"Däli"

 Geçen agşam ukym tutman (has dogrusy gapdalymdakylaryň horruldysyna ýatyp bilmän) daşaryk çykdym. Bir çilim otladym.
          Agşamyň howasy, salkynjak dag şemaly öwsüp dur, biz taraplarda-da howa gowşandyr, biziň kiçijek perişdämiz üşemänjik rahatja ýatyrmyka? Özüň-ä aladaçyldyň, üstümi ýapmagy halamasamda, özüň üşek bolsaňsoň uka gidenimden edil ýöne gatyk basyran ýaly edýädiň : )
          Başymy aýlap, ýerime geçsem ýatmaga kömek etmezmikä diýip, biri öçensoň ýene birini otladym. Ertire çyksam-a goňşy otaglaryň birine geçerin, diňe ýatmaga bolsa-da diýip içim gepletdim. Eýýäm ikinji çilimim tüsseläp dur. Ýadyňa düşýärmi ilkinji görüşemizde "Men sizi çilim çekenok diýip bilýärdim" diýipdiň. Gowy ýeri şol wagt çilimi goýjak diýip söz bermändirin. Ýok, begenýändirin öýdäýme. Arasynda bir goýubam gezýände, ýene nerwilerime erk edip bilmedik wagtym gaharymy şondan çykarýan ýaly elime alanymy duýman galýan.
          Asmandaky ýyldyzlara seretdim. Soňra olaryň her birini seni söýmegimiň sebäpleri bilen deňeşdirip ugradym. Hana şool-a seniň şeýle asyllylygyňa, olam seniň sadalygyňa, bulam seniň akylyňa, mähriňe... diýip durkam birdenkä gowy hem dowam edip durdum weli ýyldyzlar gutaryp galdy, sebäplerimi deňeşdirmäge ýetmän diýsem näderdiň. Bilýän "Däli!" diýerdiň.
          Bir gezek oglanlaryň biri telefonymy dörüp otyrdy, bir wagtdan "Işe gaýtmakaň gelniň bilen sene-mene edip gaýdypsyň öýdýän" diýdi.
         - ?!
          - "Däli" diýip sms iberipdir.
          - Haý seniň bir diýip telefony kakyp aldym elinden "Oýun oýnajak diýibem sms-lerimi dörýäňmaý?!"
          - "Sms-lerim diýip bary-ýogy birje sms bar-a onda-da däli ýazylypdyr" diýip ol gatyrganjak boldy.
           - Wah, dostjan sen ol sözüň meniň üçin nämeleri aňladýandygyny sora. Ol bir ymgyr manyly sözler ahyry. Onuň içinde giden bir dünýä ýatyr ahyry.
          - Häää, bundan gelip çykdy diýsene, betjaý sen-aý diýip bir hezil edip güldi dostum.
          Bilemmok sen näme üçin bu sözü saýladyň, belki zenan maşgala höküminde döreýän utanjyň sebäplidir, belki suwjarmak islemeýänsiň, belki hakyky söýgiň aňladylyşy şeýledir.
          Howwa, saňa duşmagym bu bir ykbalyň oýnudy, ikimiziň durmuş gurmagyz bu biziň saýlawymyzdy, saňa bolan söýgümiň döremegi, ýok, bu meniň erkimdäki zat däl.
          Diňle, men seniň ýakynyňda diňe iki gezek bolasym geldi, biri şu wagt, howwa, çynymy aýdýan şu wagt ýaman içim gysdy birden.
          Biri hem elmydama!