak puly üsseçä berip, dowamly üstüni dolup bolar. Ol puluňyz göterimi bilen bilelikde barha göterler, artar. Men Ansan atly bir köwüş ussasyny tanaýaryn. Ol arada sekiz ýyllap her hepdede üsseçä iki kümüş pul berendigini gürrüň beripdi. Bir-iki günlükde üsseçi puluň göterimi bilen jemini hasaplapdyr welin, ep-esli bolaýan eken ol. Olar, adatça, her dört ýyldan puluň dörtden biri möçberinde üssesini ylalaşypdyrlar. Köwüş ussasynyň almalysy bir müň kyrk kümüş pula ýetäýipdir.
Men onuň eden işini oňladym, goldadym. Soň oturyp hasapladym-da, üsseçä ýene on iki ýyllap her hepdede iki kümüş pul eltip dursa, üsseçiden dört müň kümüş pul alyp biljekdigini aýtdym. Bu pula ömrüň ötýänçä ýaşap bolar. Onda-da gowy durmuşda ýaşap bolar.
Eger şeýle ownuk-uşak süýşürintgilerem şular ýaly gowy girdeji getirýän bolsa, onda her kim näçe gowy girdejili işiniň bardygyna garamazdan, garrylygynyň gamyny iýmäge, maşgalasyny bol-telkilikde ýaşatmaga hökman borçludyr.
Ýene-de bir zady aýtmaly diýip pikir edýärin. Irde-giçde bir akylly kişiniň, hemme adamlaryň ömürboýy ujypsyzja ätiýaçlyk gatanjyny töläp, ahyrynda, ýogalanyň maşgalasyna uly möçberde pul berilmeginiň ugruny tapjagyna ynanýaryn. Men şuny tüýs ýüregimden isleýärin, ýöne häzir bu mümkin zat däl. Sebäbi şeýle ylalaşyklar islendik üsseçiniň ömründenem uzaga gitmeli bolar. Bu şertnama edil patyşanyň tagty ýaly, dowamly hem ygtybarly bolmaly. Şeýle düzgüniň bir döwürde durmuşa geçjegine berk ynanýaryn. Ana, şonda ýogalanyň maşgala agzalarynyň hojalygyň geýregini galdyrjak pul almaga hukuklary bolar.
Ýöne biz geljekde däl-de, şu günki durmuşda ýaşaýanymyz sebäpli, şu gün elýeterli bolan serişdelerden peýdalanmaly. Şonuň üçin men siziň hemmäňize ýaşyňyz gaýdyşyp ugranda gapjygyňyzy haýsy ýol bilen gorajakdygyňyz hakda gowy pikirlenmegi maslahat berýärin. Adam eger iýjek çöregini gazanyp bilmese ýa-da maşgala ekleýjisini ýitirse, uly betbagtlyk gopjagy mälim ahyry.
Ine, size igli gapjyk üçin altynjy melhem: garranyňyzda özüňize we maşgalaňyza zerur boljak harajatlar hakda öňräginden alada ediň.

(Dowamy bar)
Terjime eden: Arslan Alaýew.

Biznes we motiwasiýa