SENİÑ ÝİGİT WAGTYÑ, MENİÑ ÝOK WAGTYM.

(K.Gurbannepesowa)

Namysdan, ahlakdan dok eken dünýä,

Seniñ ýigit wagtyñ, meniñ ýok wagtym.

Päk durmuşa sarplananmyş himiýa,

Seniñ ýigit wagtyñ, meniñ ýok wagtym.

Aç däl eken adamzadyñ garagy,

Dür sözlerden düzülenmiş ýaragy,

Diñe erkek geýenmişin balagy,

Seniñ ýigit wagtyñ, meniñ ýok wagtym.

Zenanlaryñ ýakasy berk ýapylyp,

Öpülse-de ýañagyndan öpülip,

Salam berer eken gelin epilip,

Seniñ ýigit wagtyñ, meniñ ýok wagtym.

Arzan eken kellelerden telpekler,

Bähbit üçin dostlaşmandyr erkekler.

Tapylypdyr kyn günde jan berjekler,

Seniñ ýigit wagtyñ, meniñ ýok wagtym.

Kem bolupdyr gülmäge ýer ýarygy,

Berk bolupdyr agyzlaryñ körügi,

Gysylmandyr mert köpegiñ guýrugy,

Seniñ ýigit wagtyñ, meniñ ýok wagtym.

"Terakt" atly "oýun" gördük ulalyp,

Allañ adyn bet işlere ulanyp,

Ýörmändirler nähak gana bulanyp,

Seniñ ýigit wagtyñ, meniñ ýok wagtym.

Halkymyz bir elden erkin bermesin,

Goşaryny halal üçin çermesin,

Türkmen bagtly, Ýaradan köp görmesin,

Meniñ ýigit wagtym, seniñ ýok wagtyñ.