Mähir küýsegi

Soňky aý Şyhmyrat  täze işe ýerleşdi. Iş agyrdy, ol öýlerine ýarygijä golaý gelerdi. Bu gün hem adatdakysy ýaly öýlerine giç geldi. Gapyny açyp içe girenem şoldy welin, öňünden 7 ýaşlyja ogly  Begençjik  ylgap çykdy.

-Kaka, kaka, geldiňmi? – diýip, howlukmaç sorady.

-Ýok, gelemok... – diýip, Şyhmyrat agraslyk bilen jogap berdi.

-Ýene gitjekmi, kaka, gitmäýdä!

-Bolýa how, bar, ýeriňe geç-de ýat.   Sen, ýogsa-da, şu wagta çenli ýatman näme işleýäň?! – diýip, kakasy ogluna gaharlyrak gürledi.

-Sana garaşdym, kaka! Bir zat soraýaýynda senden, kaka?

-Sora, oglum.

-Kaka, sen günde näçe manat işleýäň? – diýip, ogly çyny bilen sorady. Şyhmyradyň

gahary geldi:”Ýumruk ýalyjak bolup, soraýan zady nämäý munuň, soňky aý men

işliräk welin, başyna gitdi-ow şu çaga. ” diýip, pikir etdi. Ýöne käýemedi, jogap berdi:

-100 manat.

Ogly barmak  basyp, bir zatlary hasaplaşdyrdy we birden:

-Onda maňa 60 manat beräý-dä, kaka!

-Nämä gerek saňa 60 manat?

-Gerek-da, kaka!

-Ýatsana sen gowusy, bar otagyňa geç! Häziriň özünde ylga!

-Kaka, ýaňkyny berýänçäň ýatjak däl! – diýip, çagajyk kejeleşip başlady.

-Şu ýaşda şeýle bolsaň, ulalansaň etimi iýersiň sen, bihepbe. Kakaňy diňlemeli!

-Pul  ber!...

Şeýdip Begenç kakasynyň yzyndan galmady. Ahyryn bolmady, Şyhmyradyň halys degnasyna degdi, ol saklanyp bilmedi. Gaharyna aýagy bilen depip goýberenini

özi hem bilmän galdy. Çagajyk garpyz ýaly togalanyp gitdi. Ýerinden turdy, gorkuly we kineli gözleri bilen kakasyna seretdi. Soň aglap, öz  otagyna gitdi. 

Kakasam geçip ýatdy, ýöne uklap bilmedi.  Ýekeje oguljygyny biraz gaýgy etdi, kellesinde  durmuşy baradaky pikirler garym-gatym boldy:  “Wah, edeniň

gursun!  Onsuzam ene mährini görmän önüp  ösýär-ä Begenjim... Wah, Ogulmaralym, sen dünýäňi çalyşmadyk bolanyňda, hemme zat gowy bolardy. Ejem garrady, çaga seretmäge ýagdaýy ýok...  Belki, oňa çyndanam pul zerurdyr, okuwyna gerekdir. Nämä gerekdiginem doly anyklaman,  gyzmalyk edäýdim-ow...” Şyhmyrat şu pikirler bilen, 15 minut hem ýatyp

bilmedi. Oglundan habar almak üçin ýanyna bardy.

-Begenç,ýatdyňmy?

-Ýok –diýip, ol göwünsiz jogap gaýtardy. Sesinden entegem aglap ýatanyny duýsa

bolýardy. Şyhmyrat onuň ýanyna geçip oturdy.

-Oglum, ýekeje umydym, bagrymdan önen zürýadym sen-a.  Sen beýdip, meniň aýdanymy etmän, her sözüme söz gaýtaryp dursaň gaharym gelýär... Senem bir wagt maňa düşünersiň-le. Pulum barka, senden başga kime bereýin?! Menden bir göwnüň galmasyn! 

Seret, ýöne tygşytly ulangyn, indi 1 aý saňa pul berjek däldirin! – diýip, ýanyna getiren 60 manadyny  oglunyň başujynda goýdy we çykyp gitjek boldy.  Onýança ogly:

-Kaka, dur biraz – diýip, ýanyndaky harplyk kitabyň içinden pul çykardy, 60 manadyň

üstüne goşdy we Şyhmyradyň eline tutdurdy: – Kaka, ine 100 manat. Ertir işden

irräk geläý, bile naharlanaýaly. Hemem öňküler ýaly düzzüm oýnaly. Men hemme

harplary öwrenip boldum,  olary aýdyp bereýin... 

Oguljygynyň  gözlerinde entegem ýaş bardy we çala aglamyşlap gürleýärdi...Şyhmyrat bu gezegem saklanyp bilmedi, ýöne öňki  ýaly däl - gözlerine ýaş geldi.  Begenjini gujagyna basdy...