Adam yhlasy bilen ynsandyr

Günlerde bir gün, iki sany ýakyn dost, uzak çölde ýerleşen der­man suwly bir guýynyň salgysy­ny alyp, dertlerine şypa boljak
şol suwy datmak üçin ýola rowa­na bolýarlar. Günüň birinji ýary­mynda köp menzil söküp, ýadan iki ýoldaş günüň ikinji ýarymyn­da nirä ýöremelidigini bilmän, bi­raz iňkise gidip, daş töweregini synlaýarlar. Az salymdan, iki dos­tuň biri, ýere çöp sünjüp, onuň kölegesiniň kömegi belen gündogary we günbatary kesgitlemä­ge çalyşýar. Birnäçe wagtdan soň, ol ýoly sag tarapdaky ýoda
bilen dowam etmelidigini aýd­ýar. Emma, onuň tersine, dostla­ryň beýlekisi, özüniň çen edişine
görä, ýollaryny çepdäki beýik de­päniň gapdaly bilen dowam et­melidigi baradaky pikirini orta at­
ýar. Ýollaryny has takyk anykla­mak üçin, bu ýerlere belet biriniň
geçmekligine garaşmaklygy mas­lahat eden iki dost, ýodadan
sowlup, ot ýakyp, goşlaryny ýaz­dyrýarlar. Köp wagt geçmänkä
salam berip, çaý içip oturan iki ýoldaşyň ýanlaryna bir goja
ötegçi gelýär. Saçak başynda bu ýerlere belet goja, iki dosty diň­läp, öýleden soň, çen bilen ýolla­ryny sag ýoda bilen dowam et­melidigini görkezeniň mamladygyny tassyklaýar. Bu sözleri eşi­dip, çöp dikip ýoluny dogry anyk­lamaklyga ymtylan iki dostuň bi­ri: «Meniň ýolumyzy dogry kes­gitlemäge eden synanyşygymyň
ýalňyş bolanlygy zerarly, nädog­ry tarapa gidip, uly kösençligiň
sebäpkäri boljak ekenim» diýip uludan demini alypdyr. Şeýle piki­ri diňläp oturan goja: «Ýok, ýaş ýigit. Çen bilen dogry ýoly görke­zen seň ýoldaşyň sogap gazandy, emma seniň sogabyň onyň­kydan az däldir, sebäbi sen, dog­ry ýoly tapmak üçin yhlas etdiň.
Adam yhlasy bilen ynsandyr.
Adam gowy maksadyna ýetjek bolup yhlas edip, maksadyna ýe­tip bilmese-de, onuň yhlasy üçin, şeýle ynsana gowulyk we ahlak­lylyk hemra bolýandyr» diýip, sö­züni dana paýhaslylyk bilen ta­mamlaýar.