goshgy!

Köne tort
Adamlar bu torty ozalam iýdi,
Özem bir gün, iki gün däl, hepdeläp,
Aýlap, ýyllap iýdirdiler zor bilen,
Iýmejek bolany etdiler heläk.
Adamlar bu torty ozalam iýdi,
Çünki berýärdiler agzyňa dykyp;
Ýöne ony iýip, siňdirip bilmän,
Käbirleri gaçdy obadan çykyp.
Adamlar bu tortdan doýdular gäbe,
Hatda ondan aşa düşen, ölen bar.
Ýaşlyk edip, tortdan gutuljak bolup,
Gerrä urup, ölmez-gülmez bolan bar.
Bir gün ussat tortçy ýykyldy dadyp,
Öz tortundan, uýup özgäň sözüne.
Adamlar begenip jaýlady ony,
Zoraýakdan ýaş inderip gözüne.
Arman adat, tortçy gerek her oba,
Ýene biri orta çykdy abşaryp.
Adamlar diýdiler: “Muň torty, belki,
Özalkyňka görä bolsun ýagşyrak.”
Täze tortçy adyn üýtgedip köne,
Wagty geçen torty getirdi bezäp.
Adamlar ýene-de iýdi o torty,
Sebäp durdy tortçy taýagyn gezäp.
Adamlar bu torty ozalam iýdi,
Sebäbi iýmedik bolýardy duşman.
Öz obaňda duşman bolup ýörenden,
Tort iýeniň gowy etseňem puşman...

Dogry söz
Dogry sözüň peýdasy ýok, nepi ýok,
Onuň dogrulygyn bilen bolmasa,
Hem alan bolmasa howadan gapyp,
Tersine, oň zyýany bar aýdana,
Ýüregin bularlar gaçsa-da tapyp,
Ar alarlar soňsuz dogry söz üçin,
Ynjalmazlar hatda ölüp gidenden,
Ýöne dogry sözi aýdan ölse-de,
Dogry sözüň özi ölmez hiç haçan,
Hem ar alar özün inkär edenden...

Bilimli we nadan
Bilimliň nadana nebsi agyrar,
Hem bir zatlar bildirjek bor başarsa.
Emma öte nadan öwrenjek bolmaz,
Gaýta pikir eder bileni gyrsa,
Ýok etse öz haly ganymat bolar,
Hem daşyna nöker toplar nadandan,
Bileniň aýagyn köwmäge üýşüp,
Bu bir tazelik däl, gelýän zat öňden...

Taryh we şu gün
Taryhy dogruçyl ýazmaly, dogry.
Ýöne şu gün ýalan bilen doluka,
Diller daňylgyka, sözlemez ýaly,
Gözler daňylgyka, gözlemez ýaly,
Aňsyz çörek ýerne iýýärkä aly,
Aňly öz etini iýýärkä gowrup,
Geçmişi nähili ýazarsyň doly,
Asyrlara urup döwülen dişiň,
Şu taýy azajyk çatak bu işiň...

Ene bolsaň, ata bolsaň
Ene bolsaň, ata bolsaň,
Çagaň göwher ýyllaryny,
Altyn ýyllaryn ýele,
Tozana sowurma nadanlyk bilen,
Kümüş ýyllaryny talama çagaň,
Eline kitap ber, pil-kätmen ýerne,
Bekemedik bile agramyň atma,
Bekemedik beýnä berme ejiri,
Kitap ber, depder ber, açjak bol gözün,
Göreş çagaň üçin, garyma girip,
zürýadyň darkaşa iberme ýerňe,
gowaça ýa bazar meýdanlarynda,
çagaň göwher ýyllaryny,
altyn ýyllaryn ýele,
tozana sowurma, walla, mis ýyllar
gelenden soň ah çekeniň giç bolar,
sen sebäpli çagaň ömri puç bolar.

Çapak-çapak, aksakgal!
Çapak-çapak, aksakgal,
çapak-çapak, ýaşuly!
Eliň agyrsa – saklan,
ýa sylasaň ýaşyňy!
“Altyn asyr” – açlykdan
aman galypsyň, dogry.
Ýöne seret, azmy, kän
biwagt öteniň gabry!
Belki, şondan ýaltanman
çarpýarsyň eliňi.
Gara gorky baglapdyr
gözüňi hem diliňi.
Çapak-çapak, aksakgal,
çapak-çapak, ýaşuly!
Eliň ýadasa – saklan,
ýa sylasaň ýaşyňy!
Okuw, bilim ýykyldy,
saglyk aşdy salgymdan,
gysylyp diş döküldi,
gözler doldy çylgymdan.
Neşe akdy sil bolup,
gark boldy nijeler.
Ärler işsiz, çäresiz,
ýer sermeýär ejeler.
Çapak-çapak, aksakgal,
çapak-çapak, ýaşuly!
Eliň agyrsa – saklan,
ýa sylasaň ýaşyňy!
Sakgal, telpek, don, çäkmen
bezegidi boýlaryň.
Indi olar sebäpmi
ýykylmagna öýleriň?..
Sakgally goja nire,
nire çapak-çapaklar?
(Bu gidişde telpekden
ozdurmazmy papaklar?)
Çapak-çapak, aksakgal,
çapak-çapak, ýaşuly!
Eliň agyrsa – saklan,
ýa sylasaň ýaşyňy!..

Atalar sözüne düzediş
Jan berene jaý bermeli,
Ýere tabşyrmaly hökman.
Ýöne adam jan bermänkä
Jaý berilse bolmazmykan?..

👍 Şükür senin önki nikin name

bagyshla gul hanym men bir adam. Men alem goshar bolup bilmeyan. Men brinji hem sonky linkim shu

oba oglan aga sena dash etdin tuweleme

Goshgular shu saýtdan alnypdyr:

www.annagurban.com

Bu goshgular ozalky ministr, häzir oppozisioner Ýowshan Annagurbanyñky bolmaly.

Betje goşgylar tapypsynyz sagja bolun

sawyer:
Goshgular shu saýtdan alnypdyr:

www.annagurban.com

Bu goshgular ozalky ministr, häzir oppozisioner Ýowshan Annagurbanyñky bolmaly.

hawa! Goshkyn oz icindede aydyp dur unsli okansan adym yowshan diyip

bay booooow,goshgy kopelip gidipdir....Minetdar!!! okap yatybermeli,halayan-da goshgy okap yatmany