Alyslarda galan yar

Säher salamy
Ir säherler çykyp salkyn eýwana,
Daňyň atyp gelşin ýakyndan gördüm.
Daň salamyn ýollap çygly otlara,
Bileje çekişdim guşlaryň
“derdin”.

 Alys gözýetimiň syryp gaýmagyn,
 Günüň dogup gelişin ýakyndan gördüm.
Köçe suwlap ýören garry aýala,
Säheriň ilkinji salamyn berdim.

Kem-kemden bugaryp, galyp tirsege,
Oýanýan topraga garaşdym durdum.
Ýaňy dömüp çykan guşgursak dänäň,
Dömüp çykyşyny ýakyndan gördüm.

Şeýdip daň-säheriň çygly howasyn,
Säher bilen pyýalalap gönderdim.
Ýakynlaşdygymça…
Maňa ozaldan
Ýakyn bolan zatlaň baryny gördüm.

Derýalar
- Bir ýyl däl,
On ýyl däl,
Tutuş asyrlap,
Peýwagtyna akyp ýatan derýalar!
Gije diýmän,
Gündiz diýmän,
Hasyrdap,
Munça suwy nira alyp barýarlar!

Bular näçe ýyllap atdylar owsun,
Hany bulaň öňi,
Nirede ardy?
Bu gyýçak daşlaň paralap göwsün,
Bu tekiz gyrlaryň bagryn kim ýardy?!

Bular haýsy ataň maňlaýnyň deri,
Bular haýsy enäň gözüniň ýaşy?
Bular haýsy ýigdiň ýüregniň syry,
Bular haýsy gyzyň ýüregniň nagşy?

Şatlykmy, gussamy, bagtmy, aýralyk,
Ýa-da uzaklara atylan peýkam?
Ýa-da magşugyndan baky aýrylyp,
Gije-gündiz dynman çalynýan mukam?

...Birden äpet gomlar güwläp akdylar,
Akdylar-da pytradylar bada-bat.
Soňra ýuwaşjadan çawuş çakdylar,
“Bolup bilsek biz bi ýönekeý şaýat...”

Kepemeýär derýalaryň suwlary,
Belent - belent daglar olaň gözbaşy.
Daglardanam beýik ýürekden çykýar,
Eneleriň egsilmejek gözýaşy.

Bu gözýaşlar köp döküldi ozallar,
Bu garabagyrlar öňdenem kebap.
Indi berin bir bolgusyz zat üçin
Onuň dökülmegne bolmalyň sebäp.

Olar ynjasalar aglarlar hökman,
Olar begenseler aglarlar hökman.
Ýagşymy siz, ýamanmy siz, barybir,
Şu ýönekeý hakykaty unutmaň.

Güneş dänesi dek bu gözýaşlary,
Bir bolgusyz galmagala satmalyň.
Diňe begenende aglary ýaly,
Olary hemişe aýap saklalyň.

Kepemesin derýalaryň suwlary,
Ýykylmasyn beýik - beýik gözbaşy.
Şondan beter aýylganç zat barmykan
Dökülip gutarsa ene göz ýaşy?..

ÖMÜR ÝOLDAŞY 
  M.K.  

Gör, nähili gözel eken özüňe,
Ömür ýoldaş gözläp ýören çagalaryň.
Hat ýazarsyň göwün söýen gyzyňa,
Duşuşarsyň arasynda baglaryň.
Şol mahallar kän bir pikir etmersiň,
Öňde uzap ýatan uly durmuşy.
Saňa hem işdädir onuň görünşi,
Saňa hem ukudyr onuň durmuşy.

Sende ýaranjaňlyk keseli dörär,
Sende gabanjaňlyk keseli dörär,
Hatda ýalançylyk keselem dörär,
Garaz, çagalykda bilmeýän zadyň –
Çözülmesi kyn bir mesele dörär.

Onsoň bu mesele çözüler birden,
Ünji-aladadan yrak bolarsyň.
ZAGS-a bararsyň,
Gutlarlar seni,
Ynha şeýdip bir gün ‘’brak’’ bolarsyň.
Onsoň öý hakynda, öý goşy hakda
Çyndan pikir edýän ýigit bolarsyň.
Öňler ýalňyz ýaşan bolsaň dünýäde,
İndi sen dünýäde jübüt bolarsyň.

Onsoň sanyň artar jübüt-jübütden,
Sen gyşam bolarsyň,
Ýazam bolarsyň.
Saýlanyp kakabaş ýigitligiňden,
Sakgally-sarmykly adam bolarsyň.

Şonda ýanyňdadyr ömür ýoldaşyň,
Eýjejik öagalar müner gerdenňe.
Diňe öz çagaň däl, çagalar hakda
Oýlanar ýörersiň her gün, her demde,
Çagalar dünýäsi üýşüp daşyňa
Dünýäň aladasyn salar başyňa...

halyl kuly

Arzuw
Gyzym bolsa, Bahar dakjak adyna,
Goý, ol mydam bahar ýaly şat bolsun.
Her bir işde gorky düşmän ýadyna,
Bagtyýar ýaýnasyn, gorky ýat bolsun.

Kümüş dek guppaly ala daglaryň,
Gatbar-gatbar buzlaryny eretsin.
Çyn bezegi bolup goýry baglaryň,
Sil akdyryp, çölde umman döretsin.

Tisginmän aňzakdan, çekinmän gyşdan.
Sähralarda gül gögerdip, bag eksin.
Ýaýdanmasyn başy çyksyn her işden,
Ýadamazdan zähmet çeksin, der döksin.

Isle alym bolsun, isle-de daýhan,
Yhlasly darasyn söýen zadyna.
Her ýerde bahar dek bolsun şadyýan,
Gyzym bolsa Bahar dakjak adyna.

Söýermiň?
Gözelleň ählisin goýup bir ýana,
Seçip-saýlap, seni söýsem, söýermiň?
Ýaz görkiňe aşyk bolup gaýbana,
Gül keşbiňe hormat goýsam, söýermiň?

Gar küräp, tüweleý her ýän çäpanda,
Asman-zemin bir-birini tapanda,
Gazaply aýäzda, apy-tupanda
Ýoluňä seredip, buýsam söýermiň?

Kä açyldyň asman ýaly durlanyp,
Kä gülüp näz etdiň, kä gaharlanyp,
Mübärek gaşyňda her ýan pylanyp,
Perwanalar bolup köýsem, söýermiň?

Jemalyň kalbymda mukam döredip,
Haýran etdiň ýüregimi eredip,
Ýa-da gözleriňe göno seredip:
“Gülüm, seni söýýän” diýsem, söýermiň?

Men seniň aşygyň

Men seniň aşygyň gara gözli ýar,
Daşa gitme, daşa gitme ýanymdan.
Görküňe ömürlik boldum hyrydar,
Hyrydar men baha kesýän janymdan.

Men seniň aşygyň eý açyk asman,
Goý mydam päk bolsun ýüzleriň seniň.
Men seniň aşygyň eý beýik ynsan,
Goý mydama gülsin gözleriň seniň.

Men seniň aşygyň eý gözel görnüş
Sähralar, tokaýlar, derýalar, daglar...
Men seniň aşygyň eý bagtly durmuş:
Ajaýyp döwranlar,sapalay çaglar...

Eý mukaddes ömür-eý eziz myhman!
Eý bilbil, eý bahar, eý şanly ýaşlyk.
Eý şöhratly göreş-belent merdiwan,
Men size bendiwan,
Men size aşyk.

Ýok, hiç haçan diýmerin men „ýadadym“,
Namart bolsun, kim gözlese bahana.
Tä ölünçäm söýmek meniň adatym,
Başdan söýmek üçin indim jahana.

Gijeler

Gün şapagy gyzyl çaýyp asmana,
Kem-kem ýygnap gider zer seçegni.
Ýyldyzlar göz gypyp gülli meýdana,
Mawy asman açar giň gujagyny.
Bulutlar göç eder, derýa möwç alar,
Gijeler, gijeler, gözel gijeler.

Çigit gussa galmaz göwnüňde,
Ýadawlygyň çykyp gider teniňden,
Şunuň dek gijeler çyksaň seýrana,
Mäkäm tutup näzli gyzyň elinden.
Aşyk barha gudrat alar, güýç alar,
Gijeler, gijeler, gözel gijeler.

Ýüreklerde şatlyk bolsun ziýada,
Geliň, dostlar, üýşüp dürler seçeliň.
Aý şöhlesi düşsin gülgün şeraba,
Bu gijeleň saglygyna içeliň.
Men sizi ýaşlykdan söýdüm, gijeler,
Gijeler, gijeler, gözel gijeler.

halyl kuly

Sözler hakynda
Sözler…
Mähek ýaly akylly sözler,
Men-ä sizi ýaşlygymydan eý görýän.
Şonuň üçin danalara eýgerýän.

Sözler…
Bahar ýaly mylaýym sözler,
Men sizi-de ýaşlygymdan eý görýän,
Şonuň üçin şahyrlara eýerýän.

Şirin sözler tutup meniň elimden,
Ýüreklerden ýüreklere aýlady.
Şirin sözler çykyp meniň dilimden,
Adamlaryň arasyna ýaýrady.

Men mydama şirin sözüň aşygy,
Hoş sözlerde ýürekleriň ody bar.
Armanym galmazdy şeýle sözleri,
Adamalara goýup bilsem ýadygär.

halyl kuly

Ýaşlyk
Läleli bahar sen garly gyş ýaly,
Ýaşlyk bilen garrylykdyr ömrümiz.
Juwanlykda çiginlermiz daş ýaly,
Daglara darasak ýeter emrimiz.

Ýaşlyk bir çabgadyr,
Ýaşlyk bir sildir –
Gudratyndan gülzar bolar çölüstan.
Ýaşlyk atyr saçýan benewşe güldir,
Görki –de gül,
Durky-da gül-gülistan.

Ýaşlyk bir deňizdir, tolkunyp her ýan,
Möwç urar,
Joş alar, öňi baglanmaz.
Ýaşlyk bir derýadyr silkinip barýan,
Çyrpynar-da…
Akar gider eglenmez.

Ýaşlyk bir aýdymdyr, hiňlenseň ony,
Uzaklara ýaýrap, ýaňlanar sesiň,
… eý ýaşlyk, her neneň söýsem-de seni,
Uzak ýaşap, goja bolmak höwesim.

Ölüler bilen diriler
Adamlar bölünýär iki topara,
Birisi-ölüler, biri-diriler.
“öli köpmi, diri?” diýip sorama-da,
“öli köpräk bolaýmasyn” diýdiler.

Adam ogly asyrlaryň içinde,
Ençe gezek ganly dawa baş goşdy.
Gör, näçesi geçen urşuň özünde
Dünýä bilen ebedilik hoşlaşdy.

Ine, şeýle gowgalary ýat edip, 
Oýlanyň-da öz-özüňiz biliberiň.
Bilsem-de men ölenleriň köpdigin.
Hemmesine öli diýip bilmerin.

Hak iş üçin gurban bolan ärleri,
Ilim-günüm ýaşadyp ýör arada.
Öli däldir ölenleriň hemmesi,
Diri däldir dirileň käbiri-de.

Entek-entek şol dirileň içinde
Bir mahallar ölüp giden diri kän.
Öli bolup gitmez ýaly ölen-de
Diri bolup ýaşamaly dirikäň.

Gije geçip gitdi ýuwaş-ýuwaşdan,
Kakdy äpişgäni ak donly säher.
Hawa, şahyr, turan bolsaň daşa çyk,
Bu gün seniň bilen gepleşjek bahar.

Bu gyzgyn sährany, çygly topragy,
Ol eýýäm gül bilen edip edip taryp.
Diňlesin bu sesi ýakynlar-ýatlar,
Alyslar gulagyn öwürsin bäri.

Uzaklarda joşýan çaýlar-çeşmeler
Ýaz damajasyn bagyşlasyn sähere.
Aýdyma gelenler, söze teşneler
Pikir beriň: söz berilýär bahara.

Ukudan açyldym ulydan pallap,
Maňa geň göründi ýazyň gylygy.
Ony wasp etjekdim
Ol bolsa eýýäm
Elimden alypdyr şahyrçylygy.

Waspnama
Kimler siziň saçyňyzy gulaçlap,
Kimler size “aýym-günüm” diýipdir.
Şeýdip on bäş ýaşly Geýneden başlap,
Ýetmiş ýaşly Gýötä çenli söýüpdir.

Aýallaň görküne mynasyp baha,
Berip bilmese-de käbir erkekler.
Boýun alman durup bilmez asyl-ha,
Olar näme gördi entek-entekler.

Garagumyň ýalyn ýaly çoguny,
Polat kimin bedenlere siňdiren.
Çagalarmyz kaka diýip aglanda,
Sizdiňiz şol “Gelýär” diýip diňdiren.

Sizdiňiz şol siziň üçin gan döken,
Gerçekleriň töýs mynasyp dost-ýary.
Watan ogly Watan üçin jan çeken,
Çagalaryň, garrylaryň hossary.

“Aýym” diýip, “Günüm” diýip köp şahyr,
Size bägüllerden örtsede örtük.
Özüňüz hakdaky beýik goşgyny
Özüňüz ýazdyňyz hemmeden artyk.

Mikroraýonda ýaşaýan altmyş ýaşly 
gojanyň aýalyna aýdany

Ak gara duwlanyp gelende ýanwar,
Doňanda ýaplaryň durnagöz suwy.
Jaýymyz sowuk-diýip,
  Gam çekme dildar,
Her näme diýseňem daşardan gowy.

Birinjiden, munuň şemaly bolmaz,
Şemalsyz sowugyň azary bolmaz,
Üstüňi gar örtjek gümany bolmaz,
Her näme diýseňem daşardan gowy.

Ikinjiden, tagta poldur aşagy,
Aşak dürüs bolsa besdir gyş aýy,
Şulardan soň, onsaň nädip üşäli,
Her näme diýseňem daşardan gowy.

Batareýa bary hatarma-hatar,
Üstün gyrawladuyp pikire batar.
Ynha, hä diýmänkäň aprelem ýeter,
Her näme diýseňem daşardan gowy.

Altmyşyň ýelgini eliňdekä ýar,
Gam çekmegin, gama batma giriftar,
Esasy zat öýümizde ýorgan bar,
Her näme diýseňem daşardan gowy.

🙂

Degişme
(Edebi parodiýa)

Wysalyňa ýetýänçäm,
Jemalyňdan doýmaryn.
Kino, teatr diýip,
Öz ugruňa goýmaryn.

Bu dünýäde naýbaş sen,
Hem görk, hem görmekde.
Wysalyňa ýetýänçäm,
Aýlanaryn turnikde.

Bahar pasly çykanda,
Kömelekler bilaryn.
Wysalyňa ýetýänçäm,
Kebelekler bolaryn.

Dörederin aýdymny,
Çalaryn men sazynam.
Wysalyňa ýetemsoň,
Görüberýäs yzynam...

gaty gowja goshgular yazylypdyr. Sagja bolun hemmanize. Kopya edendirin, rugsatdyrla 🙂

sagja bol dos gowja goshgular yazypsyn ellerine guller

http://www.teswirler.com/index.php?q=blog&view=8814

ŞАHYRYN, ÝOLY
Ýollаrа mеňzеşdir şаhyryň ýoly, 
Miltiň bоlsа, gоýbеr sеnеm аtyňy. 
Rоwgаtyň bаr bоlsа götеrеr ýaly, 
Götеr zаmаnаnyň hакyкаtyny.

Sаrgyt eýlеsеlеr uzак illеrе, 
Аgyrtmаn-ynjаtmаn ýеrinе ýеtir. 
Sеni ugrаdýanlаň аlyp аlкyşyn, 
Sаňа gаrаşýanlаň pаýyny gеtir.

Şоl uzаp оturаr mаwy gеzýеtim, 
Ýetеrliк аzygyň-suwlugyň bоlsun. 
Hа ýoldа bоl, 
Hа düşlеgdе— pаrhy ýoк, 
Ýanyňdа mydаmа Gowlugyň bоlsun.

Özüniň şоl bеlеnt gоwluк кеsbiňi 
Gоrаp gеz hеmişе ýigrеnjilеrdеp. 
Sеniň аslyň gоwluкdygyn unutmа, 
Däl аhyr sеn täzе öwrеnjеlеrdеn.

Eý, кöňül!
Eý, hеr dеm hyýally кöňül,
Dаýymа bаryny, ýoguny аçаn.
Öwüt bеrýär diýip, göwün etmе bu gün,
Кyrкymdа bеrmеsеm bеrеýin hаçаn?

Hаlаllyкdаn, tämizliкdеn, ynsаpdаn
Egsilmеsin egniňdäкi gоş hаltаň.
Ýaşаp gеldin ynаm diýlеn zаt bilеn, 
Еnе şоldur sеniň şu günüň, ertäň...

Ýollаrа mеňzеşdir şаhyryň ýoly, 
Önündе mеnzillеr hаtаrmа-hаtаr. 
Ýönе sähеl аhmаl gаlsаň bu ýoldа, 
Bir çаmаn ýabyly yzyňdаn ýеtеr.