GÜLJAGAZ🌹 BILEN SUW💧

Gül bilen suw tapyşyp, dost bolupdyr. Bir-biri bilen ysnyşyp, bir-birlerine mähir-muhabbet eçilipdir. Bir gün güljagazyň dostlugy söýgä öwrülipdir, ol suwa çyn aşyk bolupdyr. “Saňa bolan söýgümiň hormatyna” diýip, herýana hoş-boý ysyny ýaýradypdyr. Suwuň hem kalbyny haýsydyr bir düşnüksiz duýgy terpendirip ugrapdyr. Ol güle aşyk bolanyny magat göz ýetiripdir. Ýöne güljagaz “Ol meni söýýärmikä?” diýip, gam-gussa batýar eken. Güljagaz suwa “Men seni söýýän” diýse, suw hem oňa “ Men hem seni söýýän” diýip jogap berýär ekeni. Aradan esli salym geçensoň gül ýene-de oňa “Men seni söýýän” diýse, suw oňa ýene-de “Men hem seni söýýän” diýip jogap beripdir. Güljagaz örän sabyrlydy. Garaşýardy, garaşýardy, garaşýardy... Ahyry güljagaz halys tapdan düşüp, daş-töweregine ysyny ýaýratmagy hem bes edip, iň soňkyja sapar suwa “Seni söýýän” diýipdir. Suw hem oňa “Aýtdyma saňa, men hem seni söýýän” diýip jogap beripdir. Güljagaz şondan soň süllerip, saralyp ugrapdyr. Indi güljagaz düşege baglanyp ýatyrdy. Suw hem onuň başynda oturyp, söýgili ýarynyň derdine derman bolmaga çalyşýardy. Gül kynlyk bilen başyny galdyryp suwa ýene-de “Men seni çynym bilen söýýän” diýipdir. Suwuň ýüregi onuň bu sözlerine para-para bolup, güljagazy halas etmek üçin lukmana ýüz tutupdyr. Lukman güljagazy gözden geçireninden soň “Ýagdaýy agyr. Biziň elimizden geljek zat ýok!” diýipdir. Lapykeç bolan suw ahyry lukmandan ýarynyň keseliniň nämedigini sorapdyr. Lukman suwa: “Güljagazyň hiç keseli ýok, gardaş. Ol diňe suwsuz galypdyr” diýip jogap beripdir. Suw bar zada düşünipdi. Söýgüli ýaryňa diňe “ Seni söýýän” diýeniň ýeterlik däl ekeni.