Könäniň soňy, boşluk we täze…

Gün ýaşyp barýar. Çuň we päk asmanyň ýüzünde garaja nokat bolup görünýän guşlar çar tarapa gidip barýalar. Suwuň kenarynda sessizlik. Olar bolsa uzaklara gidip barýarlar…
 
Ýöne birhili hasratly duýgy bar. Olar bir zadyň gutarandygyny aýdýarlar, täze bir zadyň bolsa başlandygyndan habar berýärler.
 
Olar gidenden soň asmanyň ýüzi ep-esli wagt boş galar, muny bilýän. Asmandaky boşluk bilmeýän zadyna garaşar durar. Bu boşluk – özümize ýakyn duýýan adamlarymyzdan aýrylan pursatymyz bilen entek kimdigini bilmeýän geljekki ýakynlarymyzyň arasyndaky boşluk. Uzaklaşyp barýan guşlary görýän, ýöne täze bir zadyň ýakynlaşyp gelýändigini aýdýarlar. Ýöne gidenleri hem tanaýaň.
 
O täsin mawy asmana indi täze guşlar geler, asmanyň reňki üýtgär. Bulutlar hem bolar, ýagyş hem ýagar, ýaz we güýz güneşi hem ýer ýüzüne yşyk saçar.
 
Öwrenişen zatlaryňdan aýrylmak aňsat däl. Öňdäki günlere garaşmak bolsa tolgundyrýar. Ikisiniň arasynda juda çuň we ýalňyz galan asman ýaly hasratly bir boşluk bar. Wagtyň öz tizligini haýalladýan pursaty öýdýän…bilmedim.
 
Köp adamlar şular ýaly boşlukda geljege garaşmaga sabyr takady ýetmänsoň ýalňyş hereket edip geçmişi täzeden janlandyrmak üçin jan edýärler. Emma durmuşyň düzgünleri dury suw ýaly aýdyň. Gitmeli wagty gelen gidýär. Boş galan asman ýaly täze geljeklere hem garaşýaň. Hasrat bilen, tolgunmak bilen, sabyr bilen garaşýaň.
 
Gitmegiň öz döwri bar, täze gelýänleri garşylamagyň hem öz wagty bar. Edil gum-gukluk asman ýaly boşlukda garaşmagyň hem öz wagty bar.
 
Gidenleri bilýäs. Sesleri, pyşyrdylary, ýylgyryşlary, owazlary örän tanyş we ýakyn. Gidip barýarkalar bize degen ýerlerini öz ýanlary bilen goparyp alyp gidýärler. Goparyp alanlarynda erbet agyry duýýas.
 
Guşlar bilen hoşlaşan asman ýaly içimizde hem üýtgeşik bir boşluk döreýär.
 
Hemişe ýeke galmakdan gorkýaň. Soň bolsa iki-ýeke täze kepderiler, durnalar peýda bolýar asmanda. Soň bolsa saýraýyşlary üýtgeşik görünýän täze guş sürüsi. Täze gelýänleri tanamyzok. Ýüzleri nähili, sesleri nähili, gynananlarynda nähili bolýarlar, begenenlerinde nähili – muny bilemzok.
 
Täze ýylgyryşlara öwrenişmeli bolýaň.  Sözleri başga görnüşde hem aýdyp bolýandygyna göz ýetirýäň. Şu wagt nätanyş başga bir beden belli bir wagt geçensoň ýanyňa ýakynlaşanda bir nätanyşdan ýakynlygyň we söýginiň, hormatyň döräp bilýändigi geň galdyrar.
 
Giden guşlara seredýän hasrat bilen. Ýuwaşlyk bilen daşlaşyp barýarlar. Her zadyň öz gitmeli wagty bar. Täze geljekleri hem garşylamagyň öz möwsümi bar. Täze gelýänler diňe sabyr bilen garaşmagy bilýänlere gelýär.
 
Garaşmaly, täze we gowy günler gelýärler.