Ýolagçy men....

Ýolagçy men, ýok belli bir menzilim,

Diňe düşläp geçjek duralgalam bar.

Agyr ýükim ýetilmedik arzuwlam,

Hem elimde kagyz bilen galam bar.

Sallançakdan başlap tabyda eltýän,

Şu kötelli ýollaň ýolagçysy men.

Her bir ädimime täsin durmuşyň,

Gülkisi, gözýaşy barabar siňen.

Aýlansamda köçeleri bir-birden,

Satamok men çigit ýa-da buzgaýmak.

Bir arzuwym bu ýollarda özimden

soňkylara ýatlar ýaly yz goýmak.

Ýolagçy men, ýok belli bir menzilim,

Ýöne däl men öý-öwzarsyz ykmanda.

Gitdikçe gysgalýar geçmeli ýolym.

Ýogsa howlukmaçlyk ýogam-a mende.

Ýazan: Mätgurban Mätgurbanow