Bes maña. /ATAMYRAT ATABAÝEW/

Özgäniñ aklyna mätäçligim ýok,
Allañ beren akyl-huşam bes maña.
Idege, soraga ýetmezçilik ýok,
Dosty-ýarym, deñim-duşum bes maña.

Dünýäñ gözellerniñ odunda ýandym,
Hem söýdüm, örtendim, nagmalar ýazdym.
Yşkyñ humaryndan az-kem aýñaldym,
Indi görýän süýji düýşüm bes maña.

Dogra dogry diýdim, gitmedim terse,
Namartlardan gaçdym, gol ýapdym merde.
Az görmäñ Hak sylap, näçe ýaş berse,
Saglyk bilen ýaşan ýaşym bes maña.

Tanajak bolsañyz, kitabym açyñ,
Käbämdir il-günüm, şygrymdyr hajym.
Sakgalym çalaryp, agardy başym,
Agarmandyr, gözüm-gaşym bes maña.