Geljekden görünen gözýetim...

Zamana azdy doganlar,
Ýagşy-ýamanlar deñ bolar,
Dogry zatlar az sözlenip,
Ýalan söz ile ýoñ bolar.

Alladan gorkmaz bendesi,
Galñadar kisäñ teññesin,
Ýakymly günüñ şöhlesi,
Yrgyldap ýanýan şem bolar.

Azgynlar köpeler has-da,
Sowatlylar durar pesde,
Günä galñar esse-esse,
Döwrümiz barha geñ bolar.

Akmaklar galdyrlar arşa,
Galamlar ýalan zat çyrşar,
Ýer ýüzüni duman gurşap,
Azan sesleri kem bolar.

Sylag-hormat gaçar ilden,
Gybat, töhmet bolar dilde,
Güýç-kuwwat galmaz hiç bilde,
Haramlyk ýara em bolar.

Dert belalar dolar başa,
Öwrüler ýazymyz gyşa,
Üns berilmez her işe,
Alymlañ agzy sem bolar.

Boş keýpe ylgar juwanlar,
Azalar kalbyn ýuwanlar,
Ene perzende guwanmaz,
Bilmen guwanjak kim bolar.

Köpeler Zöhresiz Tahyr,
Azalar hakyky şahyr,
Şeýdip bolar zaman ahyr,
Ýagty dünýämiz tüm bolar.

Awtory: Baýram Bejidow