Atamyrat Atabaýewiň düşen ýagdaýyna gynandym...

Edil şu wagt saýtlarda aýlanyp ýörkäm, bir şum habary okadym. Belki ýalan bolsun, ýöne eger çyn bolsa, gaty gynandym. Atamyrat Atabaýew zehinli şahyr. Ýöne eger şeýle bolan bolsa, onda alaç ýok. Mert bol, agam, diýäýmesem...

Türkmenistanyň halk ýazyjysy, ýurtda tanymal şahyr we publisist Atamyrat Atabaýewiň eserleriniň türkmen metbugatynda çap edilmegi geçen ýylyň dekabryndan bäri bes edildi.

Ýagdaýy bilýän adamlaryň aýtmaklaryna görä, A.Atabaýew kärdeşleriniň arasynda prezidentiň edebiýat baýraklaryny paýlaşyndan nägile bolandygyny dile getiripdir we şu hem onuň gadaganlyga düşmegine sebäp bolupdyr.

Geçen ýylyň 8-nji dekabrynda Awazada döredijilik intelligensiýasyna baýrak gowşurmak dabarasy boldy. Baş baýrak, Türkmenistanyň Magtymguly adyndaky döwlet baýragy prezidenti wasp etmekden başga zat etmeýän Gözel Şagulyýewa gowşuryldy. Ozal onuň gahrymany Türkmenbaşydy, indi onuň ähli goşgy-poemalarynyň gahrymany Arkadag, ýurduň häzirki prezidenti bolup durýar. Şahyr şondan başga hiç zat barada ýazmaýar. Bu baýragyň pul sylagy $10000-e barabar.

Şonda edebiýat söýüjileriň köpüsiniň has talantly hasaplaýan şahyry Atamyrat Atabaýewe “Türkmenistanyň Altyn asyry” baýragy gowşuryldy, bu baýragyň pul sylagy $1000-e barabar.

Şu ýagdaý hem baýraklary we sylaglary hakykatda ýurduň prezidentiniň hut özüniň paýlaýandygyny gaty gowy bilýän Atabaýewi gynandyrýar. Elbetde, bu ýagdaýda prezidenti kim köp öwse, iň uly baýragy hem şol alýar.

Şahyryň aýdan nägile sözleri prezidentiň gulagyna baryp ýetýär we indi Atabaýewiň eserlerini metbugatda çap etmek gadagan. Dekabr aýynyň dowamynda onuň ady ýurtda çap edilýän gazet-žurnallarda görünmedi.

Gepiň gerdişine aýdylsa, Magtymguly adyndaky halkara baýrak soňky gezek S.Nyýazow döwründe gowşurylypdy. Şonda bu baýrak Magtymgulynyň goşgularyny iňlis diline terjime eden Ýusup Azmuna berlipdi. Ine, indi 20 ýyl soň, bir zaman şeýle uly abraýa eýe bolan baýrak köşk şahyry G.Şagulyýewa berildi. Onsoň A.Atabaýewiň ýagdaýyna düşünmek mümkin.

Çeşme http://www.chrono-tm.org/tm/2014/01/tanymal-edebiyatcy-gadaganlyga-dusdi/